U Fa Kpa?
Akam a i dugh shin alôgh a gar u Babilon la kua gbenda u yange i ta a la zua sha kwagh u Bibilo i ôr la nena?
MBADUGHUN akaa a mbayiase shin inya time alôgh a gar u Babilon u tsuaa la dugh akam a mgbaghen umiliôn imôngo, a yange i maa gar la a mi yô. Orgen u dughun akaa a mbayiase shin inya, iti na ér Robert Koldewey, a kaa ér yange i ta akam la i mgbagh ken atse a i maa a “ken akôngo a gar shon, ape inyatyuu kua ikyon i wan usu a mi . . . lu kpishi yô.”
Mbadughun akaa a mbayiase shin inya shi zua a ikyav igen i tesen ér mbahemenev mba gomoti u Babilon la yange ve er kwagh ugen u hemban cier iyol cii, a atse a mgbaghen akam la. Profesôr ugen hen University of Toronto, u a tesen yiase i Mbaashiria mba sha ayange a tsuaa mbara kua zwa ve yô, iti na ér Paul-Alain Beaulieu, a kaa ér: “Ngeren mba Babilon mba sha ikpande awen kpishi . . . tese ér yange or a hendan a tor u Babilon shin nana laha uicighanmbaakaav yô, tor a na zwa i za kende nan ken atse a nanden akam la, nan hia.” Ikyav i tesen yô, i zua a kwagh ugen u yange i nger sha ayange a Tor Nebukadinesar la yô. I nger kwagh shon ér: “Tim ve kera, nande ve, mgbagh ve . . . ken atse a yôron . . . ve hia mnyim ma kpurum, kende ve ken usu ve kpe kera.”
Kwagh ne umbur mbaôron Bibilo kwagh u i nger ken Daniel ityough 3 ér yange er la. Bibilo kaa ér, Tor Nebukadinesar yange tim eev mbu zegenan mbu i er sha zanaria yô, hen pev u Dura, ken akôngo a gar u Babilon. Nahan agumaior a Mbaheberu atar a i yilan ér Shaderaki man Meshaki man Abedinego la mba vende u civir eev mbura yô, ishima vihi Nebukadinesar kpishi. Nahan a na zwa ér i kende usu ken atse la, u hemba tseen a u i vande keer la kwa taankaruhar, maa i kôr agumaior a atar ne “i gbihi ve ken atô u atse a usu u yeghen ker la.” Kpa ortyom u ageegh va yima ve ken usu u mayange je lu u vea fatyô u waren ker ga la.—Dan. 3:1-6, 19-28.
© The Trustees of the British Museum. Licensed under CC BY-NC-SA 4.0. Source
Ikyamegh ki i mgbagh yô, i nger iti i Nebukadinesar sha mi
Akam a i dugh shin alôgh a gar u Babilon u tsuaa la kpa tese ér kwagh u Bibilo i ôr la ka mimi. I nger akaa sha akam ne agen, man akaa a i nger la kpishi lu u wuese tor. I nger kwagh sha ikyamegh kigen kira ér: “Nebukadinesar, tor u Babilon . . . Ijiir i mo tor u hemban m mar ne . . . tsombor wam u tema tor ker gbem sha won.” Mkaanem man ma inja vough er ka kwagh u i nger ken Daniel 4:30 ér Nebukadinesar yange lu tan ihyagh kaan ér: “Ngun kera ka zege Babilon, u m maa sha u a̱ lu ijiir i teman i tor, sha tahav mbu agee am, sha ci u icivir i shagba wam ne gaa?” la nahan.
