Depois Zarina hetan tiha batizmu nuʼudar Testemuña ba Jeová, nia muda husi Rúsia hodi bá ninia rai iha Ázia Sentrál. Nia iha oan-feto naʼin-rua, no nia hakarak tebes hanorin Bíblia ba sira. Maibé tanba la iha osan barak, Zarina no ninia oan-feto naʼin-rua tenke hela ho ninia inan-aman iha uma ida neʼebé iha kuartu ida deʼit. Zarina nia alin-mane no ninia feen mós hela hamutuk iha neʼebá. Zarina nia inan-aman bandu nia makaʼas atu la hanorin Bíblia ba ninia oan-feto naʼin-rua. Sira mós bandu sira-nia bei-oan naʼin-rua atu labele estuda Bíblia.

 Zarina buka dalan oinsá atu bele hanorin ninia oan sira kona-ba Jeová. (Provérbios 1:8) Nia harohan ho laran ba Jeová atu husu matadalan no matenek. Depois, nia halo buat ruma hodi tuir ninia orasaun. Nia laʼo halimar ho nia oan sira no koʼalia kona-ba Maromak nia kriasaun neʼebé furak. Rezultadu mak ninia oan sira hakarak atu hatene liután kona-ba Kriadór.

 Tuirmai, Zarina hanoin kona-ba dalan ida atu hanorin ninia oan sira hodi uza livru Tuir Loloos, Saida mak Bíblia Hanorin? a Nia hakerek parágrafu no pergunta sira husi livru ba surat-tahan. Nia mós aumenta liafuan balu atu ajuda ninia oan sira komprende. Depois, nia subar surat-tahan sira-neʼe no lapis iha mákina fase roupa nia okos iha hariis-fatin. Kuandu ninia oan sira tama iha fatin neʼe, sira bele lee no hakerek sira-nia resposta.

 Zarina konsege hanorin kapítulu rua husi livru Bíblia Hanorin hodi uza métodu hanesan neʼe. Ikusmai sira naʼin-tolu hetan fatin atu hela ketak, no Zarina bele haboot ninia oan sira ho livre. Iha Outubru 2016, ninia oan-feto naʼin-rua hetan batizmu, sira kontente tanba sira-nia inan uza matenek atu hanorin sira lia-loos husi Bíblia.