Mbaheberu 2:1-18
2 Ka nahan ve i gbe hange hange u se ver ishima sha akaa a se ongo la a hemba ave a tse ye, sha er mayange se kua se kar ihyongo ga yô.
2 Gadia aluer loho u yange i tindi mbatyomov ôr la lu kwagh u bunden ga, shi hanma or u yange nana̱ per tindi shin nana̱ hemba ato cii i tsaha nan vough er tindi tese la yô,
3 a er nan ve se war, aluer se kera na ishima sha kwagh u myom u hemban cii la ga yôô? Gadia lu Ter wase je hii u pasen kwagh u myom ne ye, shi mba ve ungwa loho na la kpa ve pase se mimi u kwagh ne,
4 Aôndo kpa lu eren shiada sha mi sha uivande man akaa a kpilighyol kua ityom i ageegh kposo kposo, man sha icighan jijingi u yange na ior sha ishima na la.
5 Gadia ka mbatyomov a we tar u uumace u u lu van la sha ikyev ve ga, tar shon u se lu ôron kwagh u u la.
6 Kpa hen ijiir igen la, orgen er shiada ér: “Or ngu di nyi ve u umbur nana? Shin wan u or ngu nyi ve u we un ikyo?
7 U er un a yina sha mbatyomov kpuaa di tsô; u na un injar i iengem man icivir, shi u ver un wer a nengen sha ityom i ave a ou.
8 U gema akaa cii u wa sha ikyev* na.” Er Aôndo a we akaa cii sha ikyev na yô, tese ér kwagh môm u a we sha ikyev na ga ngu ga. Nahan kpa, hegen se mba a nenge akaa cii á lu sha ikyev na ga.
9 Kpa se mba nengen a Yesu, un u yange i er un a yina sha mbatyomov kpuaa di tsô la, hegen i na un injar i iengem man icivir, gadia a ya ican zan zan a kar kpen. A kpe sha ci u ior cii, sha erdoo u Aôndo a tesen sha mhôôn la.
10 Gadia Aôndo u akaa cii a lu sha ci na, shi i lu un a ne akaa cii a lu la, yange lu van a mbayev kpishi ken iengem. Sha nahan yô, doo kpishi er yange na Orvesen u Tamen u van ve a myom la va ya atsan, nahan kuma vough u yiman ve yô.
11 Gadia un u a lu tseghan ior la, kua mba i lu tseghan ve la cii, ter ve ngu môm, man sha ityôkyaa ne yô, kunya ngu ker un u yilan ve ér anmgbianev ga,
12 gadia a kaa ér: “Me pase iti you hen anmgbianev av; me wa icam i wuese we ken tiônnongo.”*
13 Shi a kaa ér: “Me suur sha a na.” Shi ér: “Nenge! Mo man mbayev mba kiriki mba Yehova* a nem ne.”
14 Sha nahan yô, er “mbayev mba kiriki” mbara ve lu a iyol i inyam man awambe yô, un kpa va lu a iyol i inyam man awambe, sha er una kpe, nahan una tim Diabolo, un u a lu a tahav mbu eren akaa a van a ku la yô.
15 Man sha er una pase* mba yange mciem ma kuugh kôr ve ikpan la cii, vea kera lu uikyangen ga yô.
16 Gadia ka mbatyomov jighilii a lu wasen ve ga, kpa ngu wasen ka ônov mba* Aberaham.
17 Sha nahan yô, yange gba u una hingir er “anmgbianev” nav nahan sha hanma gbenda cii, sha u una hingir pristi u vesen u zungwen mhôônom man u jighjigh sha akaa a Aôndo, sha er una na nagh ku wamen* sha ci u asorabo a ior yô.
18 Er un iyol na kpa ya ican shighe u i lu karen un la yô, ngu a fatyô u wasen mba i lu karen ve la.
Ngeren mba shin kpe
^ Zwa Grika, “u ver shin akevangahar a.”
^ Nenge Ngeren u Pasen Asember.
^ Nenge Ngeren u Pasen Asember.
^ Shin “una sagh.”
^ Zwa Grika, “vor u.”
^ Shin “nagh ku himen ior a Aôndo.”
