Ema maioria konkorda katak hahalok balu mak loos ka sala duni. Porezemplu, oho ema, violasaun seksuál, no abuzu seksuál ba labarik mak sala duni. No ema maioria hafolin hahalok hanesan la todan ba sorin, laran-diʼak, no hanoin ema. Maibé ema barak hanoin katak la iha desizaun ida mak loos ka sala kona-ba hahalok seksuál nian, ka haboot oan, no sira hanoin katak importante mak hatudu toleránsia ba malu. Dala barak ema halo desizaun bazeia deʼit ba sira-nia sentimentu ka ema seluk nian. Maibé neʼe sempre lori rezultadu diʼak ka lae?

Dala barak ita halo desizaun tuir ita-nia sentimentu ka konxiénsia kona-ba buat neʼebé loos ka sala. (Roma 2:​14, 15) Labarik kiʼik mós hatene bainhira buat ruma la loos, no sira sente sala kona-ba neʼe. Ita-nia konxiénsia forma liuhusi buat neʼebé ita aprende husi família, kolega, mestre, komunidade, relijiaun, no kultura. Ikusmai kuandu ita halo desizaun, ita-nia konxiénsia sei tesi-lia mai ita se ita-nia desizaun mak loos ka sala.

Ita-nia konxiénsia bele book ita atu hatudu agradese, laran-sadiʼa, hanoin ema seluk, no la todan ba sorin. Konxiénsia mós bele hanetik ita atu la hakanek ema seluk, ka halo buat neʼebé ikusmai hamoe ita.

Halo tuir Ita-nia sentimentu sempre lori diʼak ka lae? Mane ida naran Garrick sempre halo tuir deʼit ninia sentimentu bainhira nia sei joven. Nia dehan: “Haʼu halo buat naran deʼit neʼebé haʼu hakarak.” Maibé neʼe la lori rezultadu diʼak. Nia dehan: “Haʼu la kontente tanba sempre halo hahalok la morál, droga, hemu lanu, no violénsia.”

Dala barak ita mós halo desizaun tuir ema seluk nia sentimentu. Neʼe halo ita hetan benefísiu husi sira-nia esperiénsia no matenek. Ita mós bele hetan respeitu husi família, belun no komunidade kuandu ita halo buat neʼebé loos tuir sira-nia hanoin.

Halo tuir ema seluk nia sentimentu sempre lori diʼak ka lae? Feto ida naran Priscila halo tuir deʼit ninia kolega sira bainhira nia sei joven no nia halo relasaun seksuál livre. Maibé nia rekoñese katak moris hanesan neʼe la halo nia kontente. Nia dehan: “Tuir deʼit ema seluk nia hahalok la lori benefísiu mai haʼu. Haʼu halo desizaun neʼebé beik no perigu.”

Ita-nia sentimentu no ema seluk nia sentimentu bele ajuda ita halo desizaun diʼak kona-ba buat neʼebé loos ka sala, maibé neʼe mós bele lori rezultadu la diʼak. Dala ruma ita sai vítima ba desizaun sala neʼebé ita halo, tanba ita la haree konsekuénsia ba ita ka ema seluk iha futuru. (Provérbios 14:12) Maski ita ka ema seluk sente katak buat ruma mak loos, maibé neʼe laʼós garantia katak neʼe sei la troka. Hahalok neʼebé ema maioria uluk la simu, ohin loron ema tolera deʼit, no hahalok neʼebé uluk ema hafolin, agora ema la simu ida-neʼe.

Iha ka lae matadalan neʼebé diʼak liu atu deside kona-ba buat neʼebé loos ka sala? Iha ka lae matadalan kona-ba morál neʼebé ajuda ita ohin loron no sei la troka iha futuru?

Ita kontente tanba iha duni matadalan neʼebé sei la troka, ema bele tau fiar, no diʼak ba ema hotu iha fatin hotu. Informasaun tuirmai sei esplika kona-ba matadalan diʼak neʼebé ajuda ita deside buat neʼebé loos ka sala.