Oolo, Bible etupa bishinkamisho bikata abilesha’shi Efile Mukulu e kwanka. Etunyingisha bwa kutuula lukumiino mwadi, kushi kukumiina na meso apuute abilongyesha bipwilo nya, kadi pa ‘kufubisha kinangu’ na ‘lushingulwilo.’ (Bena-Loma 12:1, Esambi dipya 2015; 1 Yowano 5:20) Tutale ino ngyelelo ya binangu i mu Bible:

•   Mushindo wi bipangwa byooso bi na muwa mwiyilu na paashi aulesha shi kwi Mupangi. Bible amba shi: ‘Eyendo, nshibo yooso i na muntu mwiyibakye, kadi mukite bintu byooso nyi Efile Mukulu.’ (Bena-Ebelu 3:4) Uno nyi ngyelelo a binangu mupelepele, kadi bantu balongye ngofu abamono shi apatuula uno mwanda kalolo. a

•   Bu byatudi bantu, twi batandikye na malaka a kuuka bwakinyi twi na muwa, atwikala na ano malaka mpa na kunyima kwa kukumbasha nkalo yetu ya ku mbidi. Ano malaka nyi abetanyina kwi Bible bu ‘nsala ya mu kikudi’ ayisangisha malaka a kuuka na kulangwila Efile Mukulu. (Mateo 5:3; Kibafumbwilwe 4:11) Ino nsala ya mu kikudi tayishinkamisha penda shi Efile Mukulu e kwanka nya, ayilesha dingi shi aye nyi Mupangi etu sha kifulo akumiina shi tupudishe ino nsala ya mu kikudi.​—Mateo 4:4.

•   Matemuki a mu Bible abaadi afundjibwe bipwa nkama kumpala na abaadi akumbane mu myanda yooso anka bibaadi bitemukibwe. Ano matemuki a binyibinyi na mushindo ubaadi akumbane ano matemuki mu tu myanda tooso aulesha shi aafiki ku nsulo ikile ya bantu.​—2 Mpyeele 1:21.

•   Bafundji ba Bible abaadi abauku myanda ya sianse bipwa bibungi kumpala kwashi bantu ba mu mafuku aabo beyiukye. Bu kileshesho, mu mafuku a kala bebungi abaadi abapwandjikisha shi nsenga abaadi beyisemune kwi nyema mukata, bu ngyefu, ngulube a kisuku, sunga mboo. Kadi, Bible amba shi Efile Mukulu ‘mmupudikye nsenga pashii kintu.’ (Yoobo 26:7) Na dingi, Bible alesha kalolo shi nsenga ‘ngibuumbe,’ i bu ‘kifunda.’ (Yeeshaya 40:22) Bantu bebungi abamonaa shi bwa kupatuula kalolo kubaadi kupete bafundji ba Bible kino kyukilo nkwamba shi abaadi bekipete kwi Efile Mukulu.

•   Bible aluula nkonko ibungi i bukopo, nkonko ikumbeene kukita shi su ta ngyalulwe kalolo, bantu be kumona shi Efile Mukulu te kwanka. Bu kileshesho: Su Efile Mukulu e na kifulo na nsha bukome-booso, bwakinyi mu nsenga muwule makyenga na bubi? Bwakinyi bipwilo bikwete misango ibungi kutuma bantu ku bubi pamutwe pa kwibatuma ku bibuwa?​—Tite 1:16.