Irmán Brooke mak Testemuña ba Jeová ida neʼebé hela iha Estadus Unidus. Durante pandemia COVID-19, nia haklaken hodi hakerek karta. Nia hakerek karta barak semana-semana, maibé liutiha tinan ida ho balu, nia sente laran-kraik. Durante tempu neʼebá, ema ida deʼit mak resposta fali, no ema neʼe hatete ba nia atu labele haruka tan karta. Irmán Brooke sente laran-rua hodi hanoin katak ninia hakaʼas an la lori rezultadu ida.

 Maibé ikusmai, maluk Testemuña ida naran Kim neʼebé serbisu iha banku, konta ba Brooke kona-ba mane ida neʼebé mai iha banku. Mane neʼe koʼalia kona-ba karta ida husi Testemuña ba Jeová neʼebé hakerek ho liman. Afinál neʼe mak karta neʼebé Brooke hakerek! Iha semana tuir mai mane neʼe mai fali banku. Bainhira nia koʼalia ho Kim, nia husu se nia bele tuir reuniaun kongregasaun nian neʼebé halaʼo liuhusi vídeo konferénsia.

 Lakleur depois neʼe, Testemuña ida seluk naran David fó-hatene ba Brooke kona-ba ninia maluk serbisu ida neʼebé simu Brooke nia karta. Mane neʼe hatete katak karta neʼe book ninia laran tanba hakerek ho liman. Nia dehan: “Tuir loloos tenkesér iha ema barak liután neʼebé hanoin ema seluk nia diʼak hanesan nia halo.” Neʼe loke oportunidade ba David atu fó sasin ba nia no oferese livru balu, no mane neʼe simu ho kontente.

 Testemuña ba Jeová rekoñese katak dala ruma susar atu hatene rezultadu husi fini neʼebé sira kari iha sira-nia serbisu haklaken. (Eclesiastes 11:5, 6) Maski nuneʼe, Brooke nia esperiénsia ajuda nia atu hafolin ninia serbisu haklaken nuʼudar ema Kristaun ida.—1 Korinto 3:6.