I GBA A GBAA?
Imo i Ishu i I Yer Ér Dolphin la, Ka i Er Yô
Ishu i i yer ér Dolphin la ka i er imo i due akenge kposo kposo, maa i hide i kegh ato i ungwa iov ape ikyenge la i za, i nyer la, sha er ia fa akaa a a lu hen haregh shon man er ia zende her yô. Mbasainsi hen kwagh u ishu ne, nahan mba seer varen akaa a eren tom a mi shin atô u mnger, sha er vea sôr mbamzeyol mba ikyav mbi ve vande lun a mi la mbi kanshio u been a mi yô.
Nenge ase: Gbenda u i gbe ishu ne la na yô, ka i fatyô u keren anshuuv mba ve yer shin waarawa shin atô u mnger yô, shi kwagh ne ka a wase i u fan mkposo u ishu man vande. Profesô ugen u ken Yunivasiti i Heriot-Watt, ken geri u Edinburgh, tar u Scotland, mba yer iti na ér Keith Brown, a kaa nahan ér, ishu ne ia fatyô u “fan mkposo u ikyagh ki ki lu a mngerem ma lun wang man ki lun a ma nyohon bar ken ica je kuman umita pue nahan, shi ia fa ikyagh ki lun a shogaa gayô mkurem kpaa.” Aluer mbasainsi er mashin u a lu a imba utaha la nahan a doo ve kpen kpen!
Ishu i i yer ér dolphin ne ia fatyô u pasen kwagh u a lu ken mkam atô kposo kposo ken ica je kuman umita pue nahan
Mbatôvon sha akaa time sha gbenda u ishu ne ka i er imo la, kua gbenda u i ongo la, nahan ve nôngo ér vea var akaa a eren tom nahala. Nahan ve var mashin ugen ngu a ikyav mbi kômputa ker kpelegh kpelegh. Ka ve wa mashin ne ken anar u a lihe i zulum mita môm nahan yô. Ka ve gema ve zer mashin la sha kwagh ugen u ka a lu er ka ityegh ki haan gaasi u weede akaa a mi la nahan. I er mashin ne sha gbenda u una fatyô u keren fan akaa a a lu shin tareghnyaagh shin atô u mnger a u zan ikyua a a shio. Akaa er ikyor usu shin ukyebur man upaapi nahan. Mba yange ve var akaa ne la nenge je ér a fatyô u eren tom a mi hen ikyômpeni i mkure. Aluer i er mashin u eren tom er ishu i i yer ér dolphin ne nahan vough yô, una hemba umashin mba i hila var mbara cii; shi una wase mbainjinia mba wan akaa shin mnger kpaa vea hemba fan ajiir a dedoo a wan akaa shon. Shi shighe u ma kwagh u i we shin inya a hii u vihin kpa mashin shon una fatyô u fan, aluer paapi u mkure hii u karen kwe shin a kondo mape kpa mashin shon una fa.
We u nenge nena? Gbenda u ishu ne i eren kwagh sha marami u i la tese ér yange i gba duen abu tsô shinii? Yange i gba a gba i?