FAGNONTENEAGNE 9
Toko’e Hino ty Evolisiona vao Raho?
INO TY HATAO’O?
Eretsereto zao: Nino ty Mosa amparake izay fa misy ty Andrianagnahare sady namorogne ze kila raha. Faie nizizo ty ramosé mampianatse siansa iareo fa misy vata’e ty evolisiona sady misy porofo magnamaregne izay naho henteagne ty raha nitrea o mpikarokeo. Natahotse ty Mosa tie hisy hihevetse aze minegne naho tsy mino izay reke. Hoe reke: ‘O mpikarokeo aza mahatrea tie maregne vata’e o evolisionao, izaho ro ia naho mbe handietse izay?’
A ihe? Hino vao rehe fa maregne o evolisionao, fa izay ty ampianaregne an-dakilasy agne?
MANDINEHA SOA HEY!
Naho mialy hevetse miomba ty evolisiona ohatse o ndatio, le sambe mirehake ty heve’e, faie tsy fanta’e iaby ty anto’e mahavy iareo mino izay.
-
Maro ty ndaty mino fa nisy namorogne ze kila raha satria izay ty nampianaregne aze tam-piangonagne agne.
-
Misy ka mino miomba ty evolitiona, satria izay ty nampianaregne iareo tan-dakilasy agne.
FAGNONTENEAGNE ENEGNE TOKO’E HODINEHEGNE
Hoe ty Baiboly: “Sambe nisy namboatse ze kila tragno, faie Andrianagnahare ty namboatse ze kila raha iaby.” (Hebreo 3:4) Azo inoagne vao izay?
Mitovy amy ty mirehake tihoe tsy nisy namboatse aze o tragnò ty firehafagne tihoe tsy nisy Namorogne ze kila raha
MISY MIREHAKE TIE: Nisy raha nipoake tampoke, le izay nampisy ze kila raha.
1. Ia ndra ino ty nahavy i rahay hipoake?
2. Aia ty mba azo ekegne: Tihoe boake amy ty tsy misy ze kila raha, sa boake ama o ndaty raike?
MISY MIREHAKE TIE: Boake amy ty biby o ndatio.
3. Naho toe boake amy ty biby vata’e o ndatio, ohatse boake amy ty rajako, le ino ty anto’e mahavy o ndatio hahira-tsaigne mihoatse o rajakò?
4. Nagnino ndra ty raha managnaigne ‘fara’e kedekede’ ro bey pitsopitso’e?
MISY MIREHAKE TIE: Fa voaporofo tie maregne ty evolitiona.
5. Managne porofo vao reke mba hagnamarena’e izay?
6. Fire ty ndaty magneke tie maregne ty evolisiona satria nirehafegne tie mino izay iaby ty ndaty mahay raha?
“Naho fa mandeha agn’ala agne rehe, le va’e hahatrea tragno fanjaka. Hirehake vao rehe tie mba hatae nahay nitonta itoagneo ie le nahavita tragno fanjaka hoe itoio! Azo antoke fa tsy hirehake hoe izay rehe. Ino areke ty anto’e hinoagne fa nisy ho aze avao amy izao fa tsy nisy namorogne ze kila raha?”—Julia.
“Eretsereto tie misy ndaty mirehake ama’o tie nipoake i fitaovagne fanoagne pirintỳ, le niparitake amy i tragnoy i rano mainte’ey, avy eo nanjare diksionera. Hino izay vao rehe?”—Gwen.
INO TY INOAGNE AN’ANDRIANAGNAHARE?
Hoe ty Baiboly: ‘Ampiasao ty sai’areo.’ (Romanina 12:1) Ty dika izay, ty finoa’o an’Andrianagnahare tsy toko’e ho:
-
FIHETSEHAM-PO AVAO (Hoe mahatsapa avao raho tie misy ze o Andrianagnahare zao)
-
FAGNORIHAGNE NDATY (Mpivavake ty mpiharo tanàgne amako)
-
SINERE (Tineza ty rae aman-dreneko mba hino an’Andrianagnahare raho)
Toko’e hanagne porofo maregne soa miomba ty raha inoa’o rehe.
“Naho fa nitsanogne ty fagnazavà i ramosey miomba ty vatantikagne raho, le rese lahatse fa misy vata’e ty Andrianagnahare. Sambe managne ty fiasa’e ty raha agnate ty vatantikagne ao, ndra ty kede ama’e ndra ty bey ama’e. Faie tsy fantantikagne ty fiasa iareo. Miambake vata’e ty fomba fiasa ty vatantikagne!”—Teresa.
“Naho fa mahatrea tragno bey, sambo vaho tognabile raho, le mieretseretse tie: ‘Ia koahe ty namboatse itoagneo?’ Tsy maintsy ho ndaty mahay raha vaho izay mahavita tognabile. Misy pitsopitson-draha maro ty agnate ao, le izay ty mahavy aze handeha soa. O tognabileo aza nisy namboatse, somandrake fa itika ndaty.”—Richard.
“Arakarake ty ianarako miomba ty siansa, ty ahatreavako fa tsy maregne ty evolisiona. ... Amako, sarotse inoagne ty evolisiona naho oharegne amy ty finoagne ty Mpamorogne.”—Anthony.
DINEHO HEY TOY:
Fa an-tao’e maro nikaroke miomba ty evolisiona o mpikarokeo faie tsy mitovy ty heve iareo. O mpikarokeo aza tsy mitovy hevetse miomba ty evolisiona, le ho diso vao rehe naho tsy mino aze?
Va'e ho Tea'o Ka
TY RAHA REHAFE TY TANORA MANAHAKE AZO
Tena Ilaegne vao ty Mino An’Andrianagnahare?
Hotrea’o ato ty fomba niatreha ty tanora roe ty raha nampisalasala iareo naho ty raha natao iareo mba hagnatanjahagne ty finoa’e.
