Hulda Kure Awashima Na
WEA vande zan hen an-icile u cuku ugen ken tar u Indonesia, u i yer ér Sangir Besar la anyom a karen ken ijime la yô, alaghga yange u nenge a anmgbianev asev mba kasev mbagenev utar hen kpe zegemnger. Shighe la ve lu eren tom imôngo hen kpe zegemnger la. Yange i fa ve hen icile la sha tom ve u pasen kwagh, u ve lu eren sha u wasen ior ér ve fa mimi u Bibilo la. Kpa shighe u u nenge a ve la yô, ve lu eren kwagh ugen kposo.
Icile i Sangir Besar, vegher u ken imbusutarimese i tar u Indonesia
Hiihii yô, yange ve hungwan shin zegemnger, ve zenden sha kpe, ve tôôn awen a kehen ve va veren sha tar. Awen la agen a kehe a kuma er bol nahan. Maa ve hide ve tema sha ukpenga mba kiriki ve gba hemben a. Ve hembe a a hingir awen a ndahar er ajikyegh nahan. Vea been yô, ve wa awen shon shin ubokoti mba robaa, ve tôô ve unde sha gbenda u duen yemen ape ve tsaan la. Maa ve za wa a ken aba a vesen, er a fatyô u kôron a wan shin umato mba vesen, a za er gbenda a mi yô.
Hulda, ngu kuran awen hen kpe zegemnger
Anmgbian u kwase u môm la iti na ér Hulda. Un yange a hemba lun a shighe u eren tom ne a mba mbagenev mbara. Yange una zua a inyaregh yô, a vihi ki sha akaa a kwagh gbaan tsombor na a mi ayange ayange yô. Kpa hen shighe ne yô, a soo ér una koso inyaregh, una va er kwagh ugen kpaa. Yange soo u yamen tableeti sha er una wa JW Library® sha mi yô. Hulda yange fa je ér uvidio man akaa agen a a lu sha JW Library® la, aa wase un u seer fan igbenda i pasen kwagh shi seer kaven Bibilo tsembelee.
Hanma iyange yô, Hulda a tôô ahwa ahar a er tom ne. A er nahan zan zan kuma uwer môm man tiôn. Yange hembe awen la ngee je kuma u ivin mato u kiriki. Ken masejime yô, a zua a inyaregh ki una fatyô u yamen tableeti yô.
Hulda a tableeti na
Hulda kaa ér, “Shin er yange m er tom u hemben awen la tumem iyol shi iyol nyoon mo kpishi nahan kpa, tableeti u m yam la yange ngur wasen mo u seer fan igbenda i pasen kwagh shi wan iyol sha mbamkombo mba tiônnongo a iyolnyoon shio yô, fese je maa ican i yange m ya la cii i hungur mo.” Shi a kaa ér tableeti la yange wase un shighe u angev mbu Korona hii ica lu a gba ga la. Sha ci u shighe la, akaa a ken tiônnongo cii, lu sha ahumbe tseegh i lu masen eren ye. Se mba ember a Hulda imôngo er yange fatyô u kuren awashima na yô.
