E nofo Irma i Siamani ma ua toeitiiti 90 tausaga le matua o lona soifua. Ona o ni faalavelave matuiā se lua na tutupu iā te ia ma ni taotoga, ua lē toe mafai ai ona ia talaʻi mai lea fale i lea fale e pei ona sa masani ai. Ua talanoa atu nei Irma i isi e faatatau i lona faatuatua i le tusiaina o tusi i ona tauaiga ma ē e masani i ai. E matuā fiafia tagata i tusi faalaeiau ma faamāfanafana a Irma, o lea e latou te vili atu ai iā Irma po o afea e toe tusi atu ai. E tele foʻi tusi faafetai a tagata e lafo atu, ma talosaga atu iā Irma e toe tusi atu. Ua faapea mai Irma, “Ua matuā faafiafiaina aʻu ma ua mafai ai ona ou talaʻi atu pea.”

 E tusi atu foʻi Irma i tagata o loo tausi i nofoaga e tausia ai tagata matutua. Na ia faapea mai: “Na vili mai se loomatua ma fai mai o laʻu tusi na matuā faamāfanafanaina ai o ia ina ua maliu lana tane. E na te teuina laʻu tusi i totonu o lana Tusi Paia ma e masani ona ia faitau i ai i le afiafi. Na fai mai foʻi le isi fafine e leʻi leva ona oti lana tane, na sili atu ona fesoasoani laʻu tusi iā te ia, nai lo o le lauga a le patele. Na ia faapea mai e tele ana fesili e na te manaʻomia ai ni tali ma pe mafai ona asiasi mai ma te talanoa.”

 Na talosaga atu se fafine iā Irma e tusi atu. O lenei fafine na siitia i se nofoaga mamao, e lē o se molimau ae masani ai Irma. Na faapea mai Irma, “Na teu uma e le fafine aʻu tusi. Ina ua maliu le fafine, na telefoni mai lana tama teine ma fai mai na ia faitauina tusi uma na ou tusia mo lona tinā. Na ia talosaga mai foʻi pe mafai ona ou tusi atu iā te ia ni tusi faale-Tusi Paia.”

 Ua matuā faafiafiaina Irma i lana auaunaga. Na fai mai o ia, “Ou te talosaga atu iā Ieova ina ia foaʻi mai pea iā te aʻu le malosi e auauna ai iā te ia. E ui ua lē mafai ona ou toe talaʻi mai i lea fale i lea fale, ae ou te faia le mea ou te mafaia e auauna ai iā Ieova.”