Ýehowanyň Şaýatlary näme üçin roždestwony bellemeýär?
Giňden ýaýran nädogry düşünje
Ýalan: Ýehowanyň Şaýatlary Isa pygambere iman etmeýändigi üçin roždestwony bellemeýärler.
Hakykat: Ýehowanyň Şaýatlary diňe Isa Mesih arkaly halas boljakdyklaryna ynanýarlar (Resullar 4:12).
Ýalan: Olar roždestwony bellemeli däldigi barada öwredip, maşgalada agzalalyk döredýär.
Hakykat: Biz maşgalalar bilen ýürekden gyzyklanyp, olara Mukaddes Kitap arkaly maşgalasyny hasam berkitmäge kömek edýäris.
Ýalan: Siz jomartlyk bildirip, parahatlygy saklamaga jan edip we ýagşylyk edip, «roždestwonyň ruhuny» görkezmeýärsiňiz.
Hakykat: Biz her gün diýen ýaly jomart bolmaga we parahatlygy saklamaga jan edýäris (Nakyllar 11:25; Rimliler 12:18). Meselem, biz ýygnak duşuşyklarynda we wagyz edenimizde, Isa pygamberiň: «Mugt aldyňyz, mugt hem beriň» diýen maslahatyna eýerýäris (Matta 10:8). Şeýle-de biz diňe Hudaýyň Patyşalygynyň ýer ýüzünde hakyky parahatlygy dikeltjekdigine umyt edýäris (Matta 10:7).
Ýehowanyň Şaýatlary näme üçin roždestwony bellemeýär?
Isa pygamber doglan gününi däl-de, ölen gününi bellemegi tabşyrdy (Luka 22:19, 20).
Isanyň resullaram, I asyrdaky şägirtlerem roždestwony bellemeýärdiler. Bir kitapda «Roždestwonyň b. e 243-nji ýylynda, ýagny Isanyň şägirtleriniň iň soňkusynyň ölüminden I asyrdan gowrak wagt geçensoň bellenip başlandygy» aýdylýar («The New Catholic Encyclopedia»).
Isa pygamberiň 25-nji dekabrda doglandygyny görkezýän hiç hili subutnama ýok. Mukaddes Kitapda onuň haçan doglandygy aýdylmaýar.
Biz roždestwoda edilýän däp-dessurlaryň we adatlaryň butparazlykdan gelip çykandygy üçin ony bellemegiň Hudaýa ýaramaýandygyny bilýäris (2 Korinfliler 6:17).
Roždestwony bellemelimi ýa bellemeli däl — bu näme üçin wajyp?
Köp adamlar butparazlykdan gelip çykandygyny we Mukaddes Kitaba esaslanmaýandygyny bilse-de, roždestwony belleýärler. Adamlar şeýle soraglary berýärler: Ýehowanyň Şaýatlary näme üçin şeýle giňden ýaýran baýramçylygy bellemeýärler? Onuň gelip çykyşyna üns bermek wajypmy?
Mukaddes Kitap «akyl-paýhasly bolup», dogry karara gelmäge höweslendirýär (Rimliler 12:1, 2). Ol bize gymmatly hakykaty öwredýär (Ýahýa 4:23, 24). Elbetde, adamlaryň biz hakda näme pikir edýändigi wajyp. Ýöne olar halamasa-da, biz Mukaddes Kitabyň prinsipleri boýunça ýaşaýarys.
Biz roždestwony bellemeýäris. Ýöne bu meselede her bir adamyň özüniň karara gelýändigi üçin, olaryň garaýşyna hormat goýýarys. Şeýle-de biz olaryň bu baýramçylygy bellemegine päsgel bermeýäris.