Pergunta husi lee-naʼin
Iha rai-fuik maran, ema Izraél han deʼit maná no manu-kiukae ka lae?
Durante ema Izraél iha rai-fuik maran ba tinan 40, hahán neʼebé sira han barak liu mak maná. (Éx 16:35) Iha situasaun rua, Jeová mós fó manu-kiukae ba sira. (Éx 16:12, 13; Núm 11:31) Maibé, ema Izraél mós iha hahán seluk neʼebé sira bele han.
Porezemplu, dala ruma Jeová lori ninia atan sira ba fatin neʼebé iha ona ai-han no bee atu bele sustenta sira-nia moris. (Núm 10:33) Fatin ida mak Elim, “fatin neʼe iha bee-matan 12 no iha ai-palmeira hun 70”. (Éx 15:27) Livru ida kona-ba ai-horis sira neʼebé temi iha Bíblia hatete katak ai-palmeira mak ai-horis neʼebé “moris iha fatin oioin, no ema barak uza hodi prodús ai-han, mina, no mós hela-fatin”.
Karik ema Izraél mós para iha área matak ida neʼebé ohin ema koñese nuʼudar Feiran, neʼebé parte husi Uádi Feiran. a Livru Discovering the World of the Bible esplika katak uádi ka mota neʼe mak iha foho-leet “neʼebé naruk kilómetru 130 no neʼe mak mota neʼebé naruk liu, furak liu no famozu liu iha Sinai”. Livru neʼe mós hatete katak área Feiran dook kilómetru 45 husi mota ain. Área neʼe aas metru 610, naruk kilómetru 4,8, no mós nakonu ho ai-palmeira. Tanba área neʼe furak loos ema balu kompara ida-neʼe ho jardín Eden. Durante tinan rihun ba rihun ema mai beibeik fatin neʼe tanba iha ai-palmeira barak tebes.
Ai-palmeira iha área Feiran
Bainhira ema Izraél sai husi Ejitu, sira lori trigu neʼebé masa ona, fatin deʼut trigu nian, no karik mós trigu no mina. Klaru katak buat sira-neʼe sei hotu lalais deʼit. Povu mós “lori bibi-lubun, karau-lubun no animál-hakiak neʼebé barak tebes”. (Éx 12:34-39) Tanba rai-fuik maran mak fatin neʼebé fuik duni, karik animál barak mós mate. Karik povu han animál balu, karik balu sira uza atu hasaʼe sakrifísiu ba maromak falsu sira. b (Após 7:39-43) Maski nuneʼe, ema Izraél iha bibi-lubun no karau-lubun. Ita bele hatene ida-neʼe liuhusi buat neʼebé Jeová hatete ba ninia povu kuandu sira kontra nia: “Imi-nia oan-mane sira sei sai nuʼudar bibi-atan iha rai-fuik ba tinan 40.” (Núm 14:33) Karik tan neʼe ema Izraél hetan susubeen husi sira-nia bibi no dala ruma han animál sira-neʼe. Maibé neʼe la toʼo atu fó han ba maizumenus ema naʼin-millaun tolu durante tinan 40. c
Iha neʼebé mak animál sira-neʼe bele hetan hahán no bee? d Karik iha tempu neʼebá udan tun beibeik, tan neʼe mak iha ai-horis oioin iha rai-fuik maran. Livru Permahaman hatete katak tinan 3.500 liubá, “iha bee barak liu iha área neʼebá se kompara ho ohin loron. Ita hatene ida-neʼe tanba iha mota maran barak neʼebé hatudu katak uluk iha udan boot neʼebé halo mota sira-neʼe suli”. Maski nuneʼe, rai-fuik maran mak fatin neʼebé fuik no perigu. (Deut 8:14-16) Se Jeová la halo milagre hodi fó bee ba ema Izraél, sira no sira-nia animál hakiak sei mate.—Éx 15:22-25; 17:1-6; Núm 20:2, 11.
Moisés hatete ba ema Izraél katak Jeová fó maná ba sira “atu [sira] hatene katak ema labele moris deʼit ho paun, maibé moris ho liafuan hotu neʼebé sai husi Jeová nia ibun”.—Deut 8:3.
a Haree Menara Pengawal 1 Maiu 1992, pájina 24-25.
b Bíblia fó sai kona-ba tempu rua neʼebé ema Izraél hasaʼe animál nuʼudar sakrifísiu ba Jeová iha rai-fuik maran. Dala primeiru mak bainhira ordena amlulik sira, no segundu mak iha Páskua. Akontesimentu rua neʼe akontese iha tinan 1512 AEC, neʼe mak tinan segundu husi tempu neʼebé ema Izraél sai husi rai-Ejitu.—Lev 8:14–9:24; Núm 9:1-5.
c Besik tinan 40 nia rohan iha rai-fuik maran, ema Izraél hadau animál rihun ba rihun kuandu sira manán funu. (Núm 31:32-34) Maski nuneʼe, sira kontinua han maná toʼo sira tama ba Rai neʼebé Maromak Promete.—Jos 5:10-12.
d Ita bele dehan katak animál sira la han maná tanba Jeová hatete ba ema Izraél atu halibur tuir buat neʼebé ema ida-idak bele han no la temi buat ida kona-ba animál sira.—Éx 16:15, 16.
