Ka June 2013 ho ile ha na pula e matla ka tsela e sa tloaelehang Europe bohareng hoo linōka li ileng tsa e-ja litlhokoa. Hungary, nōka ea Danube e ile ea tlala ho feta leha e le neng pele.

Ka lebaka la koluoa e ileng ea hlaha, Lefapha la Tsa Lihloliloeng la Hungary le ile la kōpa lekala la Lipaki Tsa Jehova la Hungary hore li le thuse ka ho thibela tšenyo e bakiloeng ke likhohola. Kahoo, lekala le ile la mema liphutheho tse haufi le nōka ea Danube hore li thuse ka mosebetsi oa ho thibela likhohola o neng o hlophisitsoe ke ba boholong.

Tsela eo liphutheho li ileng tsa arabela ka eona e ne e hlolla. Ka mor’a matsatsi a ’maloa, Lipaki tse 900 tse tsoang liphuthehong tse 72 li ile tsa tiisa mabōpo a linōka. Li ile tsa kōptjoa hore li apare libeche tsa tsona tsa kopano tse ngotsoeng “Lipaki Tsa Jehova,” hammoho le mabitso a tsona le metse eo li lulang ho eona.

Motseng o mong, moemeli oa Mokhatlo oa Sefapano se Sefubelu oa Hungary o ile a romela mantsoe a latelang phuthehong e ’ngoe: “Rea leboha ebile rea le hlompha kaha re qala ho bona mohlala o motle hakana oa bonngoe le moea oa ho thusa ho sa tsotellehe sebaka se hole seo le tsoang ho sona! Ke motlotlo ka mohlala o babatsehang oo le o bontšitseng motseng mona!”

Molula setulo oa mokhatlo oa liphallelo eo e boetseng e le setho sa Paramente ea Hungary, o ile a romela ofisi ea lekala lengolo la liteboho a leboha kamoo Lipaki li faneng ka tšehetso e ntle kateng.