Haʼu moris-mai no sai boot iha sidade Roma, iha área neʼebé kiak. Moris mak susar loos. Haʼu nunka koñese haʼu-nia inan rasik no haʼu la iha relasaun diʼak ho haʼu-nia apá. Nuʼudar haʼu sai boot haʼu tenke aprende oinsá atu proteje an iha bairru neʼebé iha problema barak.

Bainhira haʼu tinan sanulu, haʼu komesa ona naʼok sasán. Bainhira haʼu tinan 12 haʼu halai husi uma ba dala primeiru. Dala barak haʼu-nia apá tenke mai foti haʼu husi sede-polísia no tula haʼu ba uma. Haʼu sempre diskute malu ho ema. Haʼu halo violénsia no hirus ba ema hotu. Bainhira haʼu tinan 14, haʼu halai husi uma no la fila fali. Haʼu komesa uza sala droga no moris deʼit iha dalan sira. Tanba la iha fatin atu toba, baibain haʼu sobu karreta ida nia odamatan neʼebé para iha dalan no toba iha karreta laran toʼo dadeer-saan. Tuirmai, haʼu buka bee-matan atu haʼu bele haroʼus.

Haʼu sai matenek atu naʼok. Haʼu matenek atu naʼok ema nia pasta no mós atu tama ema nia uma iha kalan hodi naʼok sasán. Haʼu iha reputasaun neʼebé la diʼak no lakleur deʼit gang ida konvida haʼu atu laʼo ho sira. Ida-neʼe loke dalan ba haʼu atu naʼok husi banku sira. Tanba haʼu hirusdór ema iha gang respeitu haʼu. Haʼu sempre lori haʼu-nia kilat. Tuir loloos, kuandu haʼu toba, haʼu rai haʼu-nia kilat iha xumasu okos. Hahalok violénsia, uza droga, naʼok, tolok no hahalok la morál mak buat neʼebé baibain deʼit iha haʼu-nia moris. Polísia sempre buka atu kaer haʼu. Dala balu sira kaer duni haʼu no ba tinan barak haʼu tama-sai komarka.

Dala ida kuandu haʼu sai husi komarka, haʼu deside atu bá vizita haʼu-nia tia ida. Haʼu foin hatene katak haʼu-nia tia, primu ida no prima ida sai ona Testemuña ba Jeová. Sira konvida haʼu atu tuir Testemuña nia reuniaun ida. Tanba hakarak hatene, haʼu deside atu tuir. Bainhira ami toʼo Reuniaun-Fatin haʼu hakarak tuur besik odamatan atu haʼu bele haree sé mak tama-sai. Haʼu mós lori haʼu-nia kilat.

Reuniaun neʼe troka haʼu-nia moris. Sira-nia hahalok la hanesan duni ho ema seluk. Sira hasé haʼu ho laran-diʼak no hatudu oin-midar. Haʼu sei hanoin-hetan Testemuña sira-nia oin neʼebé hatudu katak sira mak laran-diʼak no laran-moos. Ema neʼebé baibain haʼu ransu hamutuk la hatudu hahalok hanesan neʼe.

Haʼu komesa estuda Bíblia ho Testemuña sira. Bainhira haʼu estuda Bíblia, haʼu aprende katak haʼu presiza troka duni dalan neʼebé haʼu halaʼo haʼu-nia moris. Haʼu halo tuir konsellu iha Provérbios 13:20 neʼebé hatete: “Ema neʼebé laʼo hamutuk ho ema matenek sei sai matenek, maibé ema neʼebé ransu ho ema beik sei hetan problema boot.” Haʼu rekoñese katak haʼu presiza haketak an husi gang. Ida-neʼe la fasil, maibé ho Jeová nia ajuda haʼu konsege halo nuneʼe duni.

Haʼu mós hapara haʼu-nia toman aat sira neʼebé hafoʼer isin. Haʼu hakaʼas an tebes no ikusmai para fuma no mós la uza tan droga. Haʼu tesi fuuk, hasai haʼu-nia brinkus no la tolok tan. Ba dala primeiru iha haʼu-nia moris, haʼu komesa kontrola haʼu-nia hahalok.

Haʼu la gosta lee no estuda, tan neʼe susar tebes ba haʼu atu tau atensaun bainhira estuda Bíblia. Maski nuneʼe, haʼu hakaʼas an, no neineik-neineik haʼu komesa hadomi Jeová. Haʼu-nia konxiénsia komesa fó-sala mai haʼu kona-ba haʼu-nia moris pasadu. Dala barak haʼu iha hanoin neʼebé negativu kona-ba haʼu-nia an no haʼu duvida katak Jeová bele fó perdua ba haʼu tanba haʼu halo sala barak. Bainhira haʼu sente hanesan neʼe, haʼu hetan kmaan hodi lee kona-ba oinsá Jeová fó perdua ba Liurai David kuandu nia halo sala neʼebé sériu.​—2 Samuel 11:1–12:13.

Susar mós ba haʼu atu haklaken husi uma ba uma. (Mateus 28:19, 20) Haʼu taʼuk tebes katak haʼu sei hasoru ema ruma neʼebé uluk haʼu hakanek. Maibé neineik-neineik haʼu manán haʼu-nia sentimentu taʼuk neʼe. Haʼu komesa sente kontente tebes hodi ajuda ema seluk aprende kona-ba ita-nia Aman iha lalehan neʼebé prontu atu fó perdua.

Aprende kona-ba Jeová salva haʼu-nia moris. Ema barak neʼebé uluk haʼu ransu, agora sira mate ka iha komarka laran, maibé haʼu iha moris kontente no iha esperansa kapás kona-ba futuru. Haʼu aprende atu hatudu haraik an, halo tuir no kontrola haʼu-nia an atu la halo hahalok violénsia. Rezultadu mak agora haʼu iha relasaun diʼak ho ema seluk. Haʼu iha moris kaben nian neʼebé kontente. Haʼu-nia feen naran Carmen. Ami hetan ksolok boot hodi ajuda ema seluk aprende Bíblia.

No agora haʼu halo serbisu seluk atu manán osan. Dala ruma haʼu-nia serbisu liga ho banku sira, maibé duké naʼok husi banku sira, haʼu hamoos banku sira!