Oni kere ikoto isirigin kanu aitania ikalia wok. (Awaragasia 30:8) Eebo, “igalikinitor epuesa da.” (Ekalimonokinan 7:12) Kwape luedukokina, emina araun ibore yen etiono einer nuikamunitos isirigin, konye mam inakinete isirigin ayaun ationis kodukone kus. (Ipeson 4:32) Ibusakinit luedukokina amunokina bonik nemoriata nuikamunitos isirigin luebeit kesi aitosom.

NUEBALA EBAIBULI: “Naarai ingai bo kayesi, arai ekoto aiduk etogo loeoja, mam iboikini ber aimar eketiai, ebe luejaatar edaunete?” (Luka 14:28) Eraasi ngun nuepolok noi kanu yesi aitemonokin sek eipone loitosomaet isirigin. (Amos 3:3) Aso kinerutu iboro luikotosi agwel ka isigirin imwasai ipedorete yesi aitosom. (Awaragasia 31:16) Arai da ejaas ijo isirigin lugwelet idio bore, mam ngun kitodunitos ebe ibusakinit ijo agwel. Kotam nuipedori ainac apesen. Itosom isirigin luijaatar ijo bon.—Awaragasia 21:5; 22:7.

NUIPEDORI IJO ASWAM:

• Arai ijaatar ijo isirigin luiyatakina angeset naka elap, komorutu nepepe eipone loebeitor aitosom

• Arai ekadakina isirigin, kitidisiasi ekus ebajet. Kwape anyunet, ipedori ijo aipo inyamat kon ore mere anyamenen koterin

NUEBALA EBAIBULI: “Naarai kipodo nuejok mere bon kakonyen nuka Ejakait, konye kakonyen nuka itunga da.” (2 Ikorinton 8:21) Korai loimunono keda yenowaikon kojeni nges da isirigin luidumunenei ka luitosomai ijo.

Kinerata nepepe ka yenowaikon eroko kitutubo eitosomae loisirigin luipu kotoma okale. (Awaragasia 13:10) Einer nuikamunitos isirigin ingarakini edukone araute loinapakina. Kosesenete isirigin kus, mere kwape ikasirigin, konye kwape luka okale.—1 Timoteo 5:8.

NUIPEDORI IJO ASWAM:

• Kocamanaros isirigin luibusakinit kangin idiopet aitosom tetere mam kingisi yenice

• Mam idari ationis atakanun eroko ijo inera nuikamunitos isirigin