Yesaya 60:1 e taki: „Uma, opo èn skèin yu leti, bika yu leti kon. A glori fu Yehovah e skèin na yu tapu.” Den tra tekst na ini a kapitel disi e sori taki na „uma” ben de Zion, noso Yerusalem di ben de a mamafoto fu Yuda na a ten dati (Yes. 60:14; 62:1, 2). A foto e prenki a heri pipel fu Israel. Den wortu fu Yesaya e meki tu aksi opo kon: A foswan, na: O ten Yerusalem „opo” èn skèin leti na wan agersi fasi èn fa du dati? A di fu tu aksi di e opo kon, na: Den wortu fu Yesaya e kon tru na wan moro bigi fasi na ini a ten disi?

O ten Yerusalem „opo” èn skèin leti na wan agersi fasi èn fa a du dati? Yerusalem nanga a tempel fu en ben de wan brokopresi di den Dyu ben de na ini katibo 70 yari langa na ini Babilon. Ma baka di den Mediasma nanga den Persiasma teki Babilon abra, dan den Israelsma di ben e libi na difrenti pisi fu grontapu, ben kan drai kon baka na a kondre fu den fu seti a tru anbegi baka (Esra 1:1-4). Bigin na ini 537 Fosi Krestes, wan getrow grupu Dyu di ben tan abra fu ala den 12 lo, drai go baka na Yerusalem (Yes. 60:4). Den bigin tyari ofrandi gi Yehovah, den bigin hori den fesa, èn den bigin bow a tempel baka (Esra 3:1-4, 7-11; 6:16-22). A glori fu Yehovah bigin skèin baka tapu Yerusalem, noso tapu a pipel fu en di ben bigin anbegi en baka. Na so a pipel fu Gado kon de leki wan leti gi den pipel di no ben sabi Yehovah.

Ma den profeititori fu Yesaya no kon tru dorodoro na a ten dati. Furu fu den Israelsma no tan gi yesi na Gado (Neh. 13:27; Mal. 1:6-8; 2:13, 14; Mat. 15:7-9). Bakaten den weigri srefi fu poti bribi na ini a Mesias, Yesus Krestes (Mat. 27:1, 2). Na ini a yari 70, Yerusalem nanga a tempel kisi pori fu a di fu tu leisi.

Yehovah ben taki dati a sari sani dati ben o psa (Dan. 9:24-27). A de krin taki a no ben abi na prakseri fu meki den profeititori na ini Yesaya kapitel 60 kon tru dorodoro na ini a Yerusalem na grontapu.

Den wortu fu Yesaya e kon tru na wan moro bigi fasi na ini a ten disi? Iya, ma den sani disi ben o psa nanga wan tra agersi uma. Dati na „a Yerusalem di de na tapusei”. Na apostel Paulus ben skrifi fu en: „En na wi mama” (Gal. 4:26). A Yerusalem di de na tapsei, na a pisi fu Gado en organisâsi di de na hemel èn di abi getrow engel di e dini Gado. Den pkin fu en na Yesus nanga den 144.000 salfu Kresten di neleki Paulus abi a howpu fu libi na hemel. Den salfu Kresten de wan „santa pipel” di Bijbel e kari „na Israel fu Gado”.​—1 Petr. 2:9; Gal. 6:16.

Fa a Yerusalem di de na tapusei „opo” èn ’skèin leti’? A du dati nanga yepi fu den salfu pkin fu en na grontapu. Luku fa den sani di den ondrofeni e kruderi nanga den sani di skrifi na ini a profeititori na ini Yesaya kapitel 60.

Den salfu Kresten ben musu „opo” fu di den ben de na dungru. Dati ben kon fu di moro nanga moro sma ben e fadon kmoto na bribi baka di den apostel dede (Mat. 13:37-43). Na a ten dati den ben de na ondro a makti fu Babilon a Bigiwan, di e prenki ala den falsi kerki na heri grontapu. Den salfuwan tan na ondro a makti fu den kerki disi teleki a pisi ten di Bijbel e kari „a  kaba fu a grontapu disi”, èn a pisi ten dati bigin na ini a yari 1914 (Mat. 13:39, 40). Syatu baka dati, na ini 1919, den kon fri, èn wantewante den bigin preiki a bun nyunsu fu a Kownukondre fayafaya. Na so den bigin skèin leti na wan agersi fasi. a Na ini den yari di psa, sma fu ala kondre kon na a leti disi, sosrefi den sma di ben tan abra fu na Israel fu Gado. Dati na den „kownu” di kari na Yesaya 60:3.​—Openb. 5:9, 10.

Na ini a ten di e kon, salfu Kresten o skèin a leti fu Yehovah na wan moro bigi fasi. Fa so? Te a libi fu den na grontapu kon na wan kba, dan den o tron wan pisi fu a „Nyun Yerusalem”. Disi na den 144.000 kownu nanga priester di de a trowmisi fu Krestes.​—Openb. 14:1; 21:1, 2, 24; 22:3-5.

Neleki fa a regering fu Israel ben de na ini a Yerusalem na grontapu, na so a Nyun Yerusalem di o abi Krestes leki Kownu, o tron a regering fu a nyun grontapu. Disi o de wan prenspari fasi fa Yesaya 60:1 o kon tru (Luku Yesaya 60:1, 3, 5, 11, 19, 20 nanga Openbaring 21:2, 9-11, 22-26.) Fa a Nyun Yerusalem e „saka komopo fu Gado na ini hemel”? A o du sani di o tyari kenki kon na grontapu. Sma fu ala pipel di e lespeki Gado „o waka na ini a leti fu a foto”. Den no o sondu moro èn den no o dede moro tu (Openb. 21:3, 4, 24). A bakapisi o de taki „ala sani [o] kon bun baka”, soleki fa Yesaya nanga tra profeiti ben taki (Tori 3:21). A bigi wroko disi bigin di Krestes tron Kownu èn a o kon na wan kba na a kba fu a Dusun Yari Tiri.