A rai di Bijbel e gi trowpatna fu sori den fa den kan abi wan koloku trowlibi, na bun rai fu di a e komoto fu Yehovah Gado, a sma di seti a trowlibi. Bijbel e leri trowpatna fu kweki fasi di kan yepi den fu kon abi wan koloku trowlibi. A e warskow den tu gi fasi di kan pori a trowlibi. Boiti dati, a e leri den fa fu taki na wan fasi di e yepi den fu de koloku.—Leisi Kolosesma 3:8-10, 12-14.

Masra nanga wefi musu gi grani na makandra èn den musu lespeki makandra. Te den ala tu e teki a frantwortu di Gado gi den na ini a trowlibi, dan den sa de koloku.—Leisi Kolosesma 3:18, 19.

Trowpaar o man tan na makandra te den lobi makandra. Gado e leri wi fa fu lobi trawan. En nanga en Manpikin, Yesus, na heri bun eksempre fu sma di e sori trutru lobi gi trawan.—Leisi 1 Yohanes 4:7, 8, 19.

Te masra nanga wefi e si a trowlibi leki wan seti fu Gado, dan den o tan na makandra. Gado seti a trowlibi, so taki wan man nanga wan uma kan tan na makandra fu ala ten. Na so osofamiri no ben o pori makriki. A trowlibi kan tan waka bun fu di Gado meki man nanga uma leki patna di e fiti na makandra èn di kan yepi makandra. A meki den tu soleki fa ensrefi de, èn den man sori lobi tu neleki en.—Leisi Genesis 1:27; 2:18, 24.