Mbagalatia 3:1-29
-
Atindi a kuran man jighjigh u nan (1-14)
-
Orperapera nana lu uma sha jighjigh u nan (11)
-
-
Ityendezwa i i er a Aberaham la har sha Atindi a kuran ga (15-18)
-
Kristu, wan u Aberaham (16)
-
-
Mhii u Atindi man awashima u a (19-25)
-
Ne mba ônov mba Aôndo sha ci u ne na jighjigh (26-29)
-
Ônov mba Aberaham, mba ve lu kwagh u Kristu yô (29)
-
3 Kpash! Ne Mbagalatia ne kav kwagh ga tsôô. Ka an nan bume ne nan nyer a ven ken ifer nahana? Ka ne yange i tese ne kwagh u Yesu Kristu wang ér i mande un sha kon gaa?
2 M soo u pinen ne kwagh môm* tsô: Lu sha atindi a kuran ne ngohol jijingi shinii lu sha ci u jighjigh u yange ne na kwagh u i ôr ne laa?
3 Kape ne kav kwagh ga je nee? Ne hii u eren akaa a ken jijingi,* ne gema ne mba kuren sha akaa a iyolougho?*
4 Yange ne gba yan atsan kpishi a ityôkyaa shio tsôô? M nenge mer mimi je lu sha ityôkyaa.
5 Nahan, un u a lu nan ne jijingi shi eren ityom i kpilighyol* hen atô wen la, ngu eren kwagh ne ka sha ci u ne mba kuran atindi yum shinii, ka sha ci u ne na jighjigh a kwagh u ne ongo laa?
6 Ka vough er Aberaham yange “na Yehova* jighjigh ve, i nenge un ér ngu orperapera” nahan.
7 Ne fa dedoo er i lu mba ve suur sha jighjigh u nan la ve lu ônov mba Aberaham yô.
8 Nahan er ruamabera tsenga fan er lu u Aôndo una va nenge ior mba ken akuraior ér ka mbaperapera sha ci u ve na jighjigh yô, a tsengayôôn loho u dedoo hen Aberaham ér: “Ka sha ikyev you akuraior cii aa zua a iveren ye.”
9 Nahan mba ve suur sha jighjigh u nan la mba zuan a iveren vea Aberaham imôngo, un u na jighjigh la.
10 Mba ve suur sha atindi a kuran cii mba a ifyan iyol, gadia i nger ér: “Hanma or u nan dondon akaa a i nger ken ruamabera u atindigh la cica cii ga yô, ifyan i kôr nan.”
11 Heela tseegh ga, ikyav tese wang ér, or môm kpa Aôndo nengen nan ér nan ngu orperapera sha atindi a kuran ga, sha ci u “orperapera nana lu uma sha ci u jighjigh u nan.”
12 Nahan Atindi har sha jighjigh u nan ga. Kpa i nger ér, “or u nan eren akaa ne yô, nana lu uma sha a.”
13 Kristu yam se, a due a vese ken ifyan i atindigh kera, a gema a tôô ifyan yase la sha iyol na, gadia i nger ér: “Hanma or u i mande nan sha kon cii nan ngu a ifyan iyol.”
14 Yange lu nahan sha u akuraior a̱ zua a iveren i Aberaham la sha ikyev i Kristu Yesu, sha er se ngohol jijingi u i tôndo zwa u nan la sha jighjigh u nan wase yô.
15 Anmgbianev, m ngu ôron kwagh sha inja i orumace: Er i ye ikyur i bee kera je, ka a lu or môm tseegh i ye a nan kpa, orgen môm kera bunden i̱ shin seer akaa sha mi ga.
16 Yange i er uityendezwa mban a Aberaham kua wan* na. I kaa ér, “kua ônov ou,”* inja er ka ior kpishi ga. Kpa i kaa ér, “kua wan* wou,” inja na yô ka or môm, ka Kristu je la.
17 Shi m ngu kaan mer: Atindi a yange anyom kar 430 cii ve i mase nan la vihi ikyur i Aôndo vande yan la ga, nahan ityendezwa la ngi her.
18 Gadia aluer dyako la har ka sha atindi a kuran yô, kera ka sha ityendezwa ga; nahan kpa, lu sha ityendezwa Aôndo na Aberaham i̱ ye.
19 Nahan, yange i na Atindi sha ci u nyi? Lu sha ci u ior ve̱ fa kwagh u a lu tindi u peren yô, zan zan wan* la a kar van, un u i tôndo zwa a na la; shi yange i na a sha ikyev i mbatyomov, sha uwegh ku orhimen.
20 Ka a lu or môm tseegh yô, orhimen nan lu ga, kpa Aôndo yange er ityendezwa ne un tswen.
21 Nahan Atindi nga hendan a uityendezwa mba Aôndo shinii? Mayange ga! Gadia luun er yange i na tindi u una fatyô u nan uma yô, ma i lu u or a fatyô u lun orperapera sha atindi a kuran.
22 Kpa Ruamabera gema akaa cii wa sha ikyev i isholibo, sha er mba ve ne jighjigh la vea zua a akaa a dedoo a i tende zwa u nan mba ve ne Yesu Kristu jighjigh la yô.
23 Nahan cii kpa, er kwagh u jighjigh u nan shon lu a va ga la, lu atindi lu kuran se ye; i na se lu sha ikyev i a, kpa se lu veren ashe a jighjigh u nan u lu u a va pase kwagh na la.
24 Nahan Atindi hingir oryese* wase u zan a vese hen Kristu, sha er a kaa ér se mba mbaperapera sha jighjigh u nan yô.
25 Kpa hegen u jighjigh u nan la a ve ne, se kera mba sha ikyev i oryese* ga.
26 Jighilii yô, ne cii ne mba ônov mba Aôndo, sha ci u ne na Kristu Yesu jighjigh.
27 Gadia ne mba i er ne batisema ken Kristu cii, ne haa Kristu iyol.
28 Oryuda shin Orgrika nan ngu ga, kpan shin or u i dugh nan ken kpan kera nan ngu ga, nomsoor shin kwase nan ngu ga, gadia ne cii ne mba môm ken mzough vea Kristu Yesu.
29 Shi aluer ne mba kwagh u Kristu yô, ne mba ônov* mba Aberaham jim jim, ne mba mbayandyako er i tende zwa nahan.
Ngeren mba shin kpe
^ Shin “M soo mer pasem nen kwagh ne.”
^ Zwa Grika, “ne hii ken jijingi.”
^ Shin “sha mhen u oro?”
^ Shin “eren uivande.”
^ Nenge Ngeren u Pasen Asember.
^ Zwa Grika, “vor.”
^ Zwa Grika, “ivor you.”
^ Zwa Grika, “vor.”
^ Zwa Grika, “vor.”
^ Shin “ortesen.”
^ Shin “ortesen.”
^ Zwa Grika, “vor.”
