1  ஆரம்பத்தில் வார்த்தை என்பவர் இருந்தார்,+ அந்த வார்த்தை கடவுளோடு இருந்தார்,+ அந்த வார்த்தை தெய்வீகத்தன்மை உள்ளவராக இருந்தார்.+ ²  அவர் ஆரம்பத்தில் கடவுளோடு இருந்தார். ³  எல்லாம் அவர் மூலமாகத்தான் உண்டானது,+ அவரில்லாமல் எதுவுமே உண்டாகவில்லை. ⁴  அவர் மூலம் வாழ்வு உண்டானது, அந்த வாழ்வு மனிதர்களுக்கு ஒளியாக இருந்தது.+ ⁵  அந்த ஒளி, இருளில் பிரகாசித்துக்கொண்டிருக்கிறது;+ இருள் அதை அடக்கி ஆளவில்லை. ⁶  கடவுளுடைய பிரதிநிதியாக அனுப்பப்பட்ட ஒரு மனிதர் வந்தார்; அவருடைய பெயர் யோவான்.+ ⁷  அவர் ஒரு சாட்சியாக வந்தார்; எல்லா விதமான மக்களும் தன் மூலம் அந்த ஒளியில் நம்பிக்கை வைப்பதற்காக அந்த ஒளியைப் பற்றிச் சாட்சி கொடுக்க வந்தார்.+ ⁸  அவர் அந்த ஒளி அல்ல,+ ஆனால் அந்த ஒளியைப் பற்றிச் சாட்சி கொடுக்க வந்தவர். ⁹  எல்லா விதமான மனிதர்களுக்கும் ஒளி கொடுக்கிற அந்த உண்மையான ஒளி இந்த உலகத்துக்குச் சீக்கிரத்தில் வரவிருந்தார்.+ ¹⁰  அவர்* இந்த உலகத்தில் இருந்தார்.+ அவர் மூலமாக இந்த உலகம் உண்டானது,+ ஆனால் இந்த உலகம் அவரைப் பற்றித் தெரிந்துகொள்ளவில்லை. ¹¹  அவர் தன்னுடைய சொந்த தேசத்துக்கே வந்தார், ஆனால் அவருடைய சொந்த மக்களே அவரை ஏற்றுக்கொள்ளவில்லை. ¹²  இருந்தாலும், அவரை ஏற்றுக்கொண்ட எல்லாருக்கும் கடவுளுடைய பிள்ளைகளாகும் உரிமையைக் கொடுத்தார்.+ ஏனென்றால், அவருடைய பெயரில் அவர்கள் விசுவாசம் வைத்திருந்தார்கள்.+ ¹³  அவர்கள் இரத்தத்தாலோ இயற்கையான ஆசையாலோ ஆண்மகனின் விருப்பத்தாலோ பிறந்தவர்கள் அல்ல, கடவுளால் பிறந்தவர்கள்.+ ¹⁴  அந்த வார்த்தை ஒரு மனிதராகி*+ நம் மத்தியில் குடியிருந்தார். அவருடைய மகிமையைப் பார்த்தோம். அந்த மகிமை தகப்பனிடமிருந்து ஒரே மகனுக்கு*+ கிடைக்கும் மகிமையாக இருந்தது. அவர் அளவற்ற கருணையும்* சத்தியமும் நிறைந்தவராக இருந்தார். ¹⁵  (அவரைப் பற்றி யோவான் சாட்சி கொடுத்தார்; “‘எனக்குப் பின்னால் வரப்போகிறவர் எனக்கு முன்னால் போயிருக்கிறார்; ஏனென்றால், அவர் எனக்கு முன்பிருந்தே இருக்கிறார்’ என நான் சொன்னது இவரைப் பற்றித்தான்” என்று சத்தமாகச் சொன்னார்.)+ ¹⁶  அவர் அளவற்ற கருணை நிறைந்தவராக இருந்தார், அதனால் அவரிடமிருந்து நாம் எல்லாரும் அளவற்ற கருணைக்குமேல் அளவற்ற கருணையைப் பெற்றோம். ¹⁷  மோசேயின் மூலம் திருச்சட்டம் கொடுக்கப்பட்டது;+ ஆனால், இயேசு கிறிஸ்துவின் மூலம்+ அளவற்ற கருணையும்+ சத்தியமும் கிடைத்தன. ¹⁸  கடவுளை ஒருவரும் ஒருபோதும் பார்த்ததில்லை.+ தகப்பனின் பக்கத்தில் இருப்பவரும்*+ தெய்வீகத்தன்மை உள்ளவருமான+ அவருடைய ஒரே மகனே அவரைப் பற்றி விளக்கமாகச் சொல்லியிருக்கிறார்.+ ¹⁹  யூதர்கள் எருசலேமிலிருந்து ஆலய குருமார்களையும் லேவியர்களையும் யோவானிடம் அனுப்பி, “நீ யார்?”+ என்று கேட்டபோது, ²⁰  அவர் தயங்காமல், “நான் கிறிஸ்து அல்ல” என்று வெளிப்படையாக ஒத்துக்கொண்டார். ²¹  அதற்கு அவர்கள், “அப்படியானால், நீ எலியாவா?”+ என்று கேட்டார்கள். அப்போது அவர், “இல்லை” என்று சொன்னார். “நீதான் வரவேண்டிய தீர்க்கதரிசியா?”+ என்று கேட்டார்கள். அதற்கும் அவர், “இல்லை!” என்று சொன்னார். ²²  அதனால் அவர்கள், “அப்படியானால், நீ யார்? எங்களை அனுப்பியவர்களுக்கு நாங்கள் பதில் சொல்ல வேண்டும். உன்னைப் பற்றி என்ன சொல்கிறாய்?” என்று கேட்டார்கள். ²³  அதற்கு அவர், “‘யெகோவாவுக்கு* வழியைச் சமப்படுத்துங்கள்’+ என்று வனாந்தரத்தில் ஒருவர் சத்தமாகச் சொல்வார் என ஏசாயா தீர்க்கதரிசி சொன்னது என்னைப் பற்றித்தான்”+ என்றார். ²⁴  அப்போது, பரிசேயர்களால் அனுப்பப்பட்ட அந்த ஆட்கள் அவரிடம், ²⁵  “நீ கிறிஸ்துவும் அல்ல, எலியாவும் அல்ல, வரவேண்டிய தீர்க்கதரிசியும் அல்ல என்றால், எதற்காக ஞானஸ்நானம் கொடுக்கிறாய்?” என்று கேட்டார்கள். ²⁶  அதற்கு யோவான், “நான் தண்ணீரால் ஞானஸ்நானம் கொடுக்கிறேன். உங்கள் மத்தியில் ஒருவர் இருக்கிறார், அவர் யாரென்று உங்களுக்குத் தெரியாது. ²⁷  அவர் எனக்குப்பின் வரப்போகிறவர்; அவருடைய செருப்புகளின் வாரை அவிழ்ப்பதற்குக்கூட எனக்குத் தகுதியில்லை”+ என்று சொன்னார். ²⁸  இவையெல்லாம் யோர்தானுக்கு அக்கரையில் பெத்தானியாவில் நடந்தன. அங்கேதான் யோவான் ஞானஸ்நானம் கொடுத்துவந்தார்.+ ²⁹  அடுத்த நாள் இயேசு தன்னை நோக்கி வருவதை யோவான் பார்த்தபோது, “இதோ, உலகத்தின்+ பாவத்தைப் போக்குவதற்குக்+ கடவுளால் அனுப்பப்பட்ட ஆட்டுக்குட்டி!+ ³⁰  ‘எனக்குப்பின் வரப்போகிறவர் எனக்கு முன்னால் போயிருக்கிறார். ஏனென்றால், அவர் எனக்கு முன்பிருந்தே இருக்கிறார்’+ என்று நான் சொன்னது இவரைப் பற்றித்தான். ³¹  எனக்கும்கூட இவரைத் தெரியவில்லை. ஆனால், இவர் யாரென்று இஸ்ரவேல் மக்களுக்கு வெளிப்பட வேண்டும் என்பதற்காகவே தண்ணீரால் ஞானஸ்நானம் கொடுக்க வந்தேன்”+ என்று சொன்னார். ³²  அதோடு, “கடவுளுடைய சக்தி புறாவைப் போல் பரலோகத்திலிருந்து இறங்கி இவர்மேல் தங்கியதைப் பார்த்தேன்.+ ³³  எனக்கும்கூட இவரைத் தெரியவில்லை; ஆனால், தண்ணீரால் ஞானஸ்நானம் கொடுப்பதற்கு என்னை அனுப்பியவர், ‘கடவுளுடைய சக்தி இறங்கி யார்மேல் தங்குவதைப் பார்க்கிறாயோ+ அவர்தான் அந்தச் சக்தியால் ஞானஸ்நானம் கொடுப்பவர்’+ என்று என்னிடம் சொல்லியிருந்தார். ³⁴  அதை நான் பார்த்தேன், அதனால் இவர்தான் கடவுளுடைய மகன்+ என்று சாட்சி கொடுத்துவருகிறேன்” என்று சொன்னார். ³⁵  அடுத்த நாள், மறுபடியும் தன்னுடைய சீஷர்கள் இரண்டு பேரோடு யோவான் நின்றுகொண்டிருந்தார். ³⁶  அப்போது இயேசு நடந்துபோவதைப் பார்த்து, “இதோ! கடவுளால் அனுப்பப்பட்ட ஆட்டுக்குட்டி”+ என்று சொன்னார். ³⁷  அவர் அப்படிச் சொன்னதை அந்தச் சீஷர்கள் இரண்டு பேரும் கேட்டவுடன், இயேசுவின் பின்னால் போனார்கள். ³⁸  அவர்கள் தன் பின்னால் வருவதை இயேசு திரும்பிப் பார்த்து, “உங்களுக்கு என்ன வேண்டும்?” என்று கேட்டார். அப்போது அவர்கள், “ரபீ (இதற்கு “போதகரே” என்று அர்த்தம்), நீங்கள் எங்கே தங்கியிருக்கிறீர்கள்?” என்று கேட்டார்கள். ³⁹  அதற்கு அவர், “நீங்களே வந்து பாருங்கள்” என்று சொன்னார். அவர்களும் அவர் தங்கியிருந்த இடத்தைப் போய்ப் பார்த்தார்கள், அன்று அவருடன் தங்கினார்கள். அப்போது, சுமார் பத்தாம் மணிநேரமாக* இருந்தது. ⁴⁰  யோவான் சொன்னதைக் கேட்டு இயேசுவின் பின்னால் போன இரண்டு பேரில் ஒருவர் அந்திரேயா,+ இவர் சீமோன் பேதுருவின் சகோதரர். ⁴¹  இவர் முதலில் போய்த் தன்னுடைய சொந்த சகோதரராகிய சீமோனைப் பார்த்து, “நாங்கள் மேசியாவைக் கண்டுகொண்டோம்”+ என்று சொன்னார். (மேசியா என்பது “கிறிஸ்து” என்று மொழிபெயர்க்கப்படுகிறது). ⁴²  பின்பு, அவரை இயேசுவிடம் கூட்டிக்கொண்டு போனார். இயேசு அவரைப் பார்த்தபோது, “நீ யோவானுடைய மகன் சீமோன்;+ இனி கேபா என்று அழைக்கப்படுவாய்” என்றார். (கேபா என்ற வார்த்தை “பேதுரு” என மொழிபெயர்க்கப்படுகிறது).+ ⁴³  அடுத்த நாள், இயேசு கலிலேயாவுக்குப் போக விரும்பினார். அப்போது பிலிப்புவைப்+ பார்த்து, “என்னைப் பின்பற்றி வா” என்று சொன்னார். ⁴⁴  அந்திரேயாவையும் பேதுருவையும் போலவே இந்த பிலிப்புவும் பெத்சாயிதா நகரத்தைச் சேர்ந்தவர். ⁴⁵  இவர் நாத்தான்வேலைச்+ சந்தித்து, “தீர்க்கதரிசிகளும், திருச்சட்டத்தில் மோசேயும் யாரைப் பற்றி எழுதினார்களோ அவரை நாங்கள் கண்டுகொண்டோம். யோசேப்பின்+ மகனும் நாசரேத்தைச் சேர்ந்தவருமான இயேசுதான் அவர்” என்று சொன்னார். ⁴⁶  ஆனால் நாத்தான்வேல் அவரிடம், “நாசரேத்திலிருந்து நல்லது ஏதாவது வர முடியுமா?” என்று கேட்டார். அதற்கு பிலிப்பு, “நீயே வந்து பார்” என்று சொன்னார். ⁴⁷  நாத்தான்வேல் தன்னை நோக்கி வருவதை இயேசு பார்த்து, “இதோ! கள்ளம்கபடமில்லாத உத்தம இஸ்ரவேலன்”+ என்று சொன்னார். ⁴⁸  அதற்கு நாத்தான்வேல், “என்னை எப்படி உங்களுக்குத் தெரியும்?” என்று கேட்டார். அதற்கு இயேசு, “பிலிப்பு உன்னைக் கூப்பிடுவதற்கு முன்னால் நீ அத்தி மரத்தின் கீழ் இருந்தபோதே நான் உன்னைப் பார்த்தேன்” என்று சொன்னார். ⁴⁹  அதற்கு நாத்தான்வேல், “ரபீ, நீங்கள்தான் கடவுளுடைய மகன், நீங்கள்தான் இஸ்ரவேலின் ராஜா”+ என்று சொன்னார். ⁵⁰  அப்போது இயேசு அவரிடம், “அத்தி மரத்தின் கீழ் உன்னைப் பார்த்தேன் என்று சொன்னதால்தான் நம்புகிறாயா? இவற்றைவிட பெரிய காரியங்களை நீ பார்ப்பாய்” என்று சொன்னார். ⁵¹  பின்பு, அவரிடம், “வானம் திறந்திருப்பதையும் தேவதூதர்கள் மனிதகுமாரனிடம் இறங்குவதையும் அவரிடமிருந்து ஏறுவதையும்+ பார்ப்பீர்கள் என்று உண்மையாகவே உண்மையாகவே உங்களுக்குச் சொல்கிறேன்” என்றார்.