Ashighe agen, ka a dugh ma kwagh shin inya yô, kwagh shon a tese ér ma or u i ter kwagh u nan shin kwagh u tsombor u nan ken Bibilo la, yange nan lu kpôô kpôô. U tesen ikyav yô, ken inyom i 2011 la, mbafantakerada mbagenev ken tar u Iserael dugh kwagh ugen shin inya, nahan ve nger kwagh sha kwagh shon, u a tese ikyav i kwagh u se er sha heen ne yô. Yange ve dugh akwati ugen shin inya, u a tse i kom anyom 2,000 yô. Akwati ne lu a akuhe a orkpen, u inyam i nan hôô kera yô.

Yange i nger sha akwati shon ér: “Miriam, wan u Yeshua u kwase, Yeshua wan u Kayafa, pristi u Maashia, ken tsombor u Bete Imri.” Zegepristi u Mbayuda ugen, u un kpa lu môm ken mba yange ve ôr Yesu ijir shi ve na zwa ér i wua un la, lu Kayafa. (Yoh. 11:48-50) Or u timen sha akaa a mbayiase ugen, iti na ér Flavius Josephus, a pase iti i zegepristi ne ér ka “Yosev, u i yilan un ér Kayafa la.” Kwagh ne tese wang ér akwati ne lu u i wa akuhe a anmgbian na ugen ker yô. Er ngeren u sha akwati ugen, u i vande zuan a mi, lu a akuhe ker, a i hen ér ka a zegepristi iyol na la, a tese ér Yosev ka wan u Kayafa * yô, alaghga tsô Miriam lu ken tsombor u Kayafa.

Gbaatom ugen ken tar u Iserael, u i yer ér Israel Antiquities Authority, u a timen sha kwagh u mbayiase yô, kaa ér yange i ngohol akwati ugen u lu a akuhe a Miriam ker la hen mbaiv mba ve hembe uwar ugen yô. Er i time sha kwagh u akwati ne tsembelee, kua kwagh u i nger shami la yô, i mase kaven ér akuhe ne lu a Miriam mimi.

Akwati la shi ôr se kwagh ugen u a lu u he yô. Á ôr kwagh u “Maashia,” u lu nongo u masetyô, ken iniongo 24 i i pav i ver, i lu eren tom sha adondo adondo ken tempel u ken Yerusalem la. (1 Kron. 24:1-18) Gbaatom u Israel Antiquities Authority la kaa ér, kwagh u i nger sha akwati la tese ér “tsombor u Kayafa yange u due ken nongo u Maashia.”

Shi ngeren u sha akwati la ter iti i Bete Imri la kpaa. Igbenda ngi ihiar i se fatyô u pasen inja i iti i ken ngeren u a lu sha akwati la yô. Gbaatom u Israel Antiquities Authority kaa ér, “Gbenda u hiihii yô, alaghga Bete Imri ka iti i tsombor u pristi ugen. Tsombor ne ka ônov mba Imer (Esera 2:36, 37; Nehemia 7:39-42), mba anmgbianev vev mbagenev ve dugh ken nongo u Maashia la yô. Gbenda u sha uhar yô, [Bete Imri] ka ijiir i yange i mar Miriam her yô, shin ka ijiir i tsombor na jimin cii.” A lu nyi je kpa, akwati u a lu a akuhe a Miriam ker la ka ikyav i tesen ér mba Bibilo i er kwagh ve la lu ior kpôô kpôô, mba ve va ken icombor i i lu kpôô kpôô yô.