INDONESIA
Pula-maliboho ea Sebete
André Elias
-
O HLAHILE KA 1915
-
O KOLOBELITSOE KA 1940
-
PALE EA BOPHELO BA HAE Pula-maliboho ea sebete ea ileng a lula a tšepahala ha a hlonngoa lipotso le ha a tšosoa ka hore o tla bolaoa.
NAKONG ea Ntoa ea II ea Lefatše, Mor’abo rōna Elias le mosali oa hae, Josephine, ba ile ba bitsetsoa ntlo-khōlō ea sepolesa sa sesole se tšajoang sa Makempeitai, Sukabumi, West Java. André o ile a kena pele ’me a hlonngoa lipotso tse ngata tse kang, “Lipaki Tsa Jehova ke bo-mang? Na u khahlanong le ’muso oa Majapane? Na u mpimpi?”
André o ile a re: “Re bahlanka ba Molimo ea Matla ’Ohle ’me ha ho letho le phoso leo re le entseng.” Ofisiri e ile ea nka sabole leboteng ’me ea e phahamisetsa holimo.
E ile ea mo kharumela ea re: “Eseng ke hle ke u bolaee hona joale?” André o ile a beha hlooho ea hae deskeng eaba o rapella ka pelong. Ka mor’a hore ho thōle ho se hokae, ofisiri eo e ile ea tšehela holimo. Eaba e re: “U sebete hee!” Ka mor’a moo e ile ea bitsa Josephine. Bopaki ba hae bo ile ba lumellana le ba André, ’me ofisiri eo ea re: “Ha le limpimpi. Tsamaeang!”
2 Bakor. 11:26) O ile a qeta likhoeli a phela ka ho thonaka makumane a lijo moo ho neng ho feta metsi a litšila seleng ea hae. Leha ho le joalo, o ile a lula a tšepahala ho Jehova. Nakong eo Josephine a mo etetseng, o ile a hoeshetsa a le ka mor’a litšepe tsa sele a re: “U se ke oa tšoenyeha. Ebang baa mpolaea kapa baa ntokolla, ke tla lula ke tšepahala. Nka mpa ka tsoa mona ke shoele ho e-na le hore ke fetohele Jehova.”
Likhoeling tse seng kae hamorao, André o ile a qosoa ke ‘barab’abo ba bohata,’ ’me a koalloa teronkong. (Ka mor’a hore André a qete likhoeli tse tšeletseng a le teronkong, o ile a ipuella ka pel’a Lekhotla le Phahameng la Jakarta eaba oa lokolloa.
Lilemo tse 30 hamorao, ha ’muso oa Indonesia o thibela mosebetsi oa Lipaki Tsa Jehova hape, mochochisi oa Manado, North Sulawesi, o ile a bitsetsa André ofising ea hae. Eaba o re: “Na oa tseba hore mosebetsi oa Lipaki o thibetsoe?”
André o ile a re: “E, kea tseba.”
Eaba mochochisi eo o re: “Na joale u ikemiselitse ho tlohela bolumeli boo ba hao?”
André o ile a bua ka sebete a re: “Ho mpolaea le ka mpolaea empa le ke ke la etsa hore ke tlohele bolumeli ba ka.”
Mochochisi o ile a re André a tsamaee ’me ha aa ka a hlola a mo tšoenya hape.
André o hlokahetse ka 2000 a le lilemo li 85, ka mor’a ho qeta lilemo tse 60 e le pula-maliboho ea chesehang.