•  Rehake Mampizilike 2

•  Harena amy ty Saontsin’Andrianagnahare 3-5

  •  Lahajaka 3

  •  Vatosoa Ara-pagnahy 4

 Famakiagne Baiboly 5

•  Fampiofagnagne amy ty Fanompoagne 6-14

  •  Naho fa Manombo-drehake 7

  •  Naho fa Miheregne Mitilike 8

  •  Naho fa Mampianatse 9

  •  Naho fa Magnazava ty Raha Inoa’o 10

  •  Lahajaka 11

  •  Hevetse Horehafegne 12

  •  Karaza ty Fitoriagne azo Atao 13

  •  Fampiasagne Video Naho Fametrahagne Boke Aman-gazete 14

•  Fiaignantika Kristiana 15-16

  •  Fianaragne Baiboly Anoe ty Fiangonagne 16

•  Rehake Famaragnagne 17

•  Rehake Fideragne Naho Torohevetse 18

•  Ty Fahareta i Anjaray 19

•  Fitiliha ty Mpiandraikitse Faritse 20

•  Heregnandro ty Havoriambey 21

•  Heregnandro ty Fahatsiarovagne 22

•  Mpiandraikitse ty Fivoriagne Miomba ty Fiaignantika Naho ty Fanompoagne 23

•  Mpitari-draharaha ty Fivoriagne Miomba ty Fiaignantika Naho ty Fanompoagne 24

•  Mpagnomey Torohevetse Mpagnampe 25

•  Kilasy Fagnampe’e 26

•  Video 27

1. Hagnampe ze mandrambe anjara iaby amy ty Fivoriagne Miomba ty Fiaignantika naho ty Fanompoagne ty toromareke toy. Toko’e hagnente ty toromareke miomba ty anjara’e amy i Fanompoagne Naho ty Fiaignantika Kristiana: Tari-dalagne Hoahy ty Fivoriagne naho amy ty toromareke toy ato ty tsikiraidraike naho fa hagnomagne ty anjara’e. Toko’e horehafegne o mpitorio iaby mba ho vognogne hanao i anjara ty mpianatse rey. Mahazo misoratse agnaragne ka ze fa mifagnosehose tsy tapake amy ty fiangonagne sady magneke ty fampianara ty Baiboly, ro miaigne mifagnarake amy ty fitsipike Kristiana. Naho misy ndaty mbe tsy mpitory faie magniry handrambe anjara amy ty fampiofagnagne, le toko’e hodinehe ty mpiandraikitse ty Fivoriagne Miomba ty Fiaignantika Naho ty Fanompoagne miarake ama’e ty fepetse takegne sady toko’e horehafegne amy i ndatỳ naho mahafeno fepetse reke. Toko’e hagnatreke eo i mpampianatse Baiboly azey (ndra ty rae’e ndra ty rene’e vavolombelogne). Ze fepetse takegne amy ze te ho mpitory tsy vita badisa avao kagne ty ho takegne ama’e.​—od toko 8 feh. 8

2. Minitra raike. Isan-keregnandro naho fa vita i hiray naho i vavakey, le hirehake ty raha hotrea amy i fandaharagney i mpitari-draharahay. Toko’e hifantoke amy ze hevetse lahibey hahasoa i fiangonagney ty raha rehafe’e.

 3. Lahajaka: Folo minitra. Misy foto-kevetse naho hevetse lahibey roe ndra telo ty meigne amy i Tari-dalagne Hoahy ty Fiaignantika Naho ty Fanompoagney ao. Androanavi-pagnahy ndra mpagnampe amy ty fiangonagne mahay ty hanao o lahajaka iohoe. Naho boke vaovao ty vakiegne amy i famakiagne Baibolỳ, le hisy video fampidiragne aze halefa. Azo i mpizakay atao ty mampifandrambe i videoy amy i foto-kevetsey. Faie toko’e hatao’e azo antoke tie voarehake iaby ze hevetse lahibey amy i tari-dalagney ao. Naho mbe ampe i leray, le toko’e hampiasae’e soa i sarey, mba hagnazavagne ty hevetse amy i anjaray. Afake mirehake fagnazavagne boake amy ty loharanon-kevetse hafa ka reke mba hagnamafesagne i hevetse hazavae’ey.

 4. Vatosoa Ara-pagnahy: Folo minitra. Tsy misy fampidiragne ndra famaragnagne ty anjara toy fa le avy le fagnonteneagne naho vale’e. Androanavi-pagnahy ndra mpagnampe amy ty fiangonagne mahay ty manao aze. Toko’e havanta’e amy i mpagnatrekey i fagnonteneagne roe rey. Afake manapa-kevetse ty hamaky ndra tsy hamaky ty andinin-teny tognonegne eo reke. Toko’e ho 30 segondra ndra latsake ty toin-dreha i mpandrambe anjara rey.

 5. Famakiagne Baiboly: Efatse minitra. Lahilahy ty manao ty anjara ty mpianatse toy. Le avy le hamaky i anjara nimeigne azey reke, fa tsy hanao fampidiragne ndra famaragnagne. Hifantoke amy ty hagnampeagne i mpianatsey mba hamaky teny tsy misy diso, mora azo, misosa soa, magnamafe hevetse, misy fagnovaovam-peo, hanao fitofàgne mete soa sady hoe mirehake andavanandro i mpitari-draharahay. Va’e ho lava ndra ho boribory ty anjara famakiagne Baiboly. Mila atao ty mpiandraikitse ty Fivoriagne Miomba ty Fiaignantika Naho ty Fanompoagne azo antoke fa mifagnarake amy ty fahaia i mpianatsey ty anjara meagne aze.

6. Dime ambifolo minitra. Natao mba hahavy o mpitorio hanao fagnazaran-tegna amy ty fanompoagne naho hagnasoa ty fahaia’e mirehake naho mitory vaho mampianatse ty fizaràgne toy. Naho ilaegne, le afake omeagne anjara ty mpianatse o androanavi-pagnahio. Toko’e hagnorike soa ty lesogne takegne ama’e, voasoratse agnila ty toromareke mahakasike i anjara’ey amy ty Fanompoagne Naho ty Fiaignantika Kristiana: Tari-dalagne Hoahy ty Fivoriagne i mpianatsey. Va’e ho boake amy ty bokekele tihoe Hasoa zay ndra tihoe Teavo o Ndatio. Toko’e handineke soa naho hampihatse ze lesogne takegne ama’e ty mpianatse tsikiraidraike. Kindraike, le va’e hisy anjara hatao fiharoagne midineke. Androanavi-pagnahy ndra mpagnampe amy ty fiangonagne mahay ty toko’e hanao ze anjara zay.​—Henteo ty  fehentsoratse 15 naho te hagnente ty fomba fanoagne ty anjara misy fiharoagne midineke rehe.

 7. Naho fa Manombo-drehake: Lahilahy ndra ampela ty manao ty anjara ty mpianatse toy. Toko’e sambe lahilahy ndra sambe ampela ty manao aze ndra ndaty agnisa ty keleia’e. Afake mitoboke ndra mitsangagne i mpianatsey naho i mpagnampe azey.​—Naho te hahatrea fagnazavagne fagnampe’e miomba ty raha horehafegne naho ty karaza ty fitoriagne azo atao amy ty anjara toy rehe, le henteo ty  fehentsoratse 12 naho  13.

 8. Naho fa Miheregne Mitilike: Lahilahy ndra ampela ty manao ty anjara ty mpianatse toy. Toko’e sambe lahilahy ndra sambe ampela ty manao aze ndra ndaty agnisa ty keleia’e. (km 5/97 p. 2.) Afake mitoboke ndra mitsangagne i mpianatsey naho i mpagnampe azey. Toko’e hatoro i mpianatsey tie inogne ty toko’e horehafegne naho fa miheregne mitilike ty ndaty fa nifampirehake tama’e reke.​—Naho te hahatrea fagnazavagne fagnampe’e miomba ty raha horehafegne naho ty karaza ty fitoriagne azo atao amy ty anjara toy rehe, le henteo ty  fehentsoratse 12 naho  13.

 9. Naho fa Mampianatse: Lahilahy ndra ampela ty manao ty anjara toy. Toko’e sambe lahilahy ndra sambe ampela ty manao aze ndra ndaty agnisa ty keleia’e. (km 5/97 p. 2). Afake mitoboke ndra mitsangagne i mpianatsey naho i mpagnampe azey. Toko’e hampiseho ampaha’e amy ty fampianaragne Baiboly ndaty fa mandroso ty anjara toy. Tsy ilaegne ty manao rehake fampidiragne ndra famaragnagne, naho ohatse tsy agnisa ty lesogne takegne amy i mpianatsey zay. Tsy voatere hovakiegne iaby ka ze fehentsoratse amy i loharanon-kevetsey ao, ndra tie misy fotoagne aza azo atao ty manao izay.

 10. Naho fa Magnazava ty Raha Inoa’o: Naho lahajaka ty anjara ty mpianatse toy, le toko’e ho lahilahy ty manao aze. Faie naho fampisehoagne reke, le azo ty lahilahy ndra ty ampela atao. Toko’e sambe lahilahy ndra sambe ampela ty manao aze ndra ndaty agnisa ty keleia’e. I loharanon-kevetsey ty hampiasae i mpianatsey naho fa mamale i fagnonteneagne amy i foto-kevetsey reke. Toko’e hatao’e mazava soa ty vale’e sady toko’e hahay hanahatsahatse reke naho fa manao aze. I mpianatsey avao ty hifily tie hotognone’e vao i loharanon-kevetsey naho fa manao i anjara’ey reke.

 11. Lahajaka: Lahilahy ty toko’e hanao ty anjara ty mpianatse toy sady toko’e hatao’e manahake ty lahajaka hoahy i fiangonagney ty fanoa’e aze. Naho mioregne amy ty fagnazavagne A amy ty bokekele Teavo o Ndatio ty lahajaka toy, le toko’e hatoro i mpianatsey mazava soa tie akore ty azo ampiasaegne o andine’e reo amy i fanompoagney ey. Afake hazavae’e zao ohatse tie naho fa manao akore ro azo ampiasaegne i andine’ey, ino ty tea’e horehafegne, le akore ty hagnazavagne aze amo o ndatio. Naho mioregne amy ty hevetse boake amy ty lesogne raike amy ty bokekele Teavo o Ndatio i lahajakay, le toko’e hifantoke amy ty fomba hampiharagne i hevetsey amy i fanompoagney ey i mpianatsey. Afake asongadi’e ty ohatse rehafegne amy ty hevetse voaloha’e amy i lesogney ndra ty andine’e fagnampe’e amy i lesogney ao naho ilaegne zay.

   12. Hevetse Horehafegne: Azo ampiharegne amy ty anjara ty mpianatse manao tihoe “Naho fa Manombo-drehake” naho tihoe “Naho fa Miheregne Mitilike” ty toromareke amy ty fehentsoratse toy naho ty manonjohy itoy. Naho tsy misy fagnamarehagne, le ty hirehake hamarenagne mahaliagne i ndaty mifampirehake ama’ey boake agnate Baiboly ao naho hanao ze hitohiza i rehakey amy ty afara ty tanjo i mpianatsey. Toko’e hifily ze foto-kevetse mifagnarake amy ze raha misy sady mahaliagne ty ndaty an-toeragneo i mpianatsey. I mpianatsey avao ty hifily tie hagnomey gazete ndra hanoro video boake amy ty Fitaovagne Fampianaragne vao reke. Tsy toko’e hatao tsianjery i fifampirehafagney fa toko’e hampiseho fahaiagne mifampirehake i mpianatsey. Ohatse mipay ze hahasoa i ndatỳ naho atao manahake ty mifampirehake andavanandro i fifampirehafagney.

   13. Karaza ty Fitoriagne azo Atao: Toko’e hampifagnarahe i mpianatsey amy ty raha misy an-toeragneo i anjaray. Ohatse:

1.  (1) Isan-tragno: Tafilitse amy ty fitoriagne isan-tragno toy tihoe mifampirehake mivantagne amy i ndaty itoriagney ndra mitory an-telefony ndra ka fitoriagne an-taratasy naho ty fiheregnagne mitilike ty ndaty raike nitoriagne tamy ty fitoriagne isan-tragno.

2.  (2) Tsy Mifamotoagne: Ty karazam-pitoriagne raike toy, le mampiseho ty fahaiagne magnararaotse ty fahafahagne misy mba hahavy ty fifampirehafagne tsotra hanjare fitoriagne. Agnisa izay ka ty firehafagne hevetse boake agnate Soratse Masigne ao amy ty ndaty mifankatrea ama’o am-piasagne agne, an-dakilasy agne, amy ty mpiharo tanàgne, agnate ty bisy fandehana o ndatio ndra naho fa manao ty tolon-drahantikagne isan’andro tikagne.

3.  (3) Amy ty Toeragne Maro Ndaty: Tafilitse amy ty fitoriagne raike toy ty fanoagne fampiratiagne, fitoriagne amy ty toeragne fivarotagne, fitoriagne an-dalagne, fitoriagne amy ty toeragne fitsangatsanganagne, fitoriagne amy ty toeragne fijanogna ty tomabile ndra amy ze toeragne ahatreavagne ndaty.

 14. Fampiasagne Video Naho Fametrahagne Boke Aman-gazete: Afake mametrake boke aman-gazete ndra manoro video i ndatỳ i mpianatsey arakarake ty raha misy. Naho misy video ty anjara ty mpianatse raike ndra ka mifily ty hanoro video reke, le toko’e horehafe’e naho hiaraha’e midineke amy i ndatỳ i videoy faie tsy halefa’e.

15. Hisy anjara 15 minitra ty afara i hiray. Va’e ho anjara raike avao zay ndra hizara roe. Natao mba hagnampeagne i mpagnatrekey hampihatse ty Saontsin’Andrianagnahare o fizaràgne iohoe. Androanavi-pagnahy ndra mpagnampe amy ty fiangonagne mahay ty hanao aze naho tsy misy fagnamarehagne manokagne. Faie androanavi-pagnahy avao ro toko’e hanao ty raha ilae ty fiangonagne. Naho fiharoagne midineke i anjaray, le afake mametrake fagnonteneagne fagnampe’e i mpizakay ankoatse i fagnonteneagne fa aoy. Toko’e hatao’e boribory ty rehake fampidiragne atao’e, amy izay reke hanagne fotoagne hirehafagne i hevetse lahibey rey soa sady mba ho afake handrambe anjara soa ka i mpagnatrekey. Naho ohatse misy fagnadikadignagne i anjaray, le soa naho mandeha aloha ey i ndatỳ, fa tsy mijanogne ampitoboha’e eo naho ohatse mete ty hanoagne izay.

  16. Fianaragne Baiboly Anoe ty Fiangonagne: Telopolo minitra. Androanavi-pagnahy mahay ro toko’e hotendregne hanao ty anjara toy. (Faie azo ampiasaegne avao ka ty mpagnampe amy ty fiangonagne mahay naho tsy ampe o androanavi-pagnahio.) Toko’e hodinehe ty fitambaran’androanavi-pagnahy tie ia ty mahafeno fepetse hitarike ty Fianaragne Baiboly Anoe ty Fiangonagne. Toko’e hitarike soa i fianaragney ze neké o androanavi-pagnahio, toko’e hagnaja soa i leray, hagnambake soa ze andinin-teny tena misy hevetse lahibey sady hagnampe i mpagnatrekey hahatrea ty fomba hampiharagne i hevetse dinehegney. Hahatrea toro lalagne soa ze nekegne mba hitarike ty fianaragne toy naho mandineke soa indraike ty toromareke miomba ty fomba fitarihagne anjara misy fiharoagne midineke. (w23.04 p. 24 efajoro) Tsy misy anto’e toko’e hagnalavagne i fianaragney naho ohatse fa vita hatrake amy ty fara’e i raha natao hianaragne amy i heregnandroy. Toko’e ho mpitarike naho mpamaky teny sambe hafa ro hampiasaegne isan-keregnandro, naho mete. Naho mirehake i mpitari-draharaha ty Fivoriagne Miomba ty Fiaignantika Naho ty Fanompoagney fa toko’e hohafohezegne i fianaragney, le tsy maintsy magnente ty fomba azo hagnafohezagne i fianaragney i mpitarikey. Va’e ho azo’e atao ty tsy hampamaky ty fehentsoratse ila’e.

17. Telo minitra. Hamintigne hevetse mahasoa boake amy i fivoriagney i mpitari-draharaha ty Fivoriagne Miomba ty Fiaignantika Naho ty Fanompoagney. Toko’e horehafe’e ka ty raha ila’e hianaragne amy ty heregnandro magnarake. Azo’e tognonegne ka ty agnara ze mpianatse handrambe anjara amy ty heregnandro magnarake naho mbe ampe i leray. Naho tsy misy toromareke manokagne, le amy i rehake famaragnagney ty toko’e hanoa i mpitari-draharahay ty fitaliliagne mila atao, ndra hamakia’e ze taratasy toko’e hovakiegne amy i fiangonagney. Tsy toko’e hatalily amy i polipitray ey ze fandaharagne mahazatse, ohatse, fandaharagne miomba ty fanompoagne naho ty fagnaliovagne, fa toko’e hapetake amy i tabilò misy fitaliliagney ey. Naho tsy ho vita agnate i 3 minitray ze fitaliliagne ndra ze taratasy toko’e ho vakiegne, le toko’e hampanoe i mpitari-draharahay fohe, ty anjara ze managne anjara amy i Fiaignantika Kristianay. (Henteo ty  fehentsoratse 16 naho  19.) Faragnagne amy ty hira naho ty vavake i fivoriagney.

18. Managne minitra raike eo ho eo i mpitari-draharaha ty Fivoriagne Miomba ty Fiaignantika naho ty Fanompoagney, isake tie vita ty tsikiraidraike amy ty anjara atao i mpianatse rey, mba hideragne naho hagnomeagne torohevetse mioregne amy ty lesogne nasaegne nampihare i mpianatsey. Tsy le avy le hirehake ty lesogne hampihare i mpianatsey reke naho fa mampizilike i hanao anjaray. Azo’e tognonegne i lesogney naho fa vita i anjaray sady naho fa boake nanao rehake fideragne mete soa reke. Toko’e hohazavae’e tie nagnino ro nimete soa ty nanoa i mpianatsey aze, ndra hohazavae’e aman-kasoa fagnahy tie ino ty mbe toko’e hohasoae i mpianatsey amy i lesogney, le akore ty fomba hanoa’e izay. Afake mirehake raha hafa boake amy i anjaray ka reke naho trea tie mahasoa i mpianatsey ndra i mpagnatrekey. Azo’e meagne torohevetse mitokagne mahakasike i lesogne nampihare’ey ndra lesogne hafa mioregne amy ty bokekele Teavo o Ndatio, ndra amy ty bokekele Hasoao ndra amy ty boke Sekolin’ny Fanompoana ao i mpianatsey. Azo’e atao afara i fivoriagney zay ndra amy ty fotoagne hafa.​—Henteo ty  fehentsoratse 19,  24 naho  25 mba hahatreava’o fagnazavagne fagnampe’e miomba ty andraiky ty mpitari-draharaha ty Fivoriagne Miomba ty Fiaignantika Naho ty Fanompoagne naho ty andraiky ty mpagnomey torohevetse mpagnampe.

19. Tsy toko’e hihoatse ty lera ty anjara tsikiraidraike, agnisa izay ty fagnamareha ty mpitari-draharaha ty fivoriagne. Ndra tie voafaritse soa aza ty fahareta ty anjara amy ty Fanompoagne Naho ty Fiaignantika Kristiana: Tari-dalagne Hoahy ty Fivoriagne, le tsy misy anto’e mbe toko’e hirehafagne fagnazavagne fagnampe’e hafa mba hahafeno i leray naho ohatse vita aloha i fotoagne fa tinondroy reke. Naho mihoatse ty lera ty mpanao anjara ila’e, le toko’e hagnomey torohevetse aze mitokagne i mpitari-draharahay ndra i mpagnomey torohevetse mpagnampey. (Henteo ty  fehentsoratse 24 naho  25.) Lera raike naho 45 minitra ty fahareta i fivoriagney iaby, agnate izay ty hira naho ty vavake.

20. Naho misy mpiandraikitse faritse mitilike i fiangonagney, le toko’e hampagnorihegne ze amy i tari-dalagney ao avao i fivoriagney. Faie hosoloagne ty lahajaka 30 minitra atao i mpiandraikitse faritsey ty Fianaragne Baiboly Anoe ty Fiangonagne amy ty fizaràgne tihoe Fiaignantika Kristiana. Hamintigne i fandaharagney naho hirehake ty fandaharagne amy ty heregnandro magnarake sady hirehake ze fitaliliagne toko’e hatao hey i mpitari-draharahay aloha ty hanjiliha’e i mpiandraikitse faritsey. Hofaragna i mpiandraikitse faritsey amy ty hira fa nomane’e i fandaharagney naho fa vita ty lahajaka atao’e. Afake manasa rahalahy raike hafa reke mba hamaragne aze amy ty vavake. Tsy toko’e hisy fivoriagne hatao amy ty efetse hafa agne naho fa mitilike i mpiandraikitse faritsey. Tsy toko’e hiova amy ty fandaharam-pivoriagne mahazatse aze ty antoko mpitory ndra tie tilihe ty mpiandraikitse faritse ty fiangonagne mpanohagne aze. Faie toko’e hiharo raike amy i fiangonagney ao reke naho fa manao ty lahajaka miomba ty fanompoagne i mpiandraikitse faritsey.

21. Tsy hisy fivoriagne atao amy ty heregnandro ty havoriambey faritse ndra vondrom-paritse. Toko’e hotiahivegne i fiangonagney mba hanao fianaragne raike ndra handineke ty raha natao hianaragne amy heregnandroy amy ty fotoam-pivavaha ty keleia iareo.

22. Tsy toko’e hisy Fivoriagne Miomba ty Fiaignantika naho ty Fanompoagne atao naho ohatse andavanandro i Fahatsiarovagney.

23. Androanavi-pagnahy raike finily o androanavi-pagnahio ty ho mpiandraikitse ty Fivoriagne Miomba ty Fiaignantika Naho ty Fanompoagne. Atao’e voalamigne soa mifagnarake amy ty toromareke toy i fivoriagney. Toko’e hifampirehake soa amy ty mpagnomey torohevetse mpagnampe reke. Toko’e le avy le halami’e ty anjara ty mpianatse agnate ty roe volagne, naho vaho voarae’e i Tari-dalagney. Agnisa izay ty mpandrambe anjara tsikiraidraike naho ty mpitari-draharaha amy ty fivoriagne andavanandro neké ty fitambaran’androanavi-pagnahy fa tsy ty mpianatse avao. (Henteo ty  fehentsoratse 3-16 naho  24). Naho fa hanendre mpianatse, le toko’e hodinehe’e ty tao’e, ty raha hai’e vaho ty fahaia’e mirehake. Toko’e hanao hoe izay avao ka reke naho fa manendre ty rahalahy hanao anjara amy ty fandaharagne hafa amy i fivoriagney. Toko’e hozarae’e telo heregnandro mialoha fara fahatara’e, ty anjara tsikiraidraike, le ty taratasy Anjara amy ty Fivoriagne Miomba ty Fiaignantika Naho ty Fanompoagne (S-89) ro hampiasae’e naho fa magnomey anjara ty mpianatse. Toko’e atao ty mpiandraikitse ty Fivoriagne Miomba ty Fiaignantika Naho ty Fanompoagne azo antoke fa tafilitse agnate i tabilò misy i fandaharam-pivoriagney ao ty mpandrambe anjara tsikiraidraike. Azo ty fitambara o androanavi-pagnahio atao ty manendre androanavi-pagnahy raike ndra mpagnampe amy ty fiangonagne mba hagnampe aze. Faie androanavi-pagnahy avao ty hanendre ze rahalahy hanao ty anjara hafa ankoatse ty mpianatse.

24. Androanavi-pagnahy raike ty hitari-draharaha amy ty Fivoriagne Miomba ty Fiaignantika Naho ty Fanompoagne isan-keregnandro. (Azo tendregne ho mpitari-draharaha ty mpagnampe amy ty fiangonagne mahay, naho ilaegne, naho ohatse tsy ampe ty androanavi-pagnahy.) Hagnomagne rehake mampizilike naho famaragnagne reke. Ireke ka ty mampizilike i anjaray iaby, sady va’e mbe hanao anjara hafa reke naho tsy ampe o androanavi-pagnahio, agnisa izay ty anjara misy video tsisy fiharoagne midineke. Tsy toko’e hisy fagnazavagne maro ty amo o fizaràgne io. O androanavi-pagnahio ro handineke tie ia iaby ty androanavi-pagnahy mahafeno fepetse ho mpitari-draharaha. O androanavi-pagnahy mahafeno fepetse reo ro hifandimbe hitarike i fivoriagney isan-keregnandro. Afake mitari-draharaha mateteke noho ty androanavi-pagnahy hafa mahafeno fepetse, ty mpiandraikitse ty Fivoriagne Miomba ty Fiaignantika Naho ty Fanompoagne, faie miankigne amy ty raha misy an-toeragne eo avao. Naho mahafeno fepetse hitarike Fianaragne Baiboly ty androanavi-pagnahy raike, le fa mahafeno fepetse ho mpitari-draharaha ty fivoriagne ka. Ty hanao rehake fideragne amy ty fo naho hagnomey torohevetse aman-katea i mpianatse rey ty lignisagne amy i mpitari-draharahay. I mpitari-draharaharay ka ty manao ze hahavy i fivoriagney ho vita ara-potoagne. (Henteo ty  fehentsoratse 17 naho  19.) Azo ty mpitari-draharaha atao ty mampiasa mikrô misy tombo’e hafa, amy izay le avy le mamonje ty toera’e amy i polipitray eo i rahalahy hanao i anjaraỳ naho fa mampizilike aze reke. Azo isiagne seza naho latabatse ka ty amboney, amy izay mipetrake eo i mpitari-draharahay amy ty anjara famakiagne Baiboly naho amy ty Fampiofagnagne amy ty Fanompoagne. Mitsitsy fotoagne ty fanoagne izay.

25. Soa naho androanavi-pagnahy mahay manao lahajaka ty manao aze. Hagnomey torohevetse mitokagne ty androanavi-pagnahy naho ty mpagnampe amy ty fiangonagne miomba ty anjara atao iareo reke. Agnisa izay ty anjara amy ty Fivoriagne Miomba ty Fiaignantika Naho ty Fanompoagne, lahajaka hoahy ty ndaty maro, fitarihagne ndra famakian-teny amy ty Fianaragne Fitalakesan-davitse ndra Fianaragne Baiboly Anoe ty Fiangonagne. (Henteo ty  fehentsoratse 19.) Azo soloagne isan-taogne ty manao o andraikitse iohoe naho maro ty androanavi-pagnahy mahay manao lahajaka naho mampianatse. Tsy voatere hagnomey torohevetse avao reke, isake tie boake nanao anjara o rahalahio.

26. Azo atao ty magnisy kilasy fagnampe’e naho maro i mpianatsey. Toko’e hisy mpagnomey torohevetse mahay hitarike aze, le soa naho androanavi-pagnahy ty manao izay. Faie azo tendregne avao ka ty mpagnampe amy ty fiangonagne tena mahay. Ty fitambaran’androanavi-pagnahy ro handineke tie ia ro hitarike io naho tihoe toko’e hifandimbezagne vao sa tsy toko’e. Ty fomba fiasa rehafe ty  fehentsoratse 18 ro toko’e horihe i mpagnomey torohevetsey. Naho misy kilasy fagnampe’e, le ampandehanegne amy i efetse fagnampe’ey agne i mpianatse rey, afara tihoe Vatosoa Ara-pagnahy, amy ty fizaràgne tihoe Harena amy ty Saontsin’Andrianagnahare. Naho fa vita ty anjara i mpianatse fara’ey le toko’e hiarake amy i fiangonagney indraike iareo.

27. Hisy video voaomagne hampiasaegne ty amy ty fivoriagne toy. Azo alaegne amy ty alala ty programa tihoe JW Library® i video rey, sady azo ampiasaegne amy ty fitaovagne elektronike isan-karaza’e.

© 2023 Watch Tower Bible and Tract Society of Pennsylvania

S-38-TND 11/23