Diabu no anju aat sira fó influénsia boot ba ema, tan neʼe Bíblia hatete: “Aat-naʼin mak domina mundu tomak.” (1 João 5:​19) Bíblia fó sai dalan oioin neʼebé Diabu uza atu fó influénsia ba ema.

•   Lohi. Bíblia anima ema Kristaun atu “hamriik metin hodi kontra Diabu nia lasu sira”. (Éfeso 6:​11) Lasu ida neʼebé Diabu uza mak hodi halo ninia atan sira haree hanesan Maromak nia atan.​—2 Korinto 11:13-​15.

•   Espiritizmu. Diabu fó influénsia ba ema liuhusi matan-dook, siʼikdór, no ema neʼebé buka sinál oioin ka estuda astrolojia. (Deuteronómio 18:10-​12) Uza droga, ipnotizmu, no medita iha dalan neʼebé halo neon mamuk bele halo fasil ba anju aat sira atu kontrola ita.​—Lucas 11:24-​26.

•   Relijiaun falsu. Relijiaun sira neʼebé hanorin doutrina falsu book ema atu la halo tuir Maromak. (1 Korinto 10:20) Bíblia dehan katak doutrina falsu mak “hanorin husi anju aat sira”.​—1 Timóteo 4:1.

•   Anju aat domina. Bíblia temi ezemplu kona-ba anju aat sira domina ema. Dala ruma ema neʼebé anju aat domina sai matan-delek, monok, ka bele mós hakanek sira-nia an.​—Mateus 12:22; Marcos 5:​2-5.

Oinsá atu proteje ita-nia an husi Diabu nia influénsia

 Ita la presiza sente taʼuk demais, tanba Bíblia hatudu oinsá ita bele kontra hasoru Diabu ho susesu:

•   Rekoñese dalan oioin neʼebé Diabu uza hodi nuneʼe Ita bele “hatene ninia lasu sira”.​—2 Korinto 2:​11.

•   Estuda Bíblia, no aplika buat neʼebé ita aprende. Se ita halo tuir Bíblia nia matadalan sira, neʼe sei proteje ita husi Diabu nia influénsia.​—Éfeso 6:​11-​18.

•   Soe buat hotu neʼebé liga ho anju aat sira. (Apóstolu 19:19) Neʼe inklui múzika, livru, poster, no vídeo sira neʼebé promove espiritizmu.