Amy ty faritse atimo i Aostralia agne ty misy ty vorogne raike atao tihoe léipoa toy. Mandava-taogne, le atao’e ty hampafana ty an-tragno’e ao ndra atoandro, ndra halegne. Mahatratse 34 degrés eo ho eo ze hafanagne zay. Akore ty ahavità o vorogneo iohoe manao izay?

 Isake tie asotry i androy le mihaly lavake metatse raike eo ho eo o vorogne iohoe le telo metatse eo ho eo ty habei’e. Fenoe ty léipoa lahi’e raven-katae naho akata vaho raha mitiry hafa i lavakey. Naho azo ty ranon’oragne amy i asotrỳ i raha mitiry agnate i lavakey aoy, le mangaly lavake vaovao indraike i vorogne lahi’ey mba hagnatoliza i vorogne vave’ey. Lembefa’e amy ty faseke i lavakey naho fa avy eo. Afara izay, le manjare logne i raha mitiry rey sady mihamafana. Le izay ty mahavy ty agnate i lavakey ao hafana ka.

 Isake tie hagnatoly i vorogne vave’ey, le afaha i lahi’ey i faseke nandembefa’e i lavakeỳ. Naho fa boake magnatoly ao amy izay i vorogne vave’ey, le lembefa i vorogne lahi’ey indraike i lavakey. Boake amy ty volagne Septambra hatrake amy Fevrie, le eo ho eo amy ty 35 ty atoli’e. a

 Mateteke alente o vorogne rehoe agnate o fasegneo ao ty vava iareo mba hahaia’e te manao akore i hafanagney. Manao raha reke afara izay mba hitanagne i hafanagney ho 34 dregrés avao mifagnarake amy i toets’androy. Ohatse zao:

•   Vao mainke mihamafana ty agnate i lavakey ao naho fa avy i asaray noho i akata naho i raha mitiry logne rey. Afaha i vorogne lahi’ey areke i faseke ambone i lavake fagnatoliza i vave’eỳ, amy izay miakatse boake ao i hafanagney. Afara izay le mangalake faseke manintsinintsy reke le arongo’e i lavakey.

•   Naho fa i androy tena mafana, le rongona i vorogne lahi’ey faseke ty ambone i lavakey ey mba hiarovagne i atolỳ amo o masoandrò. Faie soloa’e isake maraindraigne i faseke ambone i lavakey eoy. Ie manintsinintsy ka ty ao le soloa’e indraike ka i fasekey.

•   Naho fa avy i faosay, le tsy magnomey hafanagne sasa i akata rey satria fa logne loatse. Afaha i vorogne lahi’ey iaby areke iareo naho ze faseke ao le enga’e ho azo ty tarignandroke i atolỳ naho i faseke nakare’ey. Ahere’e indraike an-davake ao i raha rey naho fa afara izay, amy izay mafana i atolỳ naho fa halegne.

 Isan’andro, le eo ho eo amy ty tane kilo raike ty taone i vorogne lahi’ey agnate ty dime lera eo ho eo. Ahafaha’e i tane ambone i lavakey eoy, le ahere’e eo indraike. Le hoe izay avao ty atao’e. Manjare maleme areke i taney le mora amy i ana-borogney ty miakatse boake ao naho fa foy reke.

 Akore ty heve’o? Nisinisy ho aze avao vao sa nisy namorogne ty fahaia o léipoao mitagne ty hafanagne agnate tragno fagnatoliza’e ao tsy hiovaova?