Suma e go na hemel?
A piki fu Bijbel
Gado teki wan tu reti-ati Kresten fu go libi na hemel. Baka te den dede, den e kisi wan opobaka fu libi na ini hemel (1 Petrus 1:3, 4). Baka te Gado meki den sabi taki den o go na hemel, den musu tan abi wan tranga bribi èn den musu tan gi yesi na Gado, so taki den no lasi a grani fu go libi na hemel.—Efeisesma 5:5; Filipisma 3:12-14.
San den sma di e go na hemel o du drape?
Den o tiri leki kownu nanga priester makandra nanga Yesus 1000 yari langa (Openbaring 5:9, 10; 20:6). Den o de a „nyun hemel” noso a regering na ini hemel di o tiri a „nyun grontapu”, dati na den libisma di o tan libi na grontapu. A hemel regering disi o yepi fu meki libisma kon de baka leki fa Gado ben wani dati na a bigin.—Yesaya 65:17; 2 Petrus 3:13.
Omeni sma o kisi wan opobaka fu go libi na hemel?
Bijbel e sori taki 144.000 sma o kisi wan opobaka fu go libi na hemel (Openbaring 7:4). Na ini a fisyun fu Openbaring 14:1-3, na apostel Yohanes si „a Pikin Skapu e tanapu na tapu Sion-bergi, makandra nanga wán hondro fotenti na fo dusun sma”. Na ini a fisyun disi, „a Pikin Skapu” na Yesus di kisi wan opobaka (Yohanes 1:29; 1 Petrus 1:19). „Sion-bergi” na a hei posisi fu Yesus nanga den 144.000 sma di o tiri nanga en na hemel.—Psalm 2:6; Hebrewsma 12:22.
Bijbel e kari ’den sma di Gado kari èn di a teki’ fu tiri nanga Krestes na ini a Kownukondre, wan „pikin ipi” (Openbaring 17:14; Lukas 12:32). Disi e sori taki den sma disi no ben o furu te yu luku omeni bakaman Yesus abi.—Yohanes 10:16.
Fowtu denki di sma abi fu den wan di e go na hemel
Fowtu denki: Ala bun sma e go na hemel.
San tru: Gado pramisi taki a moro bigi ipi fu den bun sma o libi fu têgo na grontapu.—Psalm 37:11, 29, 34.
Yesus ben taki: „Nowan sma opo go na hemel” (Yohanes 3:13). Nanga disi Yesus sori taki den bun sma di dede fosi en, soleki Abraham, Moses, Yob nanga David no ben go na hemel (Tori fu den apostel 2:29, 34). Ma den abi a howpu fu kon na libi baka dya na grontapu.—Yob 14:13-15.
Bijbel e kari na a opobaka fu den sma di e go libi na hemel, „a fosi opobaka” (Openbaring 20:6). Disi e sori taki wan tra opobaka o de. Dati na a opobaka fu den sma di o libi dya na grontapu.
Bijbel e leri taki te Gado Kownukondre o tiri, „dede no o de moro” (Openbaring 21:3, 4). A pramisi disi o kon tru na grontapu fu di noiti dede ben de na hemel.
Fowtu denki: Ibri sma man bosroiti efu a wani libi na hemel noso na grontapu.
San tru: Na Gado e bosroiti sortu Kresten e ’kisi a pai fu go libi na ini hemel’ (Filipisma 3:14). Sobun, awinsi wan sma e denki noso firi fu go na hemel, na Gado e taki suma e go èn suma no e go.—Mateyus 20:20-23.
Fowtu denki: A howpu fu libi fu têgo na grontapu na soso gi sma di no warti fu libi na hemel.
San tru: Gado e kari den wan di o kisi têgo libi na grontapu „mi pipel, „den wan di mi teki” èn „pikin di Yehovah blesi” (Yesaya 65:21-23). Den o abi a grani fu libi fu têgo sondro sondu na ini wan paradijs na grontapu. Na dati Gado ben wani na a bigin di a meki libisma.—Genesis 1:28; Psalm 115:16; Yesaya 45:18.
Fowtu denki: A nomru 144.000 di kari na Openbaring a no wan trutru nomru, ma a e agersi wan sani.
San tru: Aladi sonwan fu den nomru na ini Openbaring e agersi wan sani, toku sonwan fu den nomru na trutru nomru. Fu eksempre wi e leisi fu „den twarfu nen fu den twarfu apostel fu a Pikin Skapu” (Openbaring 21:14). Meki wi go luku fu san ede wi kan taki dati a nomru 144.000 no e agersi wan sani, ma na wan trutru nomru.
Na ini Openbaring 7:4 wi e si „gi omeni sma den poti wan marki [fu go libi na hemel]. Den poti en gi wán hondro fotenti na fo dusun sma”. Den vers moro fara e taki fu wan tra grupu sma. Dati na „wan bigi ipi sma di nowan sma ben man teri. Gado e frulusu den sma fu a „bigi ipi” disi tu (Openbaring 7:9, 10). Efu a nomru 144.000 no ben de wan trutru nomru, dan sma no ben o man si a difrenti na mindri a grupu disi pe a nomru kari krin èn a „bigi ipi” pe a nomru no kari. a
Boiti dati, Openbaring e taki dati den 144.000 sma na den „fosiwan di bai puru na mindri libisma” (Openbaring 14:4). A wortu „fosiwan” e sori taki disi na wan spesrutu grupu di no bigi. A e sori krin taki den wan di o tiri nanga Krestes na ini hemel na wan pikin grupu nomo te yu agersi en nanga a bigi ipi sma di nowan sma man teri èn di o libi na grontapu.—Openbaring 5:10.
a Professor Robert L. Thomas ben taki fu a nomru 144.000 di kari na Openbaring 7:4: „Na wan trutru nomru te yu teki en gersi nanga Openbaring 7:9 pe a nomru no kari. Efu a nomru 144.000 musu agersi wan sani, dan nowan fu den nomru na ini Openbaring na trutru nomru.”—Openbaring 1-7: An Exegetical Commentary, bladzijde 474.
Kande yu lobi den tori disi tu
PRENSPARI LERI FU BIJBEL
San na Gado Kownukondre?
Di Yesus ben de na grontapu, a taki fu Gado Kownukondre moro leki iniwan tra sani. Hondrohondro yari langa den bakaman fu en begi fu a Kownukondre disi kon.
SAN BIJBEL E LERI
Yu wani luku fa a de fu studeri Bijbel nanga wi?
Wan sma kan studeri Bijbel nanga yu tapu Internet, sondro taki yu abi fu pai.