Mbampin mba Mbaôron Takeda Ne Ve Pin La
Ka an i ôr ken Yesaia 60:1 ér nana “mough” nana “ta iwanger,” man nan ngu eren kwagh ne nena?
Yesaia 60:1 kaa ér: “Mough sha, ta iwanger; gadia iwanger you i va, iengem i TER kpaa ngi mondon sha a we.” Kwase u i ôr kwagh na ken Yesaia 60 kua mtom ma ma dondo la ka Shion shin Yerusalem u yange lu gartamen u tar u Yuda la. a (Yes. 60:14; 62:1, 2) Gar u Yerusalem la tile sha ityough ki tar u Iserael cii. Kwagh u Yesaia ôr la due a mbampin uhar: Hiihii yô, ka hanma shighe Yerusalem yange “mough” ta iwanger, man yange er kwagh ne nena? Sha uhar yô, Kwagh u Yesaia ôr la ngu kuren sha mi sha ayange a ase ne kpaa?
Ka hanma shighe Yerusalem yange “mough” ta iwanger, man yange er kwagh ne nena? Yange i vihi tempel u ken Yerusalem la shi i kôr Mbayuda i yem a ve uikyangen ken Babilon kuma anyom 70. Kpa yange Mbamede man Mbapershia mba va hemban Mbababilon ityav yô, Mbaiserael mba ve lu uikyangen ken Babilon la, zua a ian i hiden yemen ken tar ve, za civir Yehova. (Esera 1:1-4) Nahan hii ken inyom i 537 la je, mbajighjigh mba ve shi ken ikwe 12 la cii hii u civir Aôndo sha mimi. (Yes. 60:4) Yange ve hii u nan Yehova iniav shi eren iniongo i atumbe shi ve maa tempel kpaa. (Esera 3:1-4, 7-11; 6:16-22) Nahan iengem i Yehova hide hii u mondon sha Yerusalem, ka ior nav je la. Ve di kpa ve hingir iwanger i ken jijingi i ityar i i fa Yehova ga la.
Nahan kpa, akaaôron a profeti Yesaia yange kure sha mi hen shighe la tseegh ga. Mbaiserael kpishi yange ve va hemba Aôndo ato. (Neh. 13:27; Mal. 1:6-8; 2:13, 14; Mat. 15:7-9) Shighe kar yô, ve venda Yesu Kristu u lu Mesiya la je kpaa. (Mat. 27:1, 2) Ken inyom i 70 la, i va tim Yerusalem kua tempel na la sha kwa har.
Yehova yange tsenga ôron ér kwagh ne una er. (Dan. 9:24-27) Ikyav tese wang ér yange lu awashima na u akaaôron a profeti a i ôr ken Yesaia ityough 60 la a kure vindi vindi sha Yerusalem u shin tar ne ga.
Kwagh u Yesaia ôr la ngu kuren sha mi sha ayange a ase ne kpaa? Een, kpa ngu kuren sha mi sha kwase ugen u sha injakwagh, u a lu “Yerusalem u sha la.” Apostoli Paulu ôr kwagh na ér: “Ka ngô wase.” (Gal. 4:26) Yerusalem u sha la ka vegher u nongo u Aôndo u sha u u lu mbatyomov mbajighjigh la. Ônov nav di ka Yesu man Mbakristu mba i shigh ve mkurem mba 144,000, mba ve lu a ishimaverenkeghen i yemen sha er Paulu nahan la. Ka Mbakristu mba i shigh ve mkurem la ve lu “icighanikyurior” shin “Iserael u Aôndo la” ye.—1 Pet. 2:9; Gal. 6:16.
Nahan Yerusalem u sha la a “mough” a “ta iwanger” nena? A er kwagh ne sha ikyev i ônov nav mba ken jijingi la. Nenge ase er kwagh u yange er ônov nav la a zua vea kwaghôron u profeti u ken Yesaia ityough 60 la yô.
Yange gba u Mbakristu mba i shighe ve mkurem la vea “mough” sha ci u ve lu ken ime i sha injakwagh shighe u mbavendan mimi seer ngeen zum u mbaapostoli kpe kera la. (Mat. 13:37-43) Nahan yange ve hingir u lun sha ikyev i Zegebabilon u a lu tartor u kwaghaôndo u aiegh sha tar cii la. Mbakristu mba i shighe ve mkurem la yange ve za hemen u lun ken kpan zan zan ar hen “shighe u mkur u tar ne” u yange hii ken inyom i 1914 la. (Mat. 13:39, 40) Shighe karen, mba ker ken inyom i 1919 yô, ve kera lu ken kpan sha ikyev i Zegebabilon ga, nahan ve gba tan iwanger i sha injakwagh sha u pasen loho u dedoo u Tartor kpoghuloo. b Ken anyom a karen ne, ior mba ken akuraior cii va ken iwanger ne, kua mbagenev mba ve shi her ken Iserael u Aôndo, mba i ôr kwagh ve ken Yesaia 60:3 ér mba “ator” la.—Mpa. 5:9, 10.
Ken hemen yô, Mbakristu mba i shighe ve mkurem la vea seer tan iwanger i Yehova la sha gbenda u vesen. Vea er kwagh ne nena? Vea kpen kera yô, vea hingir u lun ken “Yerusalem u He” la, shin vea lu kwasehe u Kristu ken mba 144,000 mbara, nahan vea er tom u ator man u upristi vea Kristu imôngo.—Mpa. 14:1; 21:1, 2, 24; 22:3-5.
Yerusalem u He la una er tom u vesen sha u kuren kwagh u i ôr ken Yesaia 60:1 la. (Nenge Yesaia 60:1, 3, 5, 11, 19, 20 man Mpase 21:2, 9-11, 22-26.) Er Yerusalem yange lu ijiir i gomoti u Iserael u sha ayange a tsuaa la hemen her nahan, kape Yerusalem u He la man Kristu kpa, vea hingir gomoti u tar u he la je la. Er nan ve i kaa ér Yerusalem u He la ‘due sha, hen Aôndo, ngu senen’? Ka sha ci u gomoti u tar u he la una er kwagh u una a bende a uumace yô. Ior mba cian Aôndo mba ken akuraior cii vea ‘zende sha iwanger na.’ Vea kera er isholibo shin vea kpe kpaa ga. (Mpa. 21:3, 4, 24) Kwagh u una due ker yô, a lu u “sôron akaa cii” er Yesaia man uprofeti mbagenev yange ve tsenga ôron nahan. (Aer. 3:21) Shighe u sôron akaa la yange hii zum u Kristu tema Tor la man una kure ken mbee u hemen na u anyom dubu la.
a Yesaia 60:1 ken Bibilo i New World Translation la, i ôr kwagh u “Shion” shin “Yerusalem” ga, kpa i gema i ter “kwase.” Sha ci u asember a i ter u ôron kwagh u or u nana “mough” nana “ta iwanger” la tese wang ér mba ôron ka kwagh u kwase, kpa ken ivur la i kaa ér “we.” Ka a ter ishember i kwase la yô, kwagh la a wase mba lamen zwa buter u fan ér ka kwase u sha injakwagh i lu ôron kwagh na ye.
b I ôr kwagh u mcivir u mimi u yange i sôr ken inyom i 1919 la ken Esekiel 37:1-14 man Mpase 11:7-12. Esekiel yange tsenga ôron kwagh u mserakaa u ken mcivir u mimi u Mbakristu mba i shighe ve mkurem la cii shin er ve lu ken kpan shighe kar kpishi nahan kpaa. Kwaghôron u profeti u i ôr ken Mpase la ngu ôron kwagh u mba a hide a mar ve sha injakwagh mba ve lu ken annongo u kpuaa u anmgbianev mba i shighe ve mkurem shi ve lu hemen mba yange ve kera fatyô u civir Yehova hen anshighe ugen ga sha ci u i wuhe ve ken purusu sha mimi ga la. Ken inyom i 1919 la, i tsua ve ér ve lu ”wanakiriki u jighjigh man u fan kwagh.”—Mat. 24:45; nenge takeda u Pure Worship of Jehovah—Restored At Last! la sha peeji 118.
