A no musu fruwondru wi taki sma e aksi fu san ede libisma e dede, spesrutu te wi lasi wan sma di wi lobi. Bijbel e taki: „A maka di e meki sma dede, na sondu.”​—1 Korentesma 15:56.

Fu san ede ala libisma e sondu èn e dede?

 Den fosi libisma Adam nanga Eva lasi den libi fu di den sondu teige Gado (Genesis 3:17-19). Te sma e trangayesi Gado, dan na dede den o dede fu di na Gado „na a sma di e gi libi”.​—Psalm 36:9; Genesis 2:17.

 Adam gi den bakapisi fu sondu abra na ala den bakapikin fu en. Bijbel e taki: „Wán man meki sondu kon na grontapu èn sondu tyari dede kon. Dati meki ala sma e dede, bika den alamala sondu” (Romesma 5:12). Ala sma e dede fu di den alamala sondu.​—Romesma 3:23.

Fa a du kon taki dede no o de moro?

 Gado pramisi taki wan ten o kon pe a „o swari dede fu têgo” (Yesaya 25:8). Ma fu puru dede, a musu puru a rutu fu dede fosi èn dati na sondu. Gado o meki Yesus Krestes du disi. Na en o „puru a sondu fu grontapu”.​—Yohanes 1:29; 1 Yohanes 1:7.