Osman no nia feen no oan-feto haklaken ho karrosa iha semitériu nia liʼur iha rai-Xile. Derrepente, ema-lubun boot ida mai, lori hela mate atu bá hakoi, no sira mós toka múzika makaʼas. Ema balu husi sira hanoin katak Osman mak sira-nia pastór husi sira-nia igreja, entaun sira hakbesik no hakoʼak nia no dehan, “Pastór, obrigadu bele mai tuir oras, ami hatene katak Ita-boot sei mai!”

 Maski Osman koko atu esplika katak nia laʼós pastór husi sira-nia igreja, sira labele rona nia tanba ema-lubun neʼe barullu loos. Grupu neʼe tama semitériu, maibé depois minutu balu liu tiha, balu fila mai atu husu nia, “Pastór, mai ona, ami hein hela Ita-boot iha rate.”

 Bainhira ladún ona barullu, Osman esplika nia mak sé no tansá nia hein iha neʼebá. Kuandu sira haree katak sira-nia pastór la mai, sira hirus sira-nia pastór. Depois neʼe sira husu Osman, “Ita bele mai no fahe liafuan balu husi Bíblia ba ema-lubun neʼe?” Osman mós hakarak.

 Nuʼudar nia laʼo ba fatin atu hakoi mate, Osman husu pergunta balu kona-ba ema neʼebé foin mate no hanoin kona-ba eskritura neʼebé nia bele fahe. Bainhira toʼo neʼebá, nia fó koñese nia mak sé ba ema-lubun no esplika katak nia haklaken liafuan diʼak ba ema tanba nia mak Testemuña ba Jeová.

 Depois nia uza Apokalipse 21:3, 4 no João 5:28, 29, hodi esplika katak Maromak nunka halo planu ba ema atu mate. Nia dehan, tuir loloos, lakleur tan Maromak sei fó moris-hiʼas ba ema neʼebé mate ona no sira sei iha esperansa atu moris ba nafatin iha rai. Bainhira Osman koʼalia hotu tiha, ema barak hakoʼak nia no fó obrigadu tanba nia fahe “Jeová nia mensajen kona-ba liafuan diʼak”. Depois neʼe nia fila ba karrosa hodi kontinua haklaken.

 Depois funerál hotu tiha, ema balu hakbesik Osman no ninia família neʼebé hamriik ho karrosa hodi husu sira pergunta kona-ba Bíblia. Sira koʼalia ba sira ba tempu naruk no bainhira ema sira-neʼe fila, sira foti livru barak toʼo karrosa besik mamuk.