Mateteke ty rehake tihoe “Samaritana Soa Fagnahy” ro ampiasaegne mba hirehafagne ndaty raike manao raha hagnampeagne ndaty mipay fagnampeagne. Boake amy i fagnoharagne raike nirehafe i Jesosy zay ty nifotora o fomba firehake iohoe. Nirehafe’e tamy io fa nisy lahilahy raike nitretré ndaty raike tsy mitovy karazagne ama’e.

Amy ty lahatsoratse toy

•  Akore ty fahafantara’o i fagnoharagne miomba i “Samaritana Soa Fagnahỳ”?

•  Nagnino ty Jesosy ro nirehake o fagnoharagne iohoe?

•  Inogne ty lesogne ianarantika boake amo o fagnoharagne iohoe?

•  Ndaty nanao akore o Samaritana zao?

•  Tena nisy vao i “Samaritana Soa Fagnahy” nirehafe i Jesosỳ?

Naho fintignegne i fagnoharagne nirehafe i Jesosỳ, le izao: Nisy Jiosy raike boake a Jerosalema agne nandeha ho a Jeriko agne. Faie naho fa tan-dalagne ey reke, le nisy ndaty nitavagne ty fanagna’e naho nijera aze, sady ie le fa ho nimate reke vaho nado iareo.

Tafara izay le nisy Jiosy mpisorogne naho mpitarike fivavahagne Jiosy nandeha tamy i lalagne igne. Faie le nandriogne avao iareo fa tsy mba nijanogne hagnampe i lahilahỳ, ie amy izao Jiosy manahake iareo ka reke.

Tamy ty fara’e, le nisy lahilahy boake amy ty firenena hafa nandalo tamy i lalagne igne. Samaritana o lahilahy iohoe. (Lioka 10:33; 17:16-18) Niferegnesa’e i lahilahy Jiosy nisy nijeray, le nikarakarae’e i fere ama’ey. Nampitigire’e tamy i birike’ey ka i lahilahỳ naho fa niavy eo. Nikarakara i lahilahy igne avao ty natao’e tamy i halegne ignehoe. Ie nimaray igne reke le nandoa ze vola nilany tamy ty fikarakaragne i lahilahỳ sady mbe nagnomey vola hafa ka mba hiviliagne ze raha va’e mbe hilaegne.​—Lioka 10:30-35.

Nisy lahilahy raike nieretseretse tie ze ndaty mitovy foko naho fivavahagne ama’e avao ro nama’e. Te hampianatse lesogne lahibey aze ty Jesosy, le nirehake o tantara iohoe tama’e. Tsy ino zay fa tihoe tsy ze Jiosy mitovy ama’e avao ro “nama’e.” (Lioka 10:36-37) Natao agnate Baiboly ao o fitantaragne iohoe, amy izay mandrambe soa boake ama’e ze ndaty te hampifale an’Andrianagnahare.—2 Timoty 3:16, 17.

O fagnoharagne iohoe le mampianatse antika tie ty tena namagne le manao raha fa tsy mitretré an-drehake avao. Magnampe i ndaty sahiragney reke ndra tie tsy mitovy foko naho loko ndra firenena ama’e aza i ndatỳ. Tena namagne ka ty ndaty raike naho indese’e amy ty fomba tea’e hindesagne ty vata’e ty ndaty hafa.​—Matio 7:12.

Samaritana ty irehafagne o ndaty nitoboke ta avara i Jodia agneo. Nanambaly ndaty tsy Jiosy o ndaty rehoe naho fa tafara tatoy, le nirehafegne tihoe Samaritana ka ty tarana iareo.

Namorogne fivavahagne hoahy iareo manokagne o Samaritanao tamy ty taonjato voaloha’e T.K. Neke iareo ho agnisa ty Soratse Hebreo i boke dime voaloha’e amy Baiboly ao rey. Tsy inoa iareo amy ty ankapobei’e ze ankoatse ireo.

Niheje ty ankamaroa o Jiosio vintagne naho tsy nifandrambesa iareo o Samaritanao tamy ty andro i Jesosy. (Jaona 4:9) Ty Jiosy ila’e aza nampiasa o rehake tihoeke o “Samaritana” iohoe naho fa nagnambane ndaty.​—Jaona 8:48.

Tsy mirehake ty Soratse Masigne tie nisy vata’e i fagnoharagne miomba i Samaritanaỳ. Faie mateteke ty Jesosy ro nampiasa ty raha fatao o ndatio naho tanàgne tena nisy naho fa nampianatse, amy izay mora amo o ndaty mitsanogne azeo ty mahatakatse ty raha tea’e hampitaegne.

Tena maregne ty ankamaroa ty pitsopitson-draha amy i fagnoharagney naho ty tantara ro henteagne. Ohatse amy izay retoa:

• Nisy eo ho eo amy ty 20 kilometatse ty halava i lalagne boake a Jerosalema mba Jeriko mbeoy, le eo ho eo amy kilometatse raike ty haabo ty toeragne nisy i Jerosalema. Mirehake ka i fagnoharagney tie ‘nizotso boake a Jerosalema agne’, i ndaty handeha ho a Jeriko agney.​—Lioka 10:30.

• Mateteke ro nandeha tamo o lalagne iohoe o mpisorogne naho o Levita nitoboke ta Jeriko aò naho fa nandeha a Jerosalema agne.

• Mateteke ro nisy ndaty mpitavagne tamo o lalagne bangigne iohoe. Niambegne ze ndaty mandeha amy igne iareo, lohotsie fa ze ndaty mandeha irery.