Yange i maren hen geri u Santo Domingo, ken tar u Dominikan. I mar se unyiin, m lu u masetyô. Mbamaren av fa takerada kpishi, nahan ve soo u yesen se doo doo, hen atô u ior mba injaav kua mbamimi. Yange mbamaren av zua a mbamishen mba kwaghaôndo u Mormon, anyom kar anyiin cii ve i va mase maren mo ye. Er agumaior la wuha iyol tsembelee shi lu a inja i dedoo yô, doo mbamaren av kpishi, nahan ve kaa ér a lu tsombor wase ua hii eren kwaghaôndo ne hen haregh wase ye.

Shighe u m lu vesen a vese la, i saan mo iyol kpishi u eren ugurgur mba côôci eren la, shi ityesen i Mormon sha kwagh u tsombor man aeren a dedoo la kpa doom. Yange doom kpishi er m lu Ormormon yô, nahan m soo u hingir ormishen.

Shighe u m lu anyom 18 la, tsombor wase yem ken tar u Amerika ér m za hen yunivasiti i injaa. Inyom kar yô, anmgbian u ngôm u kwase vea nom na va sôr se ken kpentar u Florida. Ve cii ka Mbashiada mba Yehova. Yange ve lôhô se ér se za mkohol u vesen ugen a ve imôngo. Se mba ze yô, doom u nengen er ior mba ve tema ikyua a mo la cii lu bughun Bibilo nengen ker shi ngeren akaa shin inya yô. Tsô mo kpa m sôn biro man takerada, m gba mi ngeren.

Mkohol dugh kera yô, anmgbian u ngôm ne vea nom kaa ér, er m soo u lun ormishen yô, vea wasem m fa kwagh u Bibilo. Yange m nenge mer mhen ne doo, sha ci u m hemba hoghor a Takerada u kwaghaôndo u Mormon la a Bibilo.

Amgbian u ngôm vea nom na yange vea henen Bibilo a mo sha telefon yô, ve kaa a mo ér m kar akaa a m ne jighjigh a mi la sha atesen a Bibilo m nenge. Ve soo ér m fa kwagh u Bibilo i tese la iyol yam.

Yange m lumun atesen kpishi a kwaghaôndo u Mormon la, nahan kpa, atesen la aa zua sha a Bibilo kpa m fa  jighilii ga. Anmgbian u ngôm ne tindim a Awake! u Novemba 8, 1995, u Mbashiada mba Yehova gber yô. Lu a ngeren mbagen mba ve pase atesen a kwaghaôndo u Mormon yô. Kpiligh mo iyol er m fa atesen kpishi a kwaghaôndo u Mormon ga nahan. Kwagh ne na yô, m za hen ijiir i kwaghaôndo u Mormon i sha Intanet la, mer me fa mimi u kwagh u i nger ken Awake! la. Kwagh la lu mimi, shi m ze hen ijiir i kwaghaôndo u Mormon a kôson akaa, ken kpentar u Utah la yô, mase wanger mo.

M vande nan jighjigh mer Takerada u kwaghaôndo u Mormon la kaha a Bibilo ga. Kpa m hiin u ôron Bibilo sha gbashima yô, m nenge mer u kaha. U tesen ikyav yô, Bibilo kaa ken Esekiel 18:4 ér uma kpen. Kpa Takerada u kwaghaôndo u Mormon yô kaa ken Alma 42:9 ér: “Uma una kpe mayange ga.”

Shi dugh mkposo u atesen a kwaghaôndo u Mormon la sha je kpa, ityesen ve i tan ave vanger a tar u or nan dugh ker la kpa zam iyol. U tesen ikyav yô, kwaghaôndo u Mormon tesen ér Sule u Eden yange u lu ape hegen i lu eniel u Jackson, ken kpentar u Missouri, tar u Amerika la. Shi mbahemenev mba kwaghaôndo u Mormon mba tesen ér, “Iyange igen Aôndo una hemen tar cii sha ikyev i gomoti u tar u Amerika.”

Yange m shi henen sha kwagh u ityesen i kwaghaôndo u Mormon la i kaa ér una er ityar igen la, er tar wam nahan. Iyange igen yô, gumor ugen ken kwaghaôndo ne, u i lu tsaase un ér a hingir ormishen yô, yilam sha telefon se gba lamen, maa m pine un kwagh ne. M pine un jighilii mer, aluer tar na ngu nôngon ityav a tar ugen nahan, una nôngo ityav a mba ve ze kwaghaôndo u Mormon, mba ve lu ken tar u ú lu nôngon ityav a tar na laa? A lumun, nahan kpiligh mo iyol saa her! Yange m time sha akaa a m na jighjigh a mi ken kwaghaôndo u Mormon la seer zan shimi, shi m lam a mbahemenev mba tagher tagher mba ken kwaghaôndo ne kpaa. Ve kaa a mo ér, mbamlumun sha mbampin av mbara wa akaamyer ker, man saa iyange sev a av iwanger ia seer tan ve, a zua a iwanger sha mi ye.

Er ve nam mlumun ga yô, m hide m gba henen sha kwagh u uma wam zulee, kua er i hii ve m soo u lun ormishen u Mormon la kpaa. M kav mer ityôkyaa i môm i m soo u lun ormishen u yô, lu sha ci u m soo u wasen mbagenev. Shi ityôkyaa igen yô, m soo mer me va lu ormishen sha ci u ior ve naan mo icivir yô. Kpa Aôndo iyol na jighilii yô, m fa kwagh na kpishi ga. Er ashighe kpishi m ôr Bibilo nahan kpa, m nenge mer ngi a iwasen keng ga. Yange m fa kwagh u Aôndo a we ishima u va eren a tar ne kua uumace ga.

M gbe henen Bibilo vea Mbashiada mba Yehova yô, m fa iti i Aôndo, shi m fa kwagh u ka a er se shighe u se kpe la, man tom u Yesu a lu eren sha u kuren awashima u Aôndo la kua akaa agen kpishi. Shighe kar yô, m hoghor a Bibilo shi saan mo iyol u ôron mbagenev akaa a m lu henen la. M vande fan mer Aôndo ngu, kpa hegen me fatyô u lamen a na er a lu ijende yam i ishima ishima ne ken msen. Sha iyange i Julai 12, 2004 yô, i erem batisema m hingir Orshiada u Yehova, shi iwer ngi karen ateratar yô, m hii u eren tom u pasen kwagh hanma shighe la.

M ngu shin afishi a shin itine a Mbashiada mba Yehova, a ken Brooklyn, hen gar u New York la hegen ka anyom ataan je ne. Doom kpishi er m zough a ian i wasen u gberen Bibilo man ityakerada i pasen Bibilo, i i wasen ior umiliôn umiliôn sha tar nahan, shi m ngu wasen ior u henen kwagh u Aôndo zan zan hegen.