A BEN de wan mamanten na ini West Afrika. Soleki fa a gwenti de, sma ben e bori èn a smeri fu sowsu nanga aleisi ben panya na ala sei. Umasma ben e waka pasa nanga bun bigi lai na tapu den ede. Yu ben kan yere tu fa sma ben e bari switi lafu aladi trawan ben e haritaki nanga sma fu man seri den sani fu den. Wantronso a son bigin piri en tifi.

Di wan grupu pikin si mi, dan den bigin singi èn dansi. Na so den gwenti du ala ten te den e si weti sma di den e kari Yovo. A singi ben bigin nanga „Yovo, Yovo, bon soir”, èn na a kaba fu en den ben e aksi „Gi wi wan sani noh?” Ma wan fu den boi no ben e singi. Di mi ben e waka gowe, dan a waka na mi baka èn a bigin meki sani nanga en anu. A ben gersi leki a ben e taki Dofusma-tongo. Na ini Amerkankondre, mi ben leri fu meki den letter fu na alfabet na ini a Dofusma-tongo fu Amerkankondre (ASL), ma na ini Benin sma e taki Fransitongo.

Mi meki muiti fu meki den aiti letter fu mi nen gi en. Wantewante a boi en fesi kenki fu di a ben breiti. A grabu mi anu èn a tyari mi pasa na ini wan tu smara pasi go na en oso. Neleki furu fu den oso drape, na oso fu en ben abi tu kamra èn a ben meki fu smenti ston. Den famiri fu en lon kon luku. Den alamala ben e taki Dofusma-tongo. San mi ben musu du now? Mi meki sani nanga mi anu fu sori den fa mi nen, èn mi skrifi na tapu wan papira taki mi na wan zendeling di e gi sma leri fu Bijbel èn taki mi ben o kon baka. Son birtisma di no ben dofu, kon drape tu èn den alamala seki den ede fu sori taki den ben feni dati bun. Mi aksi misrefi: ’San mi tyari misrefi kon poti na ini?’

Di mi doro oso, mi ben e prakseri: ’Wan sma musu de di kan yepi den sma disi fu kon sabi a sani disi di Gado pramisi: „Den yesi fu den dofuwan o yere”’ (Yesaya 35:5). Mi go ondrosuku sani pikinso. No so langa na fesi, lanti ben teri sma èn den kon si taki 12.000 sma di dofu noso di no man yere bun e libi na ini Benin. Mi skreki di mi kon si taki a no a Dofusma-tongo fu Fransikondre den dofusma fu drape ben e leri na skoro, ma na a Dofusma-tongo fu Amerkankondre. Ma mi sari di mi kon si taki nowan enkri Yehovah Kotoigi drape ben sabi a Dofusma-tongo fu Amerkankondre. Mi soktu èn mi taigi wan Kotoigi fu drape: „Mi winsi taki wan sma di sabi a Dofusma-tongo fu Amerkankondre ben kan kon dyaso fu yepi.” A piki mi: „Yu de dyaso kaba tòk?” A ben abi leti! Mi seni aksi wan buku di ben o yepi mi, èn sosrefi den DVD di Yehovah  Kotoigi meki na ini a Dofusma-tongo fu Amerkankondre. Yehovah piki den begi fu mi, fu di wan Kotoigi di ben sabi a Dofusma-tongo dati bun, froisi komoto fu Kamerun kon tan na Benin.

Te fu kaba, furu sma kon yere taki mi ben e leri Dofusma-tongo. Sma taigi mi taki mi ben musu go luku Brice, wan man di ben e ferfi sani gi sma. A wrokope fu en ben tapu nanga pina-wiwiri di brei kon na wán. Ma aladi a weer ben faya na ini a kontren drape, toku switi winti ben e wai na ini a wrokope fu en. Fu di omeni yari langa a gwenti figi en kwasi na den skotu fu en, meki den skotu abi ala sortu kloru. A figi tu sturu meki wi sidon, ne a sidon luku mi meki mi bigin taki. Mi poti wan DVD na ini a pikin DVD player fu mi. Ne a hari en sturu kon moro krosibei fu man si bun. „Mi e frustan! Mi e frustan!” Na dati a meki gi mi nanga en anu. Den pikin fu a birti waka kon tanapu na wi lontu èn den langa den neki fu man si. Wan fu den bari taki: „Fu san ede den e luku felem sondro sten?”

Ibri leisi te mi ben e go baka na Brice, a grupu sma di ben e tanapu lontu a DVD player ben e kon moro bigi. Heri esi Brice nanga trawan bigin kon na den Kresten konmakandra fu wi. Fu di mi ben e pruberi fu vertaal gi den, meki mi leri taki a tongo moro bun. Di a grupu ben e kon moro bigi, dan sonwan fu den ben e kon suku mi srefi. Fu eksempre, wan dei na owru wagi fu mi ben e meki wan lo babari di mi ben e rèi go na ini olo, soso fu wai pasi gi krabita nanga agu di ben e wakawaka na strati. Ne wantronso mi yere wan sani naki na bakasei fu a wagi. Mi prakseri: ’Mi Gado, mi no howpu a wagi broko baka!’ Ma a no dati ben pasa. Na wan dofuman ben e lon baka mi wagi e suku fu kari mi. Na en ben e naki na tapu a wagi!

Na ini tra foto, grupu ben seti tu fu sma di ben e taki a Dofusma-tongo fu Amerkankondre. Di den brada seti sani fu hori wan tu lezing na ini Dofusma-tongo na den kongres fu wi di e hori ala yari, dan den aksi mi tu fu vertaal gi den sma. Di mi ben e tanapu na tapu a podium e wakti meki a takiman bigin, dan fu wan momenti mi prakseri a fosi leisi baka di mi bigin dini leki zendeling. Na a ten dati, mi ben gwenti aksi misrefi: ’San mi kan du moro leki zendeling na ini Afrika?’ Mi luku den sma di ben de na a kongres èn mi ben sabi taki mi ben kisi piki tapu na aksi fu mi. Mi kan tron wan zendeling di e yepi dofusma. Now mi no e aksi misrefi moro: ’San mi tyari misrefi kon poti na ini?’