“Haraik an bá iha Maromak nia liman okos, atu nuneʼe nia bele foti aas imi iha tempu loloos, no iha tempu hanesan, entrega imi-nia laran-susar hotu ba nia, tanba nia hanoin imi.”—1 Pedro 5:6, 7, Tradusaun Mundu Foun.

 “Haraik an ba, iha Maromak kbiit Naʼin nia liman, atu iha tempu lo-los Nia sei foti imi. Saran imi nia laran taridu ba Nia, basa Nia hanoin imi.”—1 Pedro 5:6, 7, Liafuan diak ba imi, segunda edisaun.

 Ho liafuan sira-neʼe, apóstolu Pedro ajuda ema Kristaun sira atu fiar katak sira bele halo orasaun ba Maromak hodi fó sai sira-nia problema no laran-susar. Maromak hafolin ema neʼebé haraik an, no nia sei fó bensaun ba sira.

 “Haraik an bá iha Maromak nia liman okos.” Bíblia uza liafuan “Maromak nia liman” atu refere ba ninia forsa atu fó salvasaun no protesaun. (Éxodo 3:19; Deuteronómio 26:8; Ezras 8:22) Ema Kristaun sira hatudu haraik an iha Maromak nia liman okos bainhira sira sadere ba nia. Sira rekoñese sira-nia limitasaun no hatene katak sira labele manán hasoru susar oioin ho sira-nia kbiit rasik. (Provérbios 3:5, 6; Filipe 4:13) Sira fiar metin katak Maromak iha forsa atu ajuda sira iha tempu neʼebé loos no iha dalan neʼebé diʼak liu.—Isaias 41:10.

 “Atu nuneʼe nia bele foti aas imi iha tempu loloos.” Sira neʼebé tahan susar ho pasiénsia bele fiar metin katak Maromak sei foti aas sira, ka fó kolen ba sira. Nia sei la husik ninia atan sira atu hetan terus ba nafatin, ka liu sira-nia kbiit. (1 Korinto 10:13) Tuir loloos, se sira kontinua halo buat neʼebé diʼak, Maromak sei fó kolen ba sira “iha tempu neʼebé loos”.—Galásia 6:9.

 “Entrega imi-nia laran-susar hotu ba nia, tanba nia hanoin imi.” Ema Kristaun sira bele entrega sira-nia laran-susar hotu ba Maromak hodi halo orasaun ho haraik an. Livru ida neʼebé esplika kona-ba eskritura neʼe dehan: “Liafuan verbu entrega fó ideia kona-ba soe buat ruma ho forsa ba fatin neʼebé dook husi ita. Neʼe mak asaun neʼebé halo ho neon.” Kuandu ema Kristaun ida soe ona ninia laran-susar ba Maromak, nia bele hamenus ninia sentimentu hanoin barak no bele hetan fali “Maromak nia dame”. (Filipe 4:6, 7) Nia bele fiar katak Maromak hakarak ajuda nia tanba nia hatene katak Maromak hanoin nia no bele uza Ninia forsa boot atu apoia nia.—Salmo 37:5; 55:22.

 Kapítulu 5 mak kapítulu ikus husi apóstolu Pedro nia karta primeiru ba ema Kristaun sira. (1 Pedro 1:1) Hanesan ho ohin loron, Kristu nia dixípulu sira iha tempu neʼebá hasoru susar oioin neʼebé koko sira-nia fiar no bele halo sira laran-susar. (1 Pedro 1:6, 7) Tanba Pedro hatene sira hasoru susar oioin, nia hakerek ninia karta atu anima sira maizumenus iha tinan 62-64 EC.—1 Pedro 5:12.

 Pedro remata ninia karta ho lia-menon atu anima ema neʼebé hasoru susar oioin tanba sira-nia fiar. Se sira haraik an nafatin no sadere ba Maromak, sira bele fiar katak Maromak sei ajuda sira atu hamriik metin. (1 Pedro 5:5-10) Pedro nia liafuan neʼe mós bele anima ema Kristaun ohin loron neʼebé hetan susar tanba sira-nia fiar.

 Haree vídeo badak neʼe hodi komprende kona-ba livru 1 Pedro.