YOMARA no ninia alin-mane naran Marcelo no Hiver hela iha knua kiʼik ida iha rai-Guatemala. Yomara komesa estuda Bíblia ho Testemuña no ikusmai ninia alin-mane sira mós komesa estuda Bíblia. Maibé iha problema ida. Sira naʼin-tolu mak defisiente matan no sira la hatene lee letra braille. Tan neʼe, irmaun neʼebé estuda ho sira mak lee ba sira publikasaun no mós eskritura sira neʼebé temi iha publikasaun neʼe.

Susar mós ba sira atu tuir reuniaun. Atu bá Reuniaun-Fatin, presiza viajen durante minutu 40, no sira labele bá mesak. Maibé irmaun-irmán sira iha kongregasaun halo arranju atu ajuda sira tuir reuniaun hotu. No bainhira sira naʼin-tolu hetan knaar iha reuniaun loron baileet, irmaun-irmán sira ajuda sira dekór sira-nia parte.

Iha fulan-Maiu 2019, reuniaun sira komesa halaʼo iha sira-nia knua. Iha tempu neʼebá, feen-laʼen neʼebé serbí nuʼudar pioneiru regulár muda ba knua neʼe. Sira halo planu atu hanorin Yomara no ninia alin-mane sira atu lee no hakerek letra braille, maski feen-laʼen neʼe rasik la hatene oinsá atu lee no hakerek letra braille. Sira bá biblioteka atu aprende letra braille no mós aprende kona-ba oinsá atu hanorin ida-neʼe.

Iha fulan balu nia laran, Yomara, Marcelo, no Hiver bele lee braille ho didiʼak, no ida-neʼe ajuda sira atu iha relasaun diʼak liután ho Jeová. Agora sira serbí nuʼudar pioneiru regulár. Marcelo mós serbí nuʼudar atan ba kongregasaun. Sira mós okupadu tebes ho atividade espirituál durante semana tomak. Sira-nia laran-manas book ema seluk atu hatudu laran-manas.

Yomara, Marcelo, no Hiver sente agradese ba domin no apoiu neʼebé kongregasaun hatudu ba sira. Yomara dehan: “Husi tempu neʼebé ami foin hasoru Testemuña, sira hatudu ona domin Kristaun ba ami.” Marcelo hatete: “Ami iha belun furak sira iha kongregasaun no ami sai parte ba família boot iha mundu tomak neʼebé hadomi malu.” Yomara no ninia alin-mane sira hein namanas bainhira mundu neʼe sai paraízu neʼebé furak.​—Sal 37:10, 11; Isa 35:5.