Importante tebes atu hatudu agradese ba malu hodi bele iha moris kaben nian neʼebé kontente. Maibé feen-laʼen barak la rekoñese sira-nia kaben nia hahalok diʼak no mós la hatudu agradese. Tuir livru Emotional Infidelity, konsellu-naʼin ba moris kaben nian dehan: “Ema barak neʼebé mai hasoru haʼu hanoin liu kona-ba buat neʼebé falta iha sira-nia moris kaben nian. Sira konta mai haʼu kona-ba buat neʼebé sira hakarak atu troka, laʼós kona-ba buat neʼebé halo sira kontente. Sira-nia problema mak sira la hatudu sai sira-nia domin ba malu hodi fó-agradese ba malu.”

Oinsá mak Ita no Ita-nia kaben bele sees husi problema hanesan neʼe?

Hatudu agradese bele hamenus estrese iha moris kaben nian. Bainhira feen no laʼen hakaʼas an atu rekoñese sira-nia kaben nia hahalok diʼak, sira-nia relasaun sei sai metin liután. Maski iha susar boot nia laran mós feen-laʼen bele hamenus sira-nia estrese se sira hafolin malu.

Ba feen sira. Tuir livru Emotional Infidelity, feto barak ladún hanoin kona-ba estrese boot neʼebé mane sira sente atu sustenta umakain. Nuʼudar ulun ba família, mane barak sente estrese nafatin kona-ba neʼe maski sira-nia feen mós halo serbisu hodi ajuda manán osan.

Ba laʼen sira. Dala barak mane sira ladún hafolin feen sira-nia hakaʼas-an atu apoia umakain, hanesan serbisu buka osan, haboot oan, ka serbisu uma-laran nian. Fiona * neʼebé kaben tinan tolu ona, hatete: “Ita hotu halo sala. No bainhira haʼu halo sala, neʼe halo haʼu sente la kontente. Maibé kuandu haʼu-nia laʼen gaba haʼu, porezemplu kona-ba serbisu uma-laran nian, haʼu sente nia hadomi duni haʼu maski haʼu iha fraku oioin. Neʼe halo haʼu sente kontente fali!”

Maibé se Ita la hafolin Ita-nia kaben nia hahalok diʼak ka serbisu badinas, neʼe bele lori perigu ba Ita-nia moris kaben nian. Feen ida naran Valeria hatete: “Se Ita sente katak Ita-nia kaben la hafolin Ita, ikusmai Ita bele sente besik ho ema seluk neʼebé hafolin liu Ita.”

Buka Ita-nia kaben nia hahalok diʼak. Durante semana ida nia laran, haree toʼok hahalok diʼak sira neʼebé Ita-nia kaben hatudu. Haree mós buat kiʼik oioin neʼebé Ita-nia kaben halo hodi ajuda umakain, neʼebé karik Ita sente baibain deʼit toʼo agora. Tuirmai, hakerek lista kona-ba (1) Ita-nia kaben nia hahalok diʼak sira no (2) buat diʼak oioin neʼebé Ita-nia kaben halo ona.—Bíblia nia matadalan: Filipe 4:8.

Tanbasá mak Ita presiza haree ba Ita-nia kaben nia hahalok diʼak? Feen ida naran Erika hatete: “Bainhira Ita kaben tinan barak ona, Ita komesa sente baibain deʼit ho Ita-nia kaben. Ita la hafolin ona buat diʼak oioin neʼebé nia halo, maibé fokus liu ba buat neʼebé nia falta.”

Husu ba Ita-nia an: ‘Haʼu hafolin haʼu-nia kaben nia serbisu badinas ka lae?’ Porezemplu, se Ita-nia laʼen hadiʼa buat ruma iha uma, Ita hanoin katak neʼe mak ninia knaar no la presiza fó obrigada ba nia ka lae? Se Ita mak laʼen, Ita sente katak tau matan ba oan sira mak feto nia knaar no la presiza gaba nia ka lae? Hakaʼas an atu rekoñese buat diʼak hotu neʼebé Ita-nia kaben halo maski buat kiʼik deʼit, no fó-agradese ba nia.—Bíblia nia matadalan: Roma 12:10.

Sai laran-luak atu gaba Ita-nia kaben. Bíblia haruka ita atu ‘hatudu katak ita agradese’. (Koloso 3:15) Tan neʼe, sai toman atu hatete obrigadu ba Ita-nia kaben. Laʼen ida naran Tiago hatete: “Bainhira haʼu-nia feen fó-agradese ba buat neʼebé haʼu halo, neʼe book haʼu atu hakaʼas an hodi bele sai laʼen neʼebé diʼak liután no hametin liután ami-nia moris kaben nian.”—Bíblia nia matadalan: Koloso 4:6.

Feen no laʼen neʼebé hatudu agradese ba malu hametin duni sira-nia relasaun nuʼudar kaben-naʼin. Laʼen ida naran Miguel hatete: “Haʼu fiar katak feen-laʼen barak bele salva sira-nia moris kaben nian se sira prontu atu fó sai buat diʼak neʼebé sira gosta kona-ba sira-nia pár. Neʼe ajuda sira atu la husik sira-nia moris kaben nian naksobu bainhira problema ruma mosu.”