A di fu tu brifi gi den Korentesma 8:1-24
8 Brada, now wi wani meki unu kon sabi taki Gado sori bun-ati na den gemeente fu Masedonia.
2 Den ben e pina fu di hebi tesi ben e miti den. Ma aladi den ben pôti srefisrefi, toku den ben abi prisiri pasa marki. Den sori taki den gudu fu di den ben lobi fu gi sani.
3 Bika den ben gi san den ben man gi. Iya, mi kan taki dati den gi moro leki san den ben man gi.
4 Densrefi begi wi tangitangi efu den ben kan kisi a grani fu gi sani èn fu yepi den santawan.
5 Den du moro srefi leki san wi ben fruwakti. Fosi, den gi densrefi na Masra èn na wi soleki fa Gado wani.
6 Dati meki wi gi Titus a deki-ati fu klari a wroko di a bigin du na un mindri. Sobun, meki a teki ala den sani di unu gi nanga un heri ati.
7 Sani e waka bun nanga unu trutru. Un bribi tranga, unu sabi fa fu taki, unu abi furu sabi, unu de fayafaya srefisrefi èn unu e sori a srefi lobi di wi abi gi unu. Dati meki wi howpu taki unu de klariklari tu fu gi sani nanga un heri ati.
8 Te mi e taki den sani disi, dan a no wan komando mi e gi unu, ma mi wani unu fu sabi taki den trawan de fayafaya èn mi wani si efu unu abi trutru lobi.
9 Bika unu sabi fa wi Masra Yesus Krestes sori unu bun-ati. Aladi a ben gudu, toku a kon pôti fu unu ede. A pôtifasi fu en meki taki unu kan kon gudu.
10 Mi o taigi unu fa mi e denki fu a tori dati. A bun gi unu te unu e klari a wroko disi. Mi si taki wan yari pasa kaba di unu bigin du a sani disi èn unu sori taki unu wani du en trutru.
11 We dan, un musu klari san unu bigin du. Un gi san unu man gi èn du dati nanga a srefi faya di unu ben abi na a bigin.
12 Te wan sma de klariklari fu gi, dan dati bun spesrutu te a gi san a man gi. A no musu gi san a no man gi.
13 Bika mi no wani meki a de makriki gi trawan aladi a hebi gi unu.
14 Un musu gebroiki san unu abi bogobogo fu yepi den wan di e mankeri sani. Dan densrefi kan gebroiki san den abi bogobogo fu yepi unu te unu mankeri sani. Na so unu kan tapu den nowtu fu makandra.
15 A de soleki fa Gado Buku taki: „A sma di ben abi furu, no ben abi tumusi furu, èn a sma di ben mankeri sani, no ben mankeri furu.”
16 Wi e taki Gado tangi taki Titus e broko en ede nanga unu neleki fa wi e du dati.
17 Dati meki a du san wi gi en deki-ati fu du. Ma a no kon na unu soso fu di na wi seni en. Ensrefi ben wani kon na unu trutru.
18 Nanga en wi e seni a brada di ala den gemeente e prèise fu a fasi fa a e preiki a bun nyunsu.
19 Den gemeente poti en fu go nanga wi, so taki a kan tyari den sani di unu gi nanga un heri ati èn prati den. Na so Masra kan kisi glori. Na so wi kan sori tu taki wi de klariklari fu yepi trawan.
20 Na so fasi wi no e gi sma okasi fu krutu wi te wi e prati den sani di unu gi nanga un heri ati.
21 Bika te wi „e seti sani, wi e du dati nanga wan krin ati na fesi Yehovah èn na fesi libisma”.
22 Boiti dati, wi e seni wan tra brada nanga den. Wi sabi en leki wan sma di de fayafaya na ini ala san a e du. Ma now a o abi moro faya, fu di a e frutrow unu trutru.
23 Ma efu unu no e frutrow Titus, dan mi kan taigi unu taki a e wroko nanga mi fu yepi unu. Efu unu no e frutrow den brada fu wi, dan mi kan taigi unu taki den na apostel fu den gemeente èn den e gi Krestes glori.
24 Fu dati ede, sori den taki unu lobi den èn taki a no fu soso wi meki bigi gi unu na ini den gemeente.
