Bainhira Jesus iha distritu Síria neʼebé Roma mak ukun, feto gregu ida hakbesik ba nia hodi husu ajuda. Jesus hatán ba feto neʼe hodi uza ilustrasaun neʼebé kompara ema jentiu ho “asu-oan”. Tuir Moisés nia Ukun-Fuan, asu mak animál neʼebé la moos. (Levítico [Imamat] 11:27) Entaun, Jesus hakarak hatún feto gregu neʼe no ema jentiu seluk ka lae?

Lae. Jesus esplika ona ba ninia dixípulu sira katak knaar neʼebé nia simu iha tempu neʼebá mak atu ajuda ema judeu. Tan neʼe, nia uza ilustrasaun hodi esplika ba feto gregu: “La diʼak atu foti oan sira-nia paun no fó ba asu-oan.” (Mateus 15:21-26; Marcos 7:26) Ema gregu no ema Roma gosta hakiak asu iha sira-nia uma laran no husik sira-nia asu atu halimar ho sira-nia oan. Entaun karik bainhira sira rona liafuan “asu-oan”, sira hanoin kona-ba animál neʼebé sira hadomi. Feto gregu neʼe komprende Jesus nia liafuan no hatán: “Loos, Naʼi. Maibé tuir loloos asu-oan sira mós han paun-rahun neʼebé monu husi sira-nia naʼin nia meza.” Jesus gaba nia tanba nia fiar metin, no kura ninia oan-feto.​—Mateus 15:27, 28.

Ró neʼebé lori Paulo atu bá rai-Itália hetan susar tanba anin-boot. Bainhira sira para tiha ba tempu uitoan, Apóstolu Paulo fó konsellu ba ró-naʼin sira atu la kontinua sira-nia viajen. (Apóstolu 27:9-12) Maibé neʼe mak konsellu diʼak ka lae?

Husi tempu antigu, ró-naʼin sira hatene ona katak saʼe ró iha Tasi Mediterráneu maizumenus husi loron 15 Novembru toʼo 15 Marsu mak perigu. No ema la halo viajen durante tempu neʼe. Maibé Paulo atu halo viajen durante fulan-Setembru ka Outubru. Hakerek-naʼin ida naran Vegetius husi Roma (maizumenus iha tinan 400 liutiha Kristu) esplika iha ninia livru (Epitome of Military Science) kona-ba viajen iha tasi neʼe, hodi dehan: “Fulan balu mak diʼak, balu ladún diʼak, no durante fulan balu, ema la bele halo viajen ho ró.” Vegetius hatete katak tempu neʼebé seguru mak husi loron 27 Maiu toʼo 14 Setembru. Maibé husi loron 15 Setembru toʼo 11 Novembru, no loron 11 Marsu toʼo 26 Maiu, ró-naʼin sira tenkesér kuidadu. Tanba Paulo toman ona atu halo viajen, nia hatene didiʼak kona-ba neʼe. Karik ró-naʼin sira mós hatene, maibé la rona ba Paulo. Ikusmai ró neʼe baku fila.​—Apóstolu 27:13-44.