MIFOHAZA! Nim. 2 2019
Raha Enegne Mila Ampianaregne o Ajajao
Tea’o hanao akore ty ana’o naho fa bey?
Mahay mifehe tegna
Miambane
Tsy mora kivy
Mahay mandrambe andraikitse
Matotse
Manao ty maregne
Tsy le avy le hanagne o toetse reo ty ana’o fa mila ampianare’o.
Hirehake raha enegne toko’e hampianare’o ty ana’o ty gazete toy. Izay ty hagnampe aze naho fa bey reke.
Mahay Mifehe Tegna
Nagnino ro tena ilaegne tihoe mahay mifehe tegna?
Miambane
Naho ampianare’o hiambane ty ana’o, le hagnampe aze amy ty fiaigna’e manomboke amy izao zay hatrake amy ty hoavy.
Tsy Mora Kivy
Naho mikezake tsy ho mora kivy o ajajao ndra tie mbe kedekede, le hahavita hiatreke olagne reke naho fa bey.
Mandrambe Andraikitse
Fire taogne ty ndaty raike ro mila ampianaregne mandrambe andraikitse? Amy ie mbe kedey vao sa naho fa bey?
Miana-draha Boake amy ty Ndaty Bey
Mila tari-dalagne o ajajao. Ia ty afake magnomey izay ho aze?
Managne Toetse Soa
Hanjare ndaty bey matotse ty ana’o naho fa ampianare’o manomboke amy ireke mbe kedey mba hahay hagnambake ty soa naho ty raty.
Afake Magnampe Azo Io
Mipay torohevetse ka o rae aman-dreneo. Naho mipay fagnazavagne fagnampe’e, le midira amy jw.org/tdx ao.
