Iya, Didibri de trutru. A de „a tiriman fu grontapu”, wan engel di tron wan ogri yeye di opo ensrefi teige Gado (Yohanes 14:30; Efeisesma 6:11, 12). Bijbel e tyari kon na krin suma na Didibri nanga yepi fu den nen disi:

•   Satan, a nen dati wani taki „Gensman”.​—Yob 1:6.

•   Didibri, a nen dati wani taki „Ogri-ati leiman”.​—Openbaring 12:9.

•   Sneki, na wan nen di Bijbel e gebroiki fu sori go na wan „Koriman”.​—2 Korentesma 11:3.

•   A sma di e tesi libisma.​—Mateyus 4:3.

•   Leiman.​—Yohanes 8:44.

A no de wan takru fasi

 Son sma e denki taki Satan Didibri na wan takru fasi di wi alamala abi na ini wi. Ma na ini Bijbel wi e leisi fu wan takimakandra na mindri Gado nanga Satan. Gado no abi nowan ogri, dati meki a no ben kan taki nanga wan takru fasi di de na inisei fu en (Deuteronomium 32:4; Yob 2:1-6). Satan ben tesi Yesus tu, wan sma di no ben abi nowan sondu (Mateyus 4:8-10; 1 Yohanes 3:5). Sobun, Bijbel e sori taki Didibri na wan trutru sma, a no de wan takru fasi.

 A no musu fruwondru wi taki furu sma no e bribi taki Didibri de trutru. Bijbel e taki dati Didibri e kori sma na ala sortu fasi, soso fu man doro den marki fu en (2 Tesalonikasma 2:9, 10). Wan fu den triki fu en di e wroko heri bun na taki a e breni a frustan fu furu sma so taki den no e bribi taki a de trutru.​—2 Korentesma 4:4.

  Fowtu denki: Lucifer na wan tra nen fu Didibri.

 San tru: A Hebrew wortu di son Bijbel vertaal leki „Lucifer” wani taki ’wan sma di ben e skèin na hemel fosi’ (Yesaya 14:12). Efu wi luku den vers lontu a tekst disi, dan wi e si taki a e sori go na den kownu fu Babilon di Gado ben o lagi fu di den ben abi bigifasi (Yesaya 14:4, 13-20). Den wortu ’wan sma di ben e skèin na hemel fosi’, na wan fasi fu sori taki Gado ben e spotu nanga den kownu fu Babilon di ben lasi den makti.

  Fowtu denki: Satan e wroko gi Gado èn Gado e gebroiki en fu strafu sma.

 San tru: Didibri na a feanti fu Gado, a no de Gado futuboi. Satan Didibri e gens den sma di e dini Gado èn a e lei gi den taki den no e anbegi Gado nanga wan krin ati.​—1 Petrus 5:8; Openbaring 12:10.