Watch Tower Bible and Tract Society ka mzough u a eren tom u keren liba ga yô. Lu ken inyom i 1884 la i ver mzough ne ye, sha tindi u kpentar u Pennsylvania, ken tar u Amerika. Ka mzough u Mbashiada mba Yehova u a wasen ve tom u pasen kwagh u ve eren sha tar cii la yô, shi gberen Ubibilo kua ityakerada i pasen Bibilo kpaa.

 Laasen u mzough ne tese ér awashima na yô, ka “u eren kwaghaôndo shi tesen ior shi wasen ve.” Jighilii yô, ka “u tesen shi pasen ior loho u Tartor u Aôndo, u Yesu Kristu a lu hemen la.” Saa a lôhô or ve nana nyôr mzough ne ye, shi i ver a ver iyenge inyar i or a na sha u suen un ve a nger nan iti ker ga. Mbahemenev mba mzough ne kua mba ve lu ker la cii ka ve wasen Mbahemenev mba Shin Itine mba Mbashiada mba Yehova.

 Dugh mzough u Watch Tower Bible and Tract Society of Pennsylvania la sha kpa, Mbashiada mba Yehova mba a mbamzough mbagenev kpishi mba ve ver sha tindi ken ityar kposo kposo yô. Mbamzough mban mbagenev ka ve wa ishemberti i “Watch Tower” shin “Watchtower” la ken ati a ve. Kpa ken ijô igen yô, mbamzough mban ka ve wa ishember i môm ken asember a ahar ne, er i yilan ken ijô shon la.

 Mbamzough kposo kposo mba se ver sha tindi ne wase se u eren akaa kpishi, er a i ter shin heen ne nahan:

•   U ngeren shi gberen ityakerada. Se gber Bibilo kuma er ukôpi miliôn 220 nahan, man ityakerada kposo kposo i pasen Bibilo kuma er biliôn 40 nahan, ken ijô i hemban 700. Ijiir yase i sha Intanet i jw.org la ka i wase ior u ôron Bibilo sha Intanet gbilin, ken ijô i hemban 120, shi zuan a mbamlumun sha mbampin mba sha akaa a ken Bibilo, er ngun nahan, “Ka nyi i lu Tartor u Aôndo?”

•   U tesen ior. Se ver imakeranta kposo kposo i tesen ior Bibilo. U tesen ikyav yô, hii ken inyom i 1943 la je, Mbashiada mba Yehova mba hemban iorov 8,000 zua a ityesen i vesen ken Makeranta u Henen Bibilo u Watchtower u Gileadi la. Kwagh ne wase ve u lun mbamishen shin mbasuen tom u pasen kwagh u se eren sha tar cii la, shi samber a u kpaa. Hanma kasua yô, ka i tese ior umiliôn imôngo, kua mba ve lu Mbashiada ga kpaa, ken atôônanongo ase. Shi se mba tesen ior mba ve fe takerada u ôron ga la kpaa, nahan se gber takerada ugen ken ijô 110 sha u tesen ior u ôron takerada shi ngeren kwagh.

•   U nan ior iwasen. Ka se na ior mba aahe a vihi ve akaa ve lu yan ican la iwasen, ka a lu aahe u uumace ve ve a mi kpaa, er atemityou u ken tar u Rwanda, ken inyom i 1994 la nahan, shin uaahe mbagenev kpaa, er tartenger u ken tar u Haiti, ken inyom i 2010 la nahan.

 Shin er mbamzough mba se ver sha tindi mbara ve wase se u eren akaa kpishi nahan kpa, ka ve ve ne se lu eren tom wase la ga. Hanma Orkristu yô, gba u nana er tom u Aôndo a ne nan ér nana tese shi nana pase loho u dedoo la. (Mateu 24:14; 28:19, 20) Se na jighjigh ser ka Aôndo a lu suen tom ne ye, shi una za hemen u ‘nan u mvese.’—1 Mbakorinte 3:6, 7.