Na ini na artikel na fesi wi luku san na den sani di ben o pasa soleki fa Yesus ben taki. Fu di ala den sani dati e pasa kaba, meki wi sabi taki Gado Kownukondre seti kaba na hemel èn taki Yesus Krestes tron Kownu.

Bijbel e sori taki te Yesus ben o bigin tiri leki Kownu, a ben o trowe Satan nanga den ogri yeye fu hemel kon na grontapu. Now den abi makti soso na grontapu. Dati na wán fu den sani di e meki taki grontapu kon ogri so sensi a yari 1914.​—Openbaring 12:7, 9.

Aladi a situwâsi na grontapu e kon moro ogri, Yesus, a Kownu fu Gado Kownukondre, du sani fu yepi sma na heri grontapu. Fu di sma na heri grontapu ben o kisi leri fu Bijbel soleki fa Yesus ben taki na fesi, meki furu sma na ini a ten disi e leri fu du san Bijbel e taki (Yesaya 2:2-4). Milyunmilyun sma leri fu no meki wroko tron a moro prenspari sani na ini den libi. Den leri tu fa fu kon abi wan moro bun osofamiri-libi èn fu no feti baka gudu. Den sma dati e leri fu kenki den libi nownow kaba èn fu tron sma di Gado feni bun fu libi na ini wan grontapu di Gado Kownukondre o tiri.

Aladi Yesus e tiri kaba na hemel, toku libisma regering e tiri grontapu ete. Ma Gado ben taigi Yesus: „Go na mindri den feanti fu yu èn poti den na yu ondro” (Psalm 110:2). Heri esi, Yesus o puru ala en feanti na pasi. A o de neleki wan hebi komoto na tapu den sma di wani arki Gado.

Luku san Gado Kownukondre o du heri esi:

• A o tyari wan kaba kon na falsi bribi. Bijbel e agersi falsi bribi nanga wan huru-uma di o kisi pori heri esi. Den kerki di leri sma lei fu Gado èn di kwinsi sma o kisi pori. Furu sma o skreki te dati pasa.​—Openbaring 17:15, 16.

• Libisma tiri no o de moro. Gado Kownukondre o tyari wan kaba kon na ala libisma tiri.​—Openbaring 19:15, 17, 18.

• A o puru ogri sma na pasi. Fa a de nanga den sma di de nomonomo fu du ogri èn di no wani arki Gado? „Gado o figi den ogri sma puru na grontapu.”​—Odo 2:22.

• A o puru Satan nanga den ogri yeye na pasi. Satan nanga den ogri yeye no o man „kori den pipel moro”.​—Openbaring 20:3, 10.

San ala den sani disi wani taki gi den sma di e saka densrefi na ondro Gado Kownukondre?

Yesus di e tiri leki Kownu na hemel, o man du moro leki san iniwan libisma tiriman ben man du. A o tiri makandra nanga 144.000 sma di Gado teki puru fu grontapu (Openbaring 5:9, 10; 14:1, 3). A o sorgu taki a wani fu Gado pasa dyaso na grontapu. San Gado Kownukondre o du gi den sma di o libi na grontapu?

• A o tyari wan kaba kon na siki nanga dede. „Nowan sma di e tan na ini a kondre o taki: ’Mi siki.’” „Dede no o de moro.”​—Yesaya 33:24; Openbaring 21:4.

• A o sorgu taki trutru freide de èn taki sani e waka bun. „Ala sani o waka bun” gi den pikin fu yu. „Ibriwan sma o sidon na ondro en eigi droifibon nanga en eigi figabon. Nowan sma o meki den frede.”​—Yesaya 54:13; Mika 4:4.

• A o gi sma wroko di e gi den prisiri. „Den wan di mi teki o nyan bun fu a wroko di den du. Den no o wroko tranga fu soso.”​—Yesaya 65:22, 23.

• A o sorgu taki a gron, a weer nanga tra sani na grontapu kon bun baka. „A sabana nanga den presi sondro watra o bari fu prisiri. Iya, a drei sabana o breiti srefisrefi èn a o lai bromki.”​—Yesaya 35:1.

• A o leri sma san den musu du fu man libi fu têgo. „Efu sma wani kisi têgo libi, den musu leri sabi yu, a wan-enkri tru Gado, èn a sma di yu seni kon, Yesus Krestes.”​—Yohanes 17:3.

Gado wani taki yu kisi den blesi disi (Yesaya 48:18). A tra artikel o sori san yu kan du nownow kaba fu man kisi a moi libi dati.