Aôndo Ngu Hanma Ijiir Ciilii?

KUHWA

Mlumun u Bibilo i ne yô

Aôndo una fatyô u nengen hanma ijiir shi eren hanma kwagh u a soo hen hanma ijiir i a tsua u eren cii. (Anzaakaa 15:3; Mbaheberu 4:13) Nahan kpa, Bibilo tese ér Aôndo ngu hanma ijiir, shin ngu ken akaa cii ga. Kpa i tese ér ngu or, shi ngu a ijiir na i teman her.

Mluashe u Aôndo: Aôndo ka or u ken jijingi. (Yohane 4:24) Uumace mba nengen a na ga. (Yohane 1:18) Hanma mbampase u sha mnenge u ior ve nenge a Aôndo ker, i nger ken Bibilo cii yô ka a tese ér ngu a ijiir na kposo, i a lun her yô. Ma mpase môm tese ér ngu ken akaa, shin hanma ijiir cii ga.—Yesaia 6:1, 2; Mpase 4:2, 3, 8.
Ijiir i Aôndo i teman: Aôndo ngu sha tar u ken jijingi, u u lu kposo a akaa a a gbe se nengen a mi la cii yô. Ngu a ‘ijiir i teman sha,’ sha tar u ken jijingi la. (1 Utor 8:30) Bibilo ôr kwagh u shighe u ior mba ken jijingi ‘va tile sha ishigh ki Yehova’ yô, * nahan tese je ér Aôndo ngu a ijiir kpôô kpôô, i a tem her yô.—Yobu 1:6.

Aôndo ngu hanma ijiir ga nahan, una fatyô u nengen sha mo kpa?

Een. Kwagh u hanma or gba Aôndo ishima sha mimi. Shin er Aôndo a lu sha tar u ken jijingi nahan cii kpa, a fa hanma or shin tar u nan lu civir un sha mimi yô, shi kuran ve kpaa. (1 Utor 8:39; 2 Kroniku 16:9) Nenge ase akav a a tese ér Yehova we mba ve civir un sha mimi la ikyo yô:

Shighe u u lu eren msen yô: Yehova una ungwa msen wou hen shighe u u hii u eren la je.—2 Kroniku 18:31.
Shighe u u ishima i lu vihin we yô: “TER ngu ikyua a mba asema a vihin ve la, yem mba ve lu a ishima i zamber yô.”—Pasalmi 34:18.
Shighe u u lu fan kwagh u u er ga yô: Yehova una ‘pase u, shi una tese u gbenda’ ken Bibilo i i lu Mkaanem nam la.—Pasalmi 32:8.

Mbamtsum mba ior ve lu a mi ve ve henen ér Aôndo ngu hanma ijiir cii yô

Mtsum: Aôndo ngu ken hanma kwagh u a gbe cii.

Mimi: Aôndo tema shin tar shin hen ma ijiir igen ken akaa a a gbe se nengen a mi ne ga. (1 Utor 8:27) Ka mimi, akaa agen a Aôndo a gbe la, kua asan “[nga] pasen icivir i Aôndo.” (Pasalmi 19:1) Nahan cii kpa, Aôndo lun ken akaa a a gbe la ga, er orkperan kwagh kpa ka nan lu ken foto u nan kpera ga nahan. Nahan kpa, foto ka a ôr se kwagh u or u nan kpera un la. Kape Aôndo kpa akaa a a gbe la a pasen se “mlu Na u i nengen a mi sha ashe ga” shin aeren a na, er tahav nav nahan, kua kwaghfan man dooshima na je la.—Mbaromanu 1:20.

Mtsum: A gba u Aôndo una lu hanma ijiir cii sha er una fa akaa cii shi una seer lun a tahav yô

Mimi: Icighan jijingi u Aôndo shin tahav mbu tomov nav, ka tahav mbu Aôndo a eren kwagh a mi yô. Aôndo una fatyô u nengen shi eren nyityôkwagh hanma ijiir man sha shighe u a soo cii sha icighan jijingi na, a u lun ken or shio.—Pasalmi 139:7.

Mtsum: Pasalmi 139:8 tese ér Aôndo ngu hanma ijiir cii, sha ci u i kaa ér: “Aluer mea kôndo mea yem Sha je kpaa, U ngu shami, man aluer mea tar gambe shin Sheol kpaa, nenge, U ngu shimi.”

Mimi: Ivur Bibilo ne ngi ôron kwagh u ijiir i Aôndo a tem la ga. Ka injakwagh i ken icam. Ngi tesen ér ijiir i môm i taver Aôndo u wasen se kpa ngi ga.

^ Ikyum. 3 Bibilo tese ér Yehova ka iti i Aôndo.