Di mi gebore, mi papa nanga mama ben abi wan pikin burugron na ini wan boitipresi na Galicia, na a noord west-sei fu Spanyorokondre. Mi ben de a di fu fo pikin fu den aiti pikin fu mi papa nanga mama. Wi osofamiri ben de koloku. Na a ten dati sma na ini Spanyorokondre ben gwenti seni awansi wán fu den pikin fu den fu go studeri fu tron priester, noso non. Na ini wi osofamiri, dri fu unu du dati.

Di mi ben abi 13 yari, mi go tan na ini wan klooster na Madrid pe mi sisa ben e tan tu. A no ben switi fu tan drape èn yu no ben man meki mati. Wan lo wèt ben de, heri dei sma ben musu begi, èn drape ben gersi wan strafu-oso. Wi ben e kon makandra fruku mamanten fu denki dipi fu sani, ma nofo tron mi no ben e prakseri noti. Bakaten, wi ben e singi kerki singi èn wi ben e hori Mis. Ala sani ben e pasa na ini Latijntongo. Mi no ben e frustan noti èn mi ben e firi leki Gado ben de farawe fu mi. Heri dei mi ben musu tan pî. Srefi te mi ben miti mi sisa, dan a wan-enkri sani di wi ben mag taki na „Blesi santa Maria”. Te wi ben kaba nyan, dan wi ben e kisi primisi fu taki nanga makandra wan afu yuru nomo. Sani ben de heri tra fasi na oso pe mi ben de koloku! Mi ben e firi leki mi ben de mi wawan èn mi ben e krei furu.

Aladi mi no ben feni taki mi ben sabi Gado bun, toku mi tron wan non di mi ben abi 17 yari. Fu taki en leti, mi du nomo san sma ben fruwakti fu mi, ma heri esi mi bigin aksi misrefi efu na Gado ben wani taki mi tron wan non. Den non ben gwenti taki dati sma di ben e tweifri ben o bron na ini hel! Ma toku mi tan tweifri. Mi ben sabi taki Yesus Krestes no ben hori ensrefi aparti fu tra sma, ma a ben e gi sma leri èn a ben e yepi sma (Mateyus 4:23-25). Di mi ben abi 20 yari, mi no ben sabi moro fu san ede mi ben musu tan wan non. A fruwondru mi taki a non di ben e teki fesi taigi mi taki efu mi ben e tweifri, dan a moro bun mi gowe libi a klooster wantewante. Mi denki taki a ben frede taki tra non ben o bigin tweifri tu. Sobun, mi gowe libi a klooster.

 Di mi doro baka na oso, dan mi papa nanga mama no ben mandi na mi tapu. Ma fu di wroko no ben de fu feni na ini a dorpu fu wi, meki mi froisi go tan na Doisrikondre pe wan fu den brada fu mi ben e tan. A ben de fu wan Communist grupu fu Spanyorosma di ben gowe libi a kondre fu den. Mi ben e firi bun na mindri den sma dati di ben e feti gi den reti fu wrokoman èn gi den reti fu umasma. Sobun, mi tron wan Communist èn te fu kaba mi trow nanga wan sma fu a grupu. Mi ben denki taki mi ben e du wan bun sani fu di mi ben e prati Communist buku nanga tra sani gi sma èn mi ben e teki prati na waka fu sori taki mi no ben e agri nanga a tirimakti.

Ma baka wan pisi ten, mi lasi-ati baka. Mi ben feni taki den Communist no ben e du san den ben e taki. Mi kon si a sani dati moro krin na ini 1971, di wan tu yongu sma fu a grupu fu wi bron na Ambassade fu Spanyorokondre na ini Frankfurt. Den ben du dati fu di den no ben e agri nanga den sani di ben e pasa na ini Spanyorokondre pe wan ogri-ati tiriman ben de na makti. Ma mi no ben agri nanga a fasi fa den ben sori dati.

Di a fosi pikin fu mi gebore, dan mi taigi mi masra taki mi no ben o go moro na den konmakandra fu den Communist. Mi ben e firi leki mi ben de mi wawan fu di nowan fu den mati fu mi kon luku mi nanga mi beibi. Mi bigin aksi misrefi fu san ede Gado meki libisma. Sortu wini a abi fu pruberi fu kenki a libimakandra?

Na ini 1976, tu Kotoigi di ben e taki Spanyorotongo naki na wi doro èn den gi wi wan tu Bijbel buku. Di den kon baka, dan mi bigin poti wan lo aksi gi den. Mi aksi den fu san ede sma e pina, fu san ede ala sma no abi den srefi reti, èn fu san ede so furu kruktudu de. Mi no ben man bribi di den gebroiki Bijbel fu piki ibri aksi! Wantewante mi teki wan Bijbelstudie.

Na a bigin, mi ben e studeri soso fu kon sabi moro sani. Ma sani kon kenki di mi nanga mi masra bigin go na den konmakandra na ini a Kownukondre zaal fu Yehovah Kotoigi. Na a ten dati, wi ben abi tu pikin. Den Kotoigi ben e kon teki wi te na oso èn te wi ben de na den konmakandra, den ben e yepi wi nanga den pikin. Mi bigin lobi den Kotoigi.

Toku mi ben e tweifri ete na wan tu kerkileri. Mi bosroiti fu go luku mi famiri na ini Spanyorokondre. Mi omu, di ben de wan priester, pruberi fu tapu mi fu studeri Bijbel. Ma den Kotoigi fu drape yepi mi furu. Den gebroiki Bijbel fu piki den aksi fu mi, neleki fa den Kotoigi na ini Doisrikondre ben du dati. Mi go doro nanga a studie di mi drai go baka na Doisrikondre. Aladi mi masra bosroiti fu no studeri Bijbel moro fara, toku mi tan studeri. Na ini 1978, mi teki dopu kon tron wan Kotoigi fu Yehovah.

Den tru tori fu Bijbel yepi mi fu kon frustan fu san ede mi de na libi èn san na a moro bun fasi fu libi. Fu eksempre, 1 Petrus 3:1-4 e gi umasma deki-ati fu ’saka densrefi na ondro’ den masra, fu abi „bigi lespeki” gi den, èn fu kon abi ’safri fasi fu di dati warti srefisrefi gi Gado’. Den leri disi yepi mi fu tron wan moro bun wefi èn wan moro bun mama.

Mi de wan Kotoigi sowan 35 yari kaba. Mi breiti taki mi de fu a bigi famiri di e dini Gado na heri grontapu, èn mi breiti taki fo fu den feifi pikin fu mi e du a srefi.