Ior kpishi de adua u zan sha ci u ka vea za kpa ve zua a ishimasurun shin iwanger sha akaa a ken jijingi ga. Nahan kpa, hii nan ve i doo u u za mbamkombo mba Mbakristu, mba Mbashiada mba Yehova ve eren laa? Aluer u za yô, ka nyi u zua a mini?

U zua a msaanyol sha u lun imôngo vea ior mba ve doo ayol a ve shi ve we mbagenev ikyo la. Sha ayange a mbaapostoli la, i kohol Mbakristu ken iniongo i Kristu shin ken atôônanongo, nahan ve kumban imôngo ve civir Aôndo shi ve henen Ruamabera shi ve taver ayol a ve asema. (Mbaheberu 10:24, 25) Yange vea kohol imôngo yô, ve eren kwagh a anmgbianev vev mba nomso man mba kasev mba ken Kristu sha dooshima, nahan ve nengen ér mba hen atô u azende ve a mimi. (2 Mbatesalonika 1:3; 3 Yohane 14) Se mba dondon ieren ve la nyian, nahan se mba zuan a msaanyol u ve kpa yange ve zua a mi la.

U zua a mbamtsera er u lu henen u dondon akaawan a Bibilo la. Nyian kpa nomso man kasev kua mbayev ka ve kohol imôngo, er lu sha ayange a tsuaa la nahan. Ka sea kohol imôngo yô, ior mba fan ityesen tsembelee ve pase se Bibilo, nahan ve wase se u kaven er se dondo akaawan a i ken uma wase yô. (Duteronomi 31:12; Nehemia 8:8) Hanma or u nan ze cii yô, nan ngu a ian i wan zwa sha kwagh u i lu lamen sha mi la, shi gberen icam kpaa. Kwagh ne ngu a wase se u pasen ishimaverenkeghen i se Mbakristu se lu a mi la.—Mbaheberu 10:23.

Jighjigh u u ne Aôndo la una seer taver, nahan u zua a averen. Apostoli Paulu yange kaa a tiônnongo ugen sha ayange a na la ér: “Hangem pe zuan ishigh a ven sha u, . . . se cii ma i taver se asema a ven imôngo sha jighjigh wase u nan ayol a ase, u wen kpaa, u wam kpaa.” (Mbaromanu 1:11, 12) Ka sea zaan mbamkombo yô, se zuan ishigh a mba se ne jighjigh a ve imôngo la fele fele, nahan kwagh la a taver jighjigh wase u nan shi se seer kangen ishima u dondon akaawan a Bibilo la.

Aluer i lôhô u mkombo u tiônnongo wase kwagen yô, er nan u ze sha er u za nenge akaa ne iyol you ga? U za yô, a ngohol we saan saan. Mbamkombo asev cii ka gbilin, mba ngohol or sule her mayange ga.

• Ka ikyav i unô se dondon sha u eren mbamkombo mba tiônnongo?

• Aluer se mba zan mbamkombo mba Mbakristu yô, se zua a mbamtsera nena?