Aha’a, tsy mitovy o fivavahagneo iaby. Maro ty fivavahagne rehafe ty Baiboly tie tsy ankasitrahan’Andrianagnahare. Misy karaza’e roe iareo.

1: O fivavahagne manompo andrianagnahare disò

 Rehafe ty Baiboly tie “tsy misy dika’e” sady ‘tsy mahasoa’ ty mivavake amo o andrianagnahare disò. (Jeremia 10:3-5; 16:19, 20) Nandily ty firene o Israely talohao ty Jehovah a Andrianagnahare tie: “Ko managne andrianagnahare hafa ankoatse ahy.” (Eksodosy 20:3, 23; 23:24) ‘Nirehetse ty havignera i Jehovah’ naho fa nanompo andrianagnahare hafa o Israelio.​—Nomery 25:3; Levitikosy 20:2; Mpitsara 2:13, 14.

 Tsy miova ty Andrianagnahare. Mbe heje’e avao naho mivavake amo o “raha atao tihoe andrianagnahare” rey o ndatio. (1 Korintianina 8:5, 6; Galatianina 4:8) Tsy engà’e hifagnosehose amo o ndaty magnorike fivavahan-disò ze te hanompo aze. Izao ty raha nandilia’e: ‘Miakara amy iareo ao nareo, le miambaha amy iareo.’ (2 Korintianina 6:14-17) Ho nisaontsy izay vao ty Andrianagnahare naho ohatse nitovy iaby o fivavahagneo sady sambe magnampe o ndatio hifandrambe ama’e?

2: O fivavahagne mivavake amy i Andrianagnahare vata’ey faie tsy manompo aze arake ty fomba iteava’e azeo

 Nisy fotoagne o Israelio nivavake taman’Andrianagnahare faie sady nagnorike ty raha fatao o ndaty nanompo sampio ka. Nino ty raha ninoa i ndaty rey ka iareo. Naharo iareo ty fivavahagne maregne naho diso. Tsy nekén’Andrianagnahare zay. (Eksodosy 32:8; Deoteronomia 12:2-4) Nimelohe i Jesosy ka o mpinday fivavahagne tamy ty andro’eo, satria tsy nimete ty fomba nanompoa iareo an’Andrianagnahare. Nao mpivavake zao iareo naho henteagne ivela’e etoy, ie amy izao manao soamiatreke avao. ‘Tsy nidarea iareo ze raha tena nilahibey tamy i Lalànay tao, agnisa izay ty manao ty rare’e naho mamindra fo vaho azo atokisagne.’​—Matio 23:23.

 Hoe izay ka ty amy izao. Ze fivavahagne magnorike ty hamarenagne avao ro magnampe o ndatio hifandrambe aman’Andrianagnahare. Agnate Baiboly ao ze hamarenagne zay. (Jaona 4:24; 17:17; 2 Timoty 3:16, 17) Mahavy o ndatio hihalavitse an’Andrianagnahare o fivavahagne mampianatse o ndatio raha tsy mifagnarake amy ty Baiboly rey. Boake amo o ndaty nanompo andrianagnahare disò ty ankamaroa i fampianaragne eretserete o ndatio tie nao boake amy Baiboly ao rey. Agnisa izay i fampianaragne miomba ty Andrianagnahare telo miharo raikey, ty fagnahy tsy mete mate, naho ty fampijaleagne amy i afobey agne nainai’e. “Rokake avao” ndra tsy misy dika’e ty fivavahagne mampianatse i raha rey, satria sinolo iareo fampianara o ndaty ty lilin’Andrianagnahare.​—Marka 7:7, 8.

 Hejen’Andrianagnahare o fivavahagne manao soamiatrekeo. (Titosy 1:16) Naho te hagnampe o ndatio hifandrambe maifitse aman’Andrianagnahare areke ty fivavahagne raike, le toko’e hisy voka’e amy ty fiaigna’e andavanandro, fa tsy tihoe handrisike aze hagnorike fombafomba avao. Mirehake, ohatse, ty Baiboly tie: “Naho misy ndaty mieretseretse tie mpivavake aman’Andrianagnahare faie tsy mahafehe ty vava’e, le mamitake ty fo’e sady tsy misy dika’e ty fivavaha’e. Izao ty fivavahagne malio sady tsy misy loto agnatrehan’Andrianagnahare Raentikagne: Ty mikarakara ty bode naho ty ampela vantotse amy ty haorea’e, sady miaro tegna lognandro tsy ho voaloto o ndaty iaby tsy manompo an’Agnahareo.”​—Jakoba 1:26, 27.