Akore ty Atao Naho fa Mivavake? I Vavake Nampianare i Tompoy Avao vao ty Ekén’Agnahare?
Vale’e ara-baiboly
Manoro antikagne ty raha toko’e hatao naho fa mivavake naho ty raha horehafegne amy ty vavake i Vavake Nampianare i Tompoy. Nirehake ty miomba io ty Jesosy naho fa nangatake ama’e hoe izao i mpiana’e rey tie: “O Tompo, ampianaro mivavake zahay.” (Lioka 11:1) Tsy i Vavake Nampianare i Tompoy avao ndra i Rainay Izay any An-danitra igne avao ty vavake ekén’Andrianagnahare. a Nirehake o vavake iohoe avao ty Jesosy mba ho ohatse amy ty vavake ekén’Andrianagnahare.
Hotrea amy ty lahatsoratse toy ato
Inogne iaby ty raha rehafegne amy i Vavake Nampianare i Tompoy ao?
Miovaova ty rehake amy i Vavake Nampianare i Tompoy amy Matio 6:9-13 ao, arakarake ty dikan-drehake sambe hafa nandikagne o Baibolio. Misy ohatse roe zao retoagne:
Dikan-drehake Tontolo Vaovao: “Rae’ay amy i lagnitsey ao, hohamasinegne abey ty tahina’o! Ho avy abey i Fanjakà’oy! Hanoegne an-tane etoy abey ze zoton’arofo’o hambagne amy ty an-dagnitse agne! Meo anay androany ze hanegne tsahatse anay, mamelà ty helo’ay manahake ty namelà’ay ze nanao tsy mete tama’ay. Le ko minday anay amy ty tsapa hevetse, fa afaho amy i ratỳ zahay.”
Tsaran’Añahare Sokitse Masiñe: “Ry Rae’ay andindiñe ao, ho masiñeñe abey ty tahina’o. Ho tahieñe abey ty fifehea’o, hanoeñe an-dindiñe ao naho an-tane atoy o satri’oo. Atoloro nainai’e ty mahakama’ay. Apoho o tahi’aio, manahake ty ihevea’ay o anaña’ay hakeoo. Ko minday anay mba’ampaozaram-panjiziañe, fa kalaño amy ze atao raty.” b
Inogne ty dika i Vavake Nampianare i Tompoy?
Mifagnarake amy ty raha rehafe ty Soratse Masigne ty raha ampianare i Jesosy, le afake mitamà areke tikagne fa hagnampe antikagne hahafantatse ty dika i Vavake Nampianare i Tompoy o Baibolio.
“Rae’ay amy i lagnitsey ao”
Tena mete soa ty itokavagne an’Andrianagnahare ‘ho Raentikagne’ satria Ireke ty namorogne naho nagnomey fiaigne antikagne.—Isaia 64:8.
“Hohamasinegne abey ty tahina’o”
Toko’e homeagne voninahitse naho hoheveregne ho masigne i tahinan’Andrianagnahare tihoe Jehovah-y. Magnomey voninahitse i tahina’ey o ndatio naho fa mirehake amy ty hafa miomba ty toetse’e sady mampahafantatse ty raha safirie’e.—Salamo 83:18; Isaia 6:3.
“Ho avy abey i Fanjakà’oy”
Fanjakagne an-dagnitse agne o Fanjakàn’Andrianagnahare zao sady i Jesosy ty Mpanjaka’e. Nampianare i Jesosy fa toko’e hangatahentikagne amy ty vavake mba hanjaka ambone tane etoy o fanjakagne iohoe.—Daniela 2:44; Apokalypsy 11:15.
“Hanoegne an-tane etoy abey ze zoton’arofo’o hambagne amy ty an-dagnitse agne”
Tsy misy raha raty ndra fate ty an-dagnitse agne. Zoton’arofon’Andrianagnahare ndra safirie’e ka ty hiaigna o ndatio nainai’e ambone tane etoy sady tsy hisy hanembatsembagne fa hiadagne naho hilamigne soa avao.—Salamo 37:11, 29.
“Meo anay androany ze hanegne tsahatse anay”
Tamy ty andro i Jesosy, le o mofò ro tena fihina o ndaty tamy izay. Toko’e ho tadidientikagne fa i Mpamorogne antikagney ro mahavita magnomey ze raha ilaentikagne mba hivelomantikagne.—Asan’ny Apostoly 17:24, 25.
“Mamelà ty helo’ay manahake ty namelà’ay ze nanao tsy mete tama’ay”
Sambe manota iaby tikagne sady mipay famelan-keloke. Faie naho teantikagne ty hamelan’Andrianagnahare ty helontikagne, le tsy maintsy mamela ze ndaty nanao diso tamantikagne heike tika.—Matio 6:14, 15.
“Ko minday anay amy ty tsapa hevetse, fa afaho amy i ratỳ zahay”
Tsy ombia hitsapa antikagne mba hanao raha raty ty Jehovah Andrianagnahare. (Jakoba 1:13) Naho ty maregne, le “i ratỳ”, i Satana Devoly, ndra i atao tihoe tie “Mpitsapa hevetsey” ro mitsapa hevetse antikagne. (1 Jaona 5:19; Matio 4:1-4) Afake mangatake amy i Jehovah tika mba hagnampea’e antika tsy hivalike ama’e naho fa misy raha mandrisike antikagne hanao raha raty.
Ampe vao naho fa mitanisa i raha nirehafegne amy i Vavake Nampianare i Tompoy naho fa mivavake?
Nirehake i Vavake Nampianare i Tompoy ty Jesosy mba ho ohatse avao. Ty dika izay, tsy toko’e hatao tsianjere io. Taloha ty nirehafa i Jesosy i Vavake Nampianare i Tompoy, le nampitao hoe izao reke tie: “Naho fa mivavake nareo, le ko magnerenkeregne raha mitovy avao.” (Matio 6:7) Naho fa nisy fotoagne reke mbe nirehake mahakasike i vavake modelỳ tamy ty fotoagne hafa, le nampiasa rehake hafa fa tsy nitovy amy i talohay avao.—Lioka 11:2-4.
Tena soa areke naho ze raha am-pontikagne ao ro rehafentikagne naho fa mivavake.—Salamo 62:8.
Akore ty atao naho fa mivavake?
Trea amy i Vavake Nampianare i Tompoy ty raha toko’e hataontika mba ho janjignen’Andrianagnahare ty vavake ataontika. Toe mifagnarake amy ty vavake hafa trea amy ty andine’e ila’e amy Baiboly ao o modely iohoe.
I Andrianagnahare avao ro ivavaho
Andinin-teny: “Amy ze kila raha, le ampahonigno an’Andrianagnahare amy ty vavake naho ty fihalaleagne miharo fisaoragne ty fangataha’areo.”—Filipianina 4:6.
Ty dika izay: I Andrianagnahare ty toko’e hivavahantikagne fa tsy i Jesosy ndra i Maria ndra ty ndaty masigne hafa. Trea amy ty fanomboha i Vavake Nampianare i Tompo manao tihoey tie “Rae’ay an-dagnitse agney” fa toko’e ho i Jehovah Andrianagnahare raike avao ty toko’e hivavahantikagne.
Ze raha mifanandrife amy ty zoton’arofon’Andrianagnahare ro angataho naho fa mivavake
Andinin-teny: “Ndra inogn’ino angatahentikagne naho fa mifanandrife amy ty zoton’arofo’e, le mijanjigne antikagne reke.”—1 Jaona 5:14.
Ty dika izay: Azontikagne rehafegne amy ty vavake ze kila raha mifanandrife amy ty zoton’arofon’Andrianagnahare. Nampianare i Jesosy fa tena raha lahibey ty zoton’arofon’Andrianagnahare kanao reke nirehake tihoe ‘hanoegne abey ze zoton’arofo’o’ amy i Vavaka Nampianare i Tompoy. Hahafantatse ty zoton’arofon’Andrianagnahare miomba ty tane toy naho o ndatio tikagne naho fa mianatse Baiboly.
Mivavaha miomba ze raha mampinekoneko azo manokagne
Andinin-teny: “Ankigno amy i Jehovah ze raha magnavesatse azo, fa hanohagne azo reke.”—Salamo 55:22.
Ty dika izay: Midare ze raha mampinekoneko antikagne ty Andrianagnahare. Naho fa nirehake i Vavake Nampianare i Tompoy ty Jesosy, le agnisa ty raha nirehafe’e ao ze raha ilaentikagne manokagne. Naho izay areke, le afake mangatake ze raha ilaentikagne isan’andro tikagne, tari-dalagne naho fa handrambe fanapahan-kevetse lahibey, fagnampeagne naho fa miatreke olagne vaho famelan-keloke noho ty hadisoantikagne. c
a Ohatse, naho fa nanao vavake hafa ohatse ty Jesosy naho i mpiana’e rey, le tsy nagneregne rehake mitovy amo o vavake modely iohoe.—Lioka 23:34; Filipianina 1:9.
b Izao ty rehake famaragnagne i Vavake Nampianare i Tompoy trea amy ty Baiboly Tsaran’Añahare Sokitse Masiñe ao: “[toe Azo ty fifeheañe, ty haozarañe vaho ty engeñe nainai’e.]” Trea amy ty dikan-dreha ty Baiboly ila’e ka o rehake fideragne an’Andrianagnahare iohoe. Faie, izao ka ty rehafe ty boke tihoe Fagnazava i Jérôme (angilé): “Tsy trea amy ty sora-tagnagne tam-boaloha’e tagne o rehake fideragne iohoe.”
c Va’e hagnamelon-tegna loatse le tsy hivavake ty ndaty ila’e mahatsapa tie mipay ty famelan’Andrianagnahare. Faie mandrisike ty ndaty hoe izay hoe izao ty Jehovah tie: “Avia tikagne hifandamigne.” (Isaia 1:18) Faly Aze ty tsy hiraharaha ze ndaty mipay famelan-keloke ama’e.
Va'e ho Tea'o Ka
ESSENTIAL BIBLE TEACHINGS
Mijanjigne ze Kila Vavake vao ty Andrianagnahare?
Akore naho feno hatea tegna ty vavake atao ty ndaty raike? Akore naho mampijale ty vali’e ty lahilahy raike, le mangatake ty fitahian’Andrianagnahare reke naho fa avy eo?