Tsy toko tsy forohagne ty vola lany amo o alio.

•   “Tamy i taon-dasay, le vola 2,2 tapetrisa tapetrisa dolara ty nilanie ty fanjakagne magneran-tane mba hampiasaegne amo o alio.”​—The Washington Post, tamy 13 Fevrie 2024.

 Faie mbe misy voka’e hafa ka o alio fa tsy tihoe mandany vola avao. Eretsereto zao ohatse i aly a Ukraine agney:

•   Maramila. Misy manam-pahaiagne mirehake fa tagnate ze roe toagne nisia i alỳ zay, le fa hahatratse hatrake amy ty 500 000 ty isa ty maramila nimate ndra naratse.

•   Ndaty Tsotra. Rehafe ty Firenena Mikambagne fa ndaty tsotra mahery ty 28 000 ty nimate ndra naratse. Le izao ty nirehafe ty manam-pahefagne ambone boake amo o fikambanagne iohoe ao: “Tena tsy fantatse tie fiaigna o ndaty fire ty poteke tanterake noho ty fisia o aly iohoe.” a

 Ndaty maro ka ty mijale noho ty fisia ty aly magneran-tane.

•   Rehafe ty tatetse tamy Septambra 2023 fa niiake 114 tapetrisa ty ndaty nafindra toeragne noho ty aly naho ty hampiarotegne magneran-tane.

•   Ty ndaty nitratse ty hakere ka le niiake 783 tapetrisa. “Mbe o alio avao ka ty mahavy o hakeregneo. Ty 70 isan-jato ty ndaty tratse o hakeregneo, le mateteke ro amy ty toeragne misy aly naho hampiarotegne ty misy aze.”​—World Food Programme.

 Mbe hisy fotoagne vao ho foagne o alio? Afake ty hitamà vao tika tie hiadagne o ndatio? Tsy hisy ndaty hahantra sasa vao ty afarafara ao? Le ho maro ka vao o hanegneo tie amy izay sady sambe hankamamy ty raha nambole’e o ndatio? Ino ty rehafe ty Baiboly?

 Fa rineha ty Baiboly mialoha fa hisy aly magneran-tane. Oharegne amo o mpitingitse sovalao zay.

•   “Le nisy sovala hafa niakatse, le sovala mena manahake o afò. Sady i nitingitse azey nengagne hagnafake ty filaminagne an-tane etoy mba hifamonoa o ndatio sady nimeagne mesabey reke.”​—Apokalypsy 6:4.

 Mbe misy mpitingitse sovala roe hafa ka ty afara o mpitingitse sovala iohoe ao. (Apokalypsy 6:5-8) Mipay fagnazavagne fagnampe’e miomba o faminania ty Baiboly iohoe vao rehe? Tea’o ho fantatse ka vao tie nagnino tika ro mino fa tanterake amo o androntikagne zao o faminaniagne iohoe? Naho tea’o ty hahafantatse ze raha rey zay, le vakio ty lahatsoratse tihoe “Iza Ireo Mpitaingin-tsoavaly Efatra?”

 Tsy ampiasaegne amo o alio sasa o harenao naho fa afarafara ao. Faie tsy o ndatio ty hahavita hampisy izay. Izao ty rehafe ty Baiboly:

•   “Mampijanogne aly amy ze kila tane” ty Andrianagnahare.​—Salamo 46:9.

•   Hamoagne ty voka-draty o alio ty Andrianagnahare. “Hofafa’e ze ranomaso amy ty maso iareo, fa tsy hisy sasa ty fate, ty alahelo ndra ty toreo ndra ty fanaintaignagne, fa tsy eo iaby ty raha taloha.”​—Apokalypsy 21:4.

•   Magnomey toky ty Andrianagnahare fa hiadagne ze kila ndaty. “Hisy fiadanagne ty amy ty toeragne misy o vahoakò. Tena milamigne soa sady tsy mampatahotse o toeragne iohoe.”​—Isaia 32:18.

 Rehafe ty faminaniagne amy Baiboly ao fa ty aly naho ty raha misy amy izao, le mampiseho fa tsy ho ela le hiadagne o ndatio.

 Ino moa ty raha hataon’Agnahare mba hisia ze fiadanagne magneran-tane zay? I Fanjakà’e an-dagnitse agney ty hampiasae’e mba hanao izay. (Matio 6:10) Naho tea’o ho fantatse ty miomba o fanjakagne iohoe naho ty raha hatao’e, le henteo ty video tihoe Inogne o Fanjakàn’Andrianagnahare Zao?