Mateu 2:1-23
2 Yange i mar Yesu ken Betelehem u ken Yudia sha ayange a Herode* lu tor la. Tsô mbaahiriv* mbagenev mough vegher u sha Ityoughkitaregh va ken Yerusalem.
2 Ve gba va pinen ér: “Tor u Mbayuda u i mar un la ngu hana? Se nenge a ishan na zum u se lu vegher u sha Ityoughkitaregh la, nahan se va sha u va nan un icivir.”*
3 Tor Herode ungwan nahan yô, ishima za un iyol tsung, kua ior mba ken Yerusalem cii.
4 Tsô a kohol upristi mba tamen man mbangerenatindi cii imôngo, a pine ve ape lu u a mar Kristu* la.
5 Ve kaa a na ér: “Ka ken Betelehem hen Yudia, sha ci u ka kwagh u yange i nger sha ikyev i profeti je ne, ér:
6 ‘We Betelehem u ken tar u Yuda, mayange u ngu gar u hemban gban ijime ken ugomna mba Yuda ga, gadia ka ken we orhemen nana due, u nana kuran ior av Iserael ye.’”
7 Tsô Herode yila mbaahiriv mbara ken myer tôv ve vighe vighe sha u una fa shighe u ishan shon due la.
8 A tindi ve ken Betelehem, a kaa a ve ér: “Za ker nen wan la sha gbashima, ne zuan a na yô, hide va kaam nen, sha er mo kpa me za na un icivir yô.”
9 Mba ungwan kwagh u tor ôr ne yô, ve due ve gba yemen, tsô ishan shon i ve vande nengen a mi shighe u ve lu vegher u sha Ityoughkitaregh la, gba yemen ve sha hemen zan zan i za tile hen ape wan la lu la.
10 Mba nengen a ishan la yô, ve ember kpishi.
11 Mba nyer ken iyou i wan shon lu ker vea ngô na Maria la yô, ve gure inya, ve na wan la icivir. Shi ve sagh ikyav vev, ve dugh akaainjaa, ve er un iyua a mi. Lu zanaria man ferankinsensi man mire.*
12 Kpa Aôndo ta ve icin ken mnya ér ve de hidi hen Herode ga, nahan ve kar gbenda ugen ve yem tar ve.
13 Mba yemen yô, ortyom u Yehova* va ande hen Yosev ken mnya, kaa a na ér: “Mough tôô wan ne kua ngô na, yevese yem nen ken Igipiti, za lu nen ker zan zan me va kaa mer hide nen, sha ci u Herode soo u keren wan ne wuan.”
14 Nahan Yosev mough tugh tôô wan la man ngô na yem a ve ken Igipiti.
15 Za lu ker zan zan Herode kar kpen. Kwagh ne maa kure kwagh ugen u Yehova* na profeti na ôr yô, ér: “Ka ken Igipiti m yila wan wam ye.”
16 Herode nengen ér mbaahiriv mbara bume un yô, ishima vihi un tsung, nahan a na zwa i za wua mbayev mba nomso mba ken Betelehem man uharegh mba ve kase un la cii, hii sha mba lun anyom ahar hide ijime, mba anyom a ve zua sha shighe u mbaahiriv mbara pase un ér ishan shon due la.
17 Nahan kwagh u Aôndo ôr sha ikyev i profeti Yeremia la maa kure sha mi vough. A kaa ér:
18 “I ungwa imo ken Rama, mliam ma vaan man kwelegh. Rahel lu vaan ônov nav, lumun ér i sur un ishima ga, sha ci u ve kera lu ga.”
19 Herode kpen kera yô, ortyom u Yehova* ande hen Yosev ken mnya, ken Igipiti.
20 A kaa ér: “Mough tôô wan ne kua ngô na yem nen ken tar u Iserael, gadia mba yange ve lu keren u tôôn uma* u wan ne kera la, ve kpe.”
21 Tsô a mough a wan la kua ngô na ve hide ken tar u Iserael.
22 Kpa ungwan ér Arekilau tema tor sha Yudia sha ityough ki ter na Herode yô, a cia u yemen ker. Shi er Aôndo vande tan un icin ken mnya kpaa yô, a kar a yem hen haregh u Galilia.
23 A za lu hen gar ugen, i yilan ér Nasareti, sha u kuren kwagh u i ôr sha ikyev i uprofeti yô, ér: “A yilan un ér Ornasareti.”*
Ngeren mba shin kpe
^ Nenge Ngeren u Pasen Asember.
^ Shin “mbaahiriv mba tôvon sha asan a sha kwavaôndo, nahan tsengan fan akaa.”
^ Shin “guren un inya.”
^ Shin “Mesiya; U I Shigh Un Mkurem.”
^ Ferankinsensi man mire lu akaa a human doon a taver ishe. Nenge Ngeren u Pasen Asember.
^ Nenge Ngeren u Pasen Asember.
^ Nenge Ngeren u Pasen Asember.
^ Nenge Ngeren u Pasen Asember.
^ Nenge Ngeren u Pasen Asember.
^ Alaghga i zua a iti ne ken ishember i ken zwa Heberu i i gem ér “tombo” la.
