Yange i maren hen geri u Moundsville. Geri ne ngu hen kpe u Ifi u Ohio, vegher u ken imbusutarimese i kpentar u West Virginia, ken tar u Amerika; geri ne lu geri u lun hang kpaa ga. Yange i mar se unyiin, mba nomso utar, u kwase môm; mo di m lu wan u sha uhar; nahan ya wase luun gong gong hanma shighe cii shi i saan hanma or iyol kpaa. Mbamaren av eren tom kpoghuloo, shi ve lu ior mba mimi, mba ior doo ve ishima yô. Se lu a kwagh a ve kpishi ga, kpa kwagh banen se shighe môm ga. Er mbamaren av lu Mbashiada mba Yehova yô, yange ve nongo sha afatyô ve cii ve tese se akaawan a ken Bibilo hii shighe u se lu iyev la je.

Nahan kpa, shighe u m lu hian a hia or la, m gba tôôn ishima yam sha akaa a i tesem hii iyev je la kera. M hii u henen mer or a kaa ér nana dondo akaawan a Bibilo nahan, nana lu or u injaa shin a saan nan iyol kpa? Yange m hen mer aluer m ngu sha ian yam gbangelaa, m ngu eren hanma kwagh u m soo yô, a hemba saan mo iyol. Ica lu a gba ga je tsô m de u zan mbamkombo mba Mbakristu. Anngôm u vesen kua anmgbian wam u kwase u kiriki kpa tsuwe tume ken ihyembeato ne a mo ityô. Mbamaren asev yange ve nôngo kwagh ve gema ijime ve gema ikyum ér vea wase se, kpa se venda iwasen ve la.

Cuku tsô kpa yange m fa mer kwagh u m lu keren mer me lu sha sev wam ne, una na me hingir kpan u akaa a vihin mo la ga. Iyange igen, er m due makeranta m lu hiden ken ya yô, ijende yam igen nam shigali; maa m ngohol m ma. Hii iyange la je, m kera tswer kwaghmôm u vihin mo la ga. Shighe kar yô, m hii u man mcimbim ma bov kua ikyôhô ganden ikyaa inya, shi eren ijimba kpaa. Anyom nga gbe karen yô, m lu hemban man mcimbim ma bov ma taver cii, shi mcimbim man kpishi ya tor ken a mo. Er m uve ityough ken mcimbim ma bov cou cou yô, m hii u teen ma, sha er me zua a inyaregh ki eren uma sha sev wam yô.

Er m lu nôngon kpoghuloo mer me palegh icintan i imoshima yam la nahan kpa, hanma shighe yô, ishima i lu nan mo ibo ér uma u m lu eren ne ka u dedoo ga. Nahan kpa, m nenge mer shighe kar u me gema uma wam, kera ka u me hide ijime ga. Shin er mo vea azende a am se zaan uiniongo man amar a vinen  imôngo nahan kpa, ashighe kpishi i huan mo shi m ule kpaa. Ashighe agen m hide m hen er mbamaren av ve lu ior mba dedoo, ve mo di m saa ishe nahan, i taver mo kpishi.

Er m hunde ishima mer, mo yô i̱ yam bee nahan kpa, mbagenev yô lu a ishimaveren her. Ken inyom i 2000 la, mbamaren av lôhôm mkohol u vesen u Mbashiada mba Yehova ugen. Yange doom u zan ga, kpa m za. Kwagh u kpiligh mo iyol yô, anmgbianev av mba ve kpa ve undu mimi mbara kpa za mkohol la.

Shighe u m lu hen mkohol ne la, m umbur er yange m za amar hen ijiir la, ken inyom i i kar ken ijime la yô. Mkposo u m nenge a mi hen ijiir ne la kôrom ken ishima tsung. Shighe u se za amar la, se hôr ijiir la côu côu, mnyim ma shigali kpa iv hen ijiir shon. Ior mba ve za amar la kpishi lu mba vihin tu, shi ityougholov mbi i lu kuhwan mbira kpa lu mbi nan or uren a ure. Kpa hen mkohol ne yô, ior mba m lu a ve la lu mba saan ve iyol sha mimi yô; ve ngohol mo saan saan, shin er m kera nenge a ve ga anyom ngee nahan kpaa. Ijiir la kpa lu sha ashe wang, shi loho u i lu pasen her la kpa lu u nan ishimaverenkeghen. M nengen er mimi u Bibilo la ka a wase ior ve lu ior mbainjaav shi i saan ve iyol sha mimi yô, lanem ishima er yange hii ve m venda mimi shon yô.—Yesaia 48:17, 18.

Yange mba hidi mkohol la je, m kera vihi shighe ga, maa m hide ken Tiônnongo u Kristu. Anmgbianev av mbara kpa, akaa a ve ungwa shi ve nenge a mi sha mkohol la mgbegha ve ve hide ken tiônnongo. Se mba utar mban cii se lumun ser i hen Bibilo a vese.

Ivur Bibilo i yange i hemba kôron mo ken ishima cii yô, lu Yakobu 4:8, a pe i kaa ér: “Kporom nen hen Aôndo, Un kpaa, Una kporom her a ven” la. M mase kaven mer, aluer m soo u kporom hen Aôndo yô, a gba u me sôr uma wam. Yange gba u me de shigali i man, shi me de u man mcimbim ma bov shi hunden msôrom.—2 Mbakorinte 7:1.

Yange m pav a azende am a tse la, m hide m kôr azende vea ior mba ve civir Yehova yô. Ortamen u ken tiônnongo u Kristu u yange hen Bibilo a mo la wasem kpishi. Yange á shi yilan mo sha telefon, ashighe agen di a va nenge a mo sha u una fa er m lu yô. Zan zan nyian kpa ngu ijende yam i sôngo sôngo.

Ken fam u inyom i 2001 la, mo man anmgbian wam u vesen la kua u kwase la cii, se tsegha ayol a ase sha ci u Aôndo, nahan i er se batisema. Yange saan mbamaren av iyol kua anmgbian wam u nomso u kiriki la je zua ga, gadia tsombor wase cii hide zua imôngo sha u civir Yehova.

Yange m hen mer akaawan a Bibilo tswer akaa ngee gande, kpa hegen yô, m nengen mer akaawan ne ka a kuran se a kura. Bibilo wasem m de u man mcimbim ma bov shi teen mbi kpaa, nahan m hemba ngun or u injaa hegen.

Hegen mo kpa m ngu môm ken mzough u anmgbianev mba ve civir Yehova sha tar cii la. Kwagh ne ka ian i civirigh i numben a mi ga. Ka nongo u ior mba ve soo ayol a ve sha mimi, shi ve civir Aôndo ken mzough kpaa yô. (Yohane 13:34, 35) M zua a iveren igen kpaa ken nongo ne; kwase wam Adrianne, u a doom ishima kpishi la ka iveren i vesen i m zough a mi ken nongo ne yô. Saan se iyol kpishi er se lu civir Orgban se imôngo nahan.

Er ma m hembe wan iyol yam ikyo tseegh la yô, hegen m ngu eren tom u pasen kwagh hanma shighe la, tesen ior er ve kpa Mkaanem ma Aôndo ma a fatyô u wasen ve yô. Tom ne nam msaanyol u hemban cii. Me fatyô u kaan vangertiôr mer, Bibilo gema uma wam. Hegen yô, m kera ngu ken uikyangen ga.