Kěnang pẹ̌pikirẹ̌ ini: Karen nakoạ sarang acara. Ndaị sene piạ hapị nẹ̌kui si sie.

I Karen němanda, i sie nakasilo hapịe Jessica nẹ̌bawa duam botol᷊ẹ̌ bir seng bọu niwuka. Jessica něgělị sěmbaụ si Karen, kụ naul᷊ị, ”Abe paul᷊ị i kau bědang kadodọ ang měnginung ini?”

I Karen tawe měnarimạ, katewe Jessica ini kai hapị e. I Karen mạdiri mạeng Jessica mẹ̌pikirẹ̌ i sie mẹ̌sul᷊ungu mangarariọ. Bọu ene lai i Jessica kai mapia. Mạeng i sie měnginung, ene tantu bal᷊inẹ barang nẹ̌sal᷊a. ’Ini kětạeng bir,’ angkuěng i Karen. ’Bal᷊inẹ narkoba.’

Mạeng i kau nakoạ i Karen, apa sarung koatengu?

Tadeạu makakoạ putusang mapaelẹ̌ su situasi kerene, i kau harusẹ̌ piạ jati diri. Jati diri ene kai kasingkạ i sai i kau, kụ apa pendirian u. Mạeng i kau masingkạ ene, i kau botonge měkoạ putusang hala, bal᷊inẹ měmala taumata wal᷊inẹ měngatorẹ̌ si kau.—1 Korintus 9:26, 27.

Kere apa tadeạu i kau piạ katatoghasẹ̌ kerene? Humotong, simbahẹ̌ko piram baụ kakiwal᷊o ini.

Mạeng i kau masingkạ kelebihan dingangu lawọ sipatẹ̌ u mapaelẹ̌, i kau sarung matoghasẹ̌ lumawang kapulung hapị.

CONTOH BỌU ALKITAPẸ̌: Rasul Paulus němohẹ, ”Aramanung iạ kai longong mẹ̌dudato, kai su hal᷊ẹ̌ u kasingkạ ute wal᷊inẹwe longong.” (2 Korintus 11:6) Ual᷊ingu i Paulus masingkạ lohong u Binohẹ Susi, i sie tatapẹ̌ matoghasẹ̌ maning piạ taumata lụlawang si sie.—2 Korintus 10:10; 11:5.

PARIKĚSA KEREA I KAU: Bawah sini, bohẹko bakat arau keterampilan u.

Bọu ene, bohẹko sipatẹ̌ u mapaelẹ̌. (Contone, apa i kau mapandung su taumata wal᷊inẹ? maělugẹ̌? botonge kapěngimangeng? tawe mạterlambatẹ̌?)

Kere rante matoghasẹ̌ botonge maběsụ ual᷊ingu sěmbaụ mata rantene seng nẹ̌karatẹ̌, kerene lai jati diri marusa mạeng i kau měmala kurangu měngatorẹ̌ si kau.

CONTOH BỌU ALKITAPẸ̌: I Paulus masingkạ apa kurange. I sie němohẹ, ”Dal᷊ungu naungku e měngkai lẹ̌lahimpuluang u torat’u Ruata, kaiso, iạ seng masingkạ u su ral᷊ungu watangengku piạ lai toratẹ̌ bal᷊inẹ kụ ’nakoạ tumanggihe’, arau lụlawang si siạ—ute kai toratẹ̌ mẹ̌děndokạ toratẹ̌ ilẹ̌akung laěnnaku. Kai ene hakị u iạ kạl᷊aikị torat’u rosa lụlambagẹ̌ batangengku.”—Roma 7:22, 23.

PARIKĚSA KEREA I KAU: Apa kurangkụ harusẹ̌ takụ bal᷊uiang?

Apa i kau mapulu sumake oto, kụ měngoro sopirẹ̌ e pělikụ sarang lana masue? Ene tawẹ apa gunane!

Apa těntirone? Mạeng piạ cita-cita, pěbawiahu tawe mẹ̌dal᷊ikụ su tala. I kau masingkạ apa harusẹ̌ koateng, kụ kerea měkoạ ene.

CONTOH BỌU ALKITAPẸ̌: Paulus němohẹ, ”Iạ tumal᷊angbe piạ timonane matuntụ.” (1 Korintus 9:26) I Paulus tawe němala apa nariadi měngatorẹ̌ si sie. I sie piạ cita-cita, kụ i sie měbẹ̌biahẹ̌ timol᷊e cita-citane ene.—Filipi 3:12-14.

PARIKĚSA KEREA I KAU: Bohẹko bawah sini tatělu cita-cita sarung koatengu měnětạ taung ini.

Mạeng tawẹ apa pendirian, i kau makoạ taumata tawe tatape. Mẹ̌sul᷊ungu bunglon i kau turusẹ̌ mẹ̌bal᷊ui tadeạu makoạ kere hapị u—ene měnodẹ i kau tawẹ apa jati diri.

Katewe, mạeng kakanoạ u mẹ̌sul᷊ung dingangu pendirian u, ene něnodẹ i kau piạ jati diri—tawe soal apa kẹ̌koateng taumata wal᷊inẹ.

CONTOH BỌU ALKITAPẸ̌: Su tempong bědang mangudạ, nabi Daniel ”měkẹ̌karakị arau bọu dal᷊ungu naunge” i sie mapulu tumuhụ hukung u Mawu, maning i sie marau bọu keluargane. (Daniel 1:8) Ene něnodẹ i Daniel piạ pendirian, kụ i sie timol᷊e pendirian ene su pěbawiahe.

PARIKĚSA KEREA I KAU: Apa pendirian u? Contone: Apa i kau mangimang su Mawu? Kawe i kau mangimang? Apa bukti makakoạ si kau mangimang Mawu kahěngang-hěngang ene?

Apa i kau mangimang standar moral bọu Mawu gunane si kau? Kawe i kau mangimang?

I kau mapulu makoạ kere sude—daukalu mahěgu nanawo nitiụ u anging tamai ramahi arau mẹ̌sul᷊ungu kalu tatapẹ̌ matoghasẹ̌ maning piạ anging maihạ? Pakatoghasẹ̌ jati dirinu, kụ i kau sarung makoạ kere kalu ene. I kau lai sarung botonge makasimbahẹ̌ kakiwal᷊o, I sai Iạ?