MI MAMA aksi mi: „Fu san ede yu no wani anbegi den afo fu yu? Yu no sabi taki na fu den ede yu de na libi tide? Fu san ede yu no e warderi den? Fa yu kan drai baka gi den gwenti di de na ini wi famiri so langa kaba? Efu yu taki dati yu no wani gi den afo fu wi grani, dan yu wani taigi wi taki a bribi fu wi na wan lawlaw sani.” Baka di mi mama taki den sani disi a bigin krei.

Wan tu mun fosi a sani disi pasa, den Kotoigi ben aksi mi mama fu studeri Bijbel. A no ben wani. Ma fu no hati a firi fu den Kotoigi, meki a aksi mi efu mi ben wani studeri. Sobun, mi no ben man frustan fu san ede en ati ben e bron nanga mi now. Noiti mi ben trangayesi mi mama. Dati meki a ben hebi gi mi fu no du san a aksi mi. Ma disi leisi mi ben abi fu trangayesi en fu di mi ben wani du san Yehovah taki. A no ben makriki, ma Yehovah gi mi a krakti.

Mi famiri ben abi a Buda bribi, neleki furu sma na ini Yapan. Ma baka di mi studeri tu mun nanga Yehovah Kotoigi mi ben de seiker taki na tru sani Bijbel e leri. Di mi leri taki Gado na mi Papa na hemel, mi ben angri fu kon sabi en. Mi nanga mi mama ben lobi taki fu den sani di mi ben e leri. Te fu kaba mi bigin go na den konmakandra te sonde. Di mi kon frustan moro bun san Bijbel e leri, mi taigi mi mama taki mi no ben o du den sani fu a Buda bribi moro. Wantronso mi mama kenki. A taigi mi: „Na wan bigi syen fu abi wan sma na ini a famiri di no lobi den afo fu wi.” A ben wani taki mi tapu nanga a Bijbelstudie èn taki mi no go na den konmakandra moro. Noiti mi ben denki taki mi mama ben o taki den sani disi! A ben gersi wan heri tra sma.

Mi papa ben teki mi mama sei. Na ini Efeisesma kapitel siksi, mi ben leri taki Yehovah wani taki mi gi yesi na mi papa nanga mama. Na a bigin, mi ben denki taki efu mi ben o arki den, den ben o arki mi tu. Dan sani ben o go bun baka na ini wi osofamiri. Wan tra sani na taki mi ben abi fu meki eksame na skoro èn mi ben musu sreka gi dati. Dati meki mi taigi mi papa nanga mama taki dri mun langa mi no ben o go na den konmakandra. Ma mi ben pramisi Yehovah taki baka den dri mun, mi ben o go na den konmakandra baka.

Ma disi no ben de wan bun bosroiti. Fu san ede? Na a fosi presi, mi ben denki taki awinsi mi no go dri mun langa na den konmakandra, mi  ben o tan lobi Yehovah ete. Ma dati no pasa. Na presi fu dati, a bribi fu mi ben kon swaki esi-esi. Wan tra sani di e sori taki mi no teki wan bun bosroiti, na taki mi papa nanga mama bigin du moro muiti fu tapu mi fu anbegi Yehovah.

Na a Kownukondre zaal mi ben miti furu Kotoigi di ben kisi gens fu den famiri tu. Den sori mi taki Yehovah ben o gi mi krakti (Mat. 10:34-37). Den yepi mi fu frustan taki efu mi horidoro, mi ben o man yepi mi famiri fu leri sabi Yehovah. Dati meki mi bigin begi fayafaya fu di mi ben wani leri fa fu frutrow tapu Yehovah.

Mi famiri ben e gens mi na difrenti fasi. Mi mama ben begi mi fu tapu nanga a studie èn a ben suku fu sori mi fu san ede a ben o bun fu du dati. Nofo tron mi no ben e piki en. Ma te mi ben piki en, dan wi ben e kisi trobi fu di wi ala tu ben feni taki wi abi leti. Now mi e si taki efu mi ben e hori mi mama firi na prakseri èn mi ben e sori lespeki gi a bribi fu en, dan wi no ben o kisi so furu trobi. Fu di mi papa nanga mama no ben wani mi go na strati, meki den gi mi moro wroko fu du na oso. Son leisi den ben e sroto mi na doro noso den no ben e libi nyanyan gi mi.

Mi mama go suku yepi tu na tra sma fu meki mi kenki mi prakseri. A aksi wan meneer na skoro fu taki nanga mi, ma a meneer no ben wani bumui. Mi mama tyari mi go na en basi na wrokope tu, fu meki a sori mi taki nowan kerki bun. Te mi mama ben de na oso, dan a ben e bel omeni famiriman èn nanga watra-ai a ben e begi den fu yepi en. A sani dati ben e hati mi. Ma te mi ben de na den konmakandra, den owruman ben e gi mi deki-ati fu luku a tori tra fasi. Den taigi mi fu  no broko mi ede, ma fu prakseri ala den sma di mi mama ben e preiki gi den sondro fu a sabi.

Baka dati mi papa nanga mama ben wani taki mi go na universiteit, so taki mi ben kan feni wan bun wroko. Na a ten dati, wi no ben man taki fu a tori fu di wi alamala ben mandi nanga makandra. Dati meki wan tu leisi mi skrifi brifi gi mi papa nanga mama fu taigi den san mi ben wani du. Nanga atibron mi papa taigi mi: „Efu yu denki taki yu man feni wan wroko, dan sorgu taki yu abi en tamara noso yu o abi fu froisi.” Mi begi Yehovah fu a tori. A tamara fu en di mi ben de na ini a preikiwroko, wan sisa aksi mi fu gi en pikin les na oso. A srefi dei dati wan tra sisa aksi mi a srefi sani. Mi papa no ben breiti nanga a sani disi èn a no ben wani taki nanga mi moro. A ben e du srefi leki a no e si mi. Mi mama taigi mi taki betre mi ben go du ogri, na presi taki mi tron wan Kotoigi fu Yehovah.

Son leisi mi ben e tweifri efu Yehovah ben e feni en bun taki mi no du furu fu den sani di mi papa nanga mama ben wani. Te mi ben e begi èn mi ben e prakseri den Bijbeltekst di e sori fa Yehovah lobi wi, dan dati ben e yepi mi fu kon si sani tra fasi. Na so mi kon frustan taki mi papa nanga mama ben e broko den ede nanga mi. Yehovah sori mi fa mi musu si a tori èn san mi musu du. Boiti dati, o moro mi ben e go na ini a preikiwroko, o moro mi ben e prisiri. Dati meki mi ben wani tron wan pionier.

Wan tu sisa di ben sabi taki mi ben wani pionier, gi mi a rai fu wakti teleki na ati fu mi papa nanga mama kon kowru. Mi begi Gado fu gi mi koni, mi go leisi fu a tori, mi go prakseri fu san ede mi wani pionier èn mi taki nanga wan tu lepi brada nanga sisa. Baka dati mi bosroiti fu du ala san mi man fu meki Yehovah prisiri nanga mi. Mi ben frustan tu taki awinsi mi ben o wakti fu bigin pionier, toku disi no ben wani taki dati mi papa nanga mama no ben o gens mi moro.

Mi bigin pionier na ini a lasti yari fu middelbaar skoro. Di mi pionier wan pisi ten kaba, mi ben wani go preiki na wan kontren pe moro yepi ben de fanowdu. Ma mi papa nanga mama no ben wani mi froisi. Dati meki mi wakti teleki mi tapu 20 yari. Dan mi aksi den brada fu a bijkantoro fu seni mi go na wan presi na zuid-sei fu Yapan, krosibei pe den famiri fu mi e tan. Na so mi mama no ben o broko en ede tumusi.

Di mi ben de drape, mi ben prisiri fu si taki wan tu Bijbelstudie fu mi teki dopu. Mi bigin leri Ingrisitongo tu so taki mi ben kan du moro na ini a diniwroko. Na ini a gemeente pe mi ben de yu ben abi tu spesrutu pionier. Mi si taki den brada dati ben de fayafaya èn taki den ben lobi yepi trawan. Na eksempre fu den meki taki mi ben wani tron wan spesrutu pionier tu. Na a pisi ten dati, a pasa tu leisi taki mi mama kon siki srefisrefi. Ala den tu leisi, mi drai go na oso baka fu sorgu gi en. A sani dati fruwondru en èn a safu en ati pikinso.

Baka seibi yari mi kisi wan brifi fu Atsushi, wan fu den brada di ben de spesrutu pionier na ini a gemeente fu mi. Na ini a brifi a skrifi taki a ben wani trow èn taki a ben wani sabi efu mi abi firi gi en. Mi no ben abi lobifiri gi Atsushi. Boiti dati, mi no ben sabi taki a ben abi firi gi mi. Wán mun baka dati, mi skrifi en baka taki mi ben wani kon sabi en moro bun. Te fu kaba wi kon si taki wi ala tu ben lobi a furuten diniwroko èn taki wi ben de klariklari fu go dini awinsi pe den ben o seni wi go. Baka wan pisi ten wi trow. Mi ben  breiti taki mi papa, mi mama nanga wan tu tra famiri kon na a trow fu wi!

Fosi yu denki, Atsushi bigin yepi nanga a kring-wroko wawan leisi, aladi wi ben e dini leki gewoon pionier. Syatu baka dati wi kisi tra blesi tu. Mi nanga Atsushi tron spesrutu pionier èn baka dati wi bigin du a kring-wroko. Baka di wi go na ala den gemeente pe wi ben musu go, a bijkantoro bel aksi wi efu wi ben o wani go du kring-wroko na Nepal.

Mi ben aksi misrefi fa mi papa nanga mama ben o feni en efu mi ben go so fara. Ma di mi bel den, mi papa taigi mi: „Yu o go na wan moi presi.” A wiki na fesi, wan mati fu en ben gi en wan buku di ben e taki fu Nepal èn mi papa ben prakseri srefi fu go koiri drape wan dei.

Wi ben e prisiri fu dini na ini Nepal pe den sma abi switifasi. Bakaten wi kisi a grani tu fu go na Bangladesh. Aladi a ben de so krosibei fu Nepal, toku a kondre dati ben de heri tra fasi. Drape wi ben man preiki na omeni sortu fasi tu. Baka feifi yari den seni wi go baka na Yapan pe wi e du a kring-wroko te now ete.

Mi leri so furu fu Yehovah di mi ben dini na ini Yapan, Nepal nanga Bangladesh. A kulturu nanga den gwenti fu den sma na ini ibriwan fu den kondre disi e difrenti èn ibri sma de tra fasi. Mi si fa Yehovah e sorgu gi sma, fa a e yepi den èn fa a e blesi den. Mi si tu taki a no e desko sma.

Mi srefi Yehovah blesi tu. A meki mi kon sabi en, a gi mi wroko fu du èn a gi mi wan bun masra di lobi en. Gado yepi mi fu teki bun bosroiti èn now mi de bun nanga en èn nanga mi famiri. Tangi fu Yehovah meki mi nanga mi mama tron mati baka. Mi breiti taki mi kon bun nanga Gado èn nanga mi mama.